Tamja d wadjun

Yura t: Oebbuti Saoid

 (Tifarsit, Nnadvûr)

Tessiwer tamja

D wadjun,

Nnan awaren

Igi twattun

Yenna s i tamja wadjun:

Magahr urar n yidv a

War day s arrayes

Wara d izran

Igi traja wara d azizun?

Urar n yidv a

War day s ijartar,

Di remrah idja tessun.

Urar n yidv a

War day s azvri n yiwdan

Maxmi nipni sghuyyun.

Urar n yidv a

War day s amuni

Am wenni n thebba n uzekkvun

N udvir imezwura idja tezzvun

Timgharin war xaf sent ca

Remrahet nni ig ineddun

Timgharin dewrent

D timessasin am weghrum

I teggent ca n thenjirin

Mebra ma ad sseyment antun

Nitenti yardvent arrudv

N ufiru igi twaqtvun

Maci amecnaw arrudv azirar

Igi tnudumen marra

S tseghnas d rmuzun.

Aryazen am yizan

War tseqsin deg urar

Mghar x tmarniwt n wectum

Ra d npar a muray

Wara d wenni n tesrit

Deg urar war urzzun

X uyujir iga trun

Toanen t  marra ihenjiren

Mayenzi war ghar s asmun

I kid s ghad yewten

Uca ad kid s imun.

Tessiwer tamja

Tenna s i wadjun:

Dreqq i toeqqayin ad

irint x yirem nnec

War day i sghufa a yamcum

Sihma irem nnec

Dreqq i teyyita nnec

Huma ihenjiren ad ndvun

Gg axmi ttenpezzid

Aytex ayt bab n wurar

Ad xsen uca ad ssun

Ijartar nix d ifarracen

Iwdan nnex neccin

S lgha ad ten nesmun

Cek tessned a yadjun

Necc mexmi tsudvex deg urar

Izran tteyyacen d

Zeg wqemmum n tbrighin

Rexdenni itiri cway n rfuyun

Jj ayi a yadjun

Mara cek tfeyhed

Uca teggid tilifun

Dreqq i toeqqayin ad irint

Am tirart n yijdvadv

Sennej i wtmun

Nix amecnaw tirart

N thenjirin ghar uoecci

I teggent s wesghun

Jj ayi ad sqaregh a aydjun

Ad kid c isigh s ighennijen

Mechar zeg ûmi

Iwdven nettu

Aytex ca zzay sen

Ad ten tadef tehnint

Uca ad qqimen trun

X tazvyudvi n wussan nni

Imezwura ig yeodun.

(ass n 11 zi ghuct 2953)