tadelsa n tagda
Yura t: salah ngab (Libya)
Tadelsa nnegh tedwel kan tagda
Idvnnadvt terwel si nnegh tanemmirt
D tarwa amenzu yellul d yekna
D nemjer imendi, ukrunt t tasirt
Nemlu may nemlu, ad nsi awal yemda
Nsussem, tasusmi nnegh turi tinirt
Sefrugh asefru s awal n tagda
Ugrifyu yemlu netci tadbirt
Tabrat nnew di des yexwa
Dis awal kan fus nnu yuri t
S askil wayet awal nnew yemla
D ugdun ad tmel awal nnu tamarit

- 2 - nawlu n amerwas
nawlu nnu yedwel amerwas
S uglim ighessen nnew udnegh
Tvar yemla abrid tkerkas
Tmedjit ur tesla, d uzlegh
Ufigh qabil yenghu qabil d yemlas
Pabil yummut maca sik ugdegh!!!
D ugrifw tekkelt taytv yus as
Yemlu: icfigh si rummu netvlegh!!
Detca anetta, d detca hadyas
Yuss d nuddem, fus nnew tsumtegh
Itxertlegh s memmi di di yeddasv
lesm nnes ittigh, d ghfes siwlegh
A bunadem, idret t taburt n arwas
Mani tagherma?, in tukza nnew ffdegh
A bunadem, memmu yenghu ameghras?
Yerru ghfi, awal yemlu mi ukzegh

- 3 - yemma tvamzva
nesfu yaffa nnem a yemma tvamzva
Si anefji si negh ajemmiz yuker
Si nedrez af tamelghught n tvarwa
Ass mi yezmir tvarwa ayemgher
Nefku zet, yemla uhu ghessegh tghawsa
Asekkur yneghu islem yegger
Telmatv di ammaj tufut temla
Allen n tifratin zaw nnes yedjer
Amezdagh ind bab nnes iggun tezra
Maca s ujenna mi yapwa anzver

- 4 - Ciciw
Ciciw mellel yezga
" .. Ghessegh ad aglegh .." ghrek
imlighes: ghrek ujenna
Yemlu: cek weltucid meccek
Sestnegh t: s manis tus id?
Yerru s talat n tilelli…
Sestnegh t: d may teggid?
Yerru: "..inghigh tt tiwdi .."
Sestnegh: ifriwenik mani?
Yemlu: wekrunt n ussan
S imettvawen tabrat yuri
Hayugur, tikliwinis imdan
Sestnegh: d s may tugded?
Yerru: di ul nnu, ad nghun tayri
Sestnegh: d mammek truled?
yemlu: ilhan di turari.
imlighes: tedder tufut n detca
ad t agled, had tenghed memmik
tallumet ur ad taden tafya
ali di ujenna d imel awalik