Tawiza

Ggutnt tbratin n tmawast n usgmi anamur lli d ilkmn tikadimiyin n tmnadvin n usgmi d usilgh, f usntl n usnmala n uslmd n tutlayt tamazight g tinml n uslmd amnzu, awint d tugtt n tghawsiwin; aslmd n tmazight ar t ttwalan islmadn da sawalnin tamazight nghdd yan g udmawn nns.
-Kradvt tusragin, tizi ittuzvlayn i uslmd n tmazight.
-Islmadn n tmazight ar zzrayn asilgh g tutlayt tamazight d tdidaktikt nns g tmnadvin n tgldit qqah nnsnt. ma yad d tugtt n tghawsiwin yadvnin lli s nnan rad srxunt aslmd d ulmmud n tutlayt tamazight afad ad tt ssnn tarwa nns g tmazirt nns!
Tamawast d usinag g tama nns, ar sawaln f kr n izwiln, zund: amdvan n tinml g tlla tutlayt tamazight, amdvan n islmadn n tmazight, amdvan n tdaliwin n tmazight n ku asggwas, sg amzwaru ar wiss kradv... ur nssin mani g tn id iwin? tidtt tga tayyadv!
Yazzv ad ismd usggûs wiss kradv n uslmd n tutlayt tamazight, maca mani ilkm? is fsint tmukrisin nns?
Tugtt n islmadn lli iwalan aslmd n tmazight ur ad tt sawaln! nlqqm i tmukrist, lligh tn nsmun d islmadn lli tt sawalnin, nskr ad sn yan usilgh s tbidagujit mas ad ssawaln tamazight qqah nnsn, g tizi lligh d iqqan ad ittuzvlay ussilgh nnsn, ittuskar s tbidagujit n wid ur sawalnin tutlayt; mamnk ur swingmn iwdan cayfnin f usilgh g tmukrist ad?
Is ur tzvli tbidagujit n usilgh n wid lli sawalnin yat tutlayt, f tin winn lli tt ur sawalnin, ghmklli tzvli tbidagujit n uslmd n yat tutlayt i inlmadn da tt sawalnin, f tin wid tt ur sawalnin??
M yad ad isargn i tugtt n islmadn ann aylligh ad ttannayn imalassn n usilgh mas gan am tannurzvmt d usunfu g twwuri, ar zzrayn ussan n usilgh ur ar asn d ffaln amya!
Is ur tgi tazgalt tamqqrant ad nswala aslmd n yat tutlayt i yan tt ur isawaln? yak ar ttinin wartaghawsa ur ad tt yakka!
Tisaghratin n islmadn, ar gisnt nttafa tawilawt ad: “asilgh g tutlayt tamazight d tdidaktikt nns”, maca ur ad nzvrra yat f tdidaktikt n tmazight, iwdan da cayfnin f usilgh g tdidaktikt ur ad fllas sawaln! ar attvan idlisn n uslmad d unlmad f islmadn, mmattin ar sawaln f tilal n ulmmud, ar ttmaqqaln adlis n unlmad tasna s tayyadv!
Is ur tlli tdidaktikt izvlin s tmazight? ngh ad nfsi tamukrist ad ar nsslmad tamazight s tdidaktikt n tutlayin yad, am ghiklli iskr yan g id mas lli cayfnin f usilgh n tutlayt, lligh ad issawal f tjrrvumt n tmazight s tmawalt n taorvabt, isawl f “ljarr wa lmjrur” d mad t irwasn g tjrrvumt n tmazight!
Ur igum ad nsslmad tamazight s tdidaktikt n tutlayin yadvnin, nlqqm as tamawalt awd nttat!
Tugtt n islmadn lli mu nssagh win tmazight ur ad sslmadn tamazight, is plli lan assagh ns, d tugtt n wid lli tt sslmadnin ur ad ttuqqirvn tizi n kradvt tsragin g imalass, ghiklli ur ttuqqirvn tilal n ulmmud.
Yat tgarawt ar ttini mas iggut f unlmad n usggûs amzwaru ad ittlmad snat tutlayin d sin iskkiln s yat twalt! ma yann af ad ttinin mas d iqqan ad tmmatti yat gisnt s usggûs wiss sin, tghama ghar yat g umzwaru!
Wid igum ad advun s tyafut n isnubbucn n imussann n usgmi d uslmd n tutlayin, rar nn afn mas, azzan ngh anlmad amzvyan ar ittizdvir, ilint dars tzmmarv da ur illin dar umqran, ad ittlmad unck nna mu yufa n tutlayin d iskkiln nnsnt s yat twalt, acku anli nns illa sul g tfrkt n ugmu.
G tizi lligh ar siggiln iwdan ad, ad tmmatti tmazight s usggûs wiss sin, is fllasn illa ad ttsuturn mmaghn f ad ttulmadnt tilal ann yadvnin n ulmmud s tutlayt tamazight, acku aslmd s tutlayt n Ma ar yakka tanyafut da ur yakka uslmd s tutlayt tabrrvanit.
Tili yat tgarawt yadvnin ar ttini; ma rad ad gh tfk tmazight igh tt akkw nsslmd, nghr tt?
Zat ad nsaqsa f ma rad ad gh tfk tmazight, iqqan d ad nsaqsa ixfawn ngh: mad as nfka nkkwni? Taghawsa tamzwarut, illa fllagh ad tt nssn, nlmd tt, yixcin bapra ad nttlmad alsiwn n wiyyadv, nttu winngh, nsghr t ig ixssv!
Ghid rad d nkwti middn n katvalunya lli ad gh zwarnin s umsasa n tutlayt, sskcmn ils nnsn s tinml, dvin d izrfan lli s tt frgn, zund azrf n twwuri lli isbzzizn f wanna isiggiln tawwuri g katvalunya ad zwar issn ad isawal ar ittara takatvalunit, ig it aslmad ngh amsasfr ngh amnoarv... iqqan d ad issn ils n ikatvaluniyn afad ad disn ittmsawadv s ils nnsn.
Aylli ttini tmawast n usgmi d ussan n tghri lli snmillint tkadimiyin f uslmd n tmazight, ula aylli ittunnan g tinnawt n Ajdir, ur sar ifrg tamazight ula imatr izrfan nns (droits), acku ur ttvafn atig ula tadusi n uzrf (loi), ma yann skrnt ku yan f ad ismatti tamasayt f ixf nns.
Ku tighawsiwin ad ar agh mmalant mas tamukrist n tmazight tga tasrtant, tga tamukrist n izrfan, afssay ns isghawsa s uzrf, iqqan d ad ig asrtan!
(Elhassan Boutssaid Usam, taldrar@yahoo.fr)