Tactut wis 7 n tlalit n TAWIZA

Ayyuz i weghmis n “Tawiza”

Yura t: Hassan Ahfidv (Aliman)

Ayyuz i wghammis n “Tawiza”x webrid  a azirar i tuyur, x tsawent a issahharen i turi x ij n udvar, x webrid a iccuren s isannanen d tioenkrifin d wattvas n timukrisin n tudart. tawiza tiwedv ad anegh tessaregh tfawt nnes wis 7 n twaratin, 7 n iseggusa nttat ttayem anegh d aman izdigen zi tarawin yuzghen, tssajad x af negh mkur yur s ij n wudem d amaynu yecna, ihla bezzaf. Ayyuz i mas Budpan amassay n Tawiza i yucin tasghart tameqrant n tudart nnes x wudem n Tawiza d wudem n tmazight, maenzi xminni d ntidar Tawiza di temdint n Nnadvur ntidar tmazight i d inqqaren zi Arrif-Nnadvur-ghar tamazgha,Tawiza d ij uzidan yeccur s uqartvas adelsan idduqquzv deg udem iqawmajiyyen, itbaddan arendad i ayt bab n tasertit n wusoarreb, mgal-arendad– i yinni iqqaren tmazight war ghar s bu ayt bab nnes i t gha yihdvan zeg iqemmumen nwuccanen.

Tawiza netganfa-d asafar- ghar timsizwaritin -iftitahiyyat-nnes yissawaren x tidet, s yij n rxazrat d tadimuqratit, tkessi t  tawengimt n utarras adimuqrati. Da war tettugh ca ad ssiwregh x yij n temssizwarut n wuttvunen iodan tessawar x yinni izduqzven ixef nsen di Kazablanka. Tidar d dayes marra min itjjan ihudriyyen ad awdven ghar manaya. U nican iteqqen manaya aked tsertit n tighuri di tmurt nnegh 100%, agherbaz amughrabi iyellan -d amentil-d amessay x tadura n min yemsaren di 16 mayyu. Min xsegh ad inigh s manaya netta d asefsi n wawar -Attahlil-d useqdec n timukrisin i temsaren di Lmughrib i tugha deg umcan nnes.
Ruhen ussan imsar di tmurt n -Ssaoudiyya- amacnaw-zund- min yimsaren di Kazablanca, uca ij uneghlaf d ameqran di Ssaoudiyya issenta issawar x uduqqezv a d umsawaf a imsaren, issawar x manaya am mamec nican 100% i tidar Tawiza di temsizwarut nnes iodun. Manaya iscan anegh billi Imazighen am mass Budpan  ghar sen ij n rxezrat deg umcan nnes ghar umadval d yimal, ij n raggûj izdig d adimuqrati.

Ghar unggar ad tqad as i mmas Budpan attvas x wakud nnes  i yfka i Tawiza, ad as nini asggûs n tectut wis 7 d amaggaz  ihla, iffulki. Nessitim tudart tazirart i Tawiza, ghar zzat rebda, ad nzvar Tawiza tettvef isfedv deg ufus nnes, tanemmirt attvas i yinni i d itarin ghar Tawiza mkur ij s yisem nnes, ad tqad awem
marra ra d kknniw x tizmmar nwem.

Tudart i tmazight, i Tawiza jar anegh .

(Hassan Ahfid,Aliman,Ass n,15-2-2004)