Tarezzut xef tira

Yura t: Mimun Amsbrid (Biljika)

“Ce qui créa l'humanité, c'est la narration", Pierre Janet - "La littérature est l'extase du langage", Pascal Quignard

Ttacid amxmi idammen nnec qquren deg izuwran, warr tizzren… Izuwran nnec tghufan, xsen ad dduqzven… War tejjid min war teggid bac ad azzren idammen, ad uyuren di yarrimet, ad t sswen bac war ttizegh… Mamec ma teggid war tufid ixf nnec… teqqimed, war-yelli yamenni… tbedded, war-yelli yamenni… tuyured, upu… Ttacid akid arrimet nnec amacnaw ca n ukentir n targist: war days bu tudart… Min d ac yeqqimen war t teggid bac ad ssudvedv tudart di yarrimet ad n targist?

I tira?!… D tidet, attvas war turid!… Zi mermi war turid?… Mayemmi war ttarid?… Yami tugha tarrid di ca n wussan, tugha tufid ghar tira nni: azellif nnec itefsis, idammen taryen-ttvaren di yarrimet!… Min id yiwyen ssmex ghar idammen?!… Akid uyenni ghas ad ssentid ttarid, ttacid akid idammen nnec yeqquren fessyen cwayt-cwayt, tmudjughen deg izuwran: am waman i jarsen, xminni xafsen d tteffegh tfuct…

Yak ma war yelli tira tarrant idammen d ssmex (nigh ssmex d idammen?!), itazzer x ughembub n tafriwin, bac ur teqquren deg izuwran?!… War nnigh aqa wenni i tarin itari s idammen nnes! (amen tinin irumansiyyen)… D attvas!… Xsegh ghas ad ssnegh s man talcimit (alchimie) i ddakkûren idammmen d ssmex s tira (di tira).

Tira, wap!… Maca man tira? Is tira marra d "tira"? Awar yetwarin ma d tira? Mani yetbedda wawar bac ad ssenta tira? Tira i war d yeffighen zi tira, ma d tira? Tira i war itarin/yetwarin xf tira (tisatarin n tira n ubalambsist ("palimpseste")), ma d tira?…

 

Ires n tmazight oemmars war yemsebdvi akid arrimet tamazight (arrimet n tmettvut d wargaz imazighen). Yeqqim yeqqen ghar arrimet ad  itettedv days, itet zzays: war das tekkis yemmas; war yejjummi. War xafs yemsebdvi bac ad yeyma mani nnidven, ad yessyem ixf nnes nnit, ad yeghmi deg iyran n tira, ad yemsaraw, ad yewwet izuwran, ad yezzver ticudvadv, ad yemghar degw aggûj xf yemmas arrimet  maca war ad kids iqettvu nigh ad yettu.

Awaren n tmazight war igwjen xf yemmat sen arrimet tamatight bac ad ddaren ict n tudart nnidven, mani nnidven: mani awaren teddaren akid wawaren; mani awaren teddaren s wawren; mani awaren kessin ixf nsen, war tghimin qqnen ghar arrimet i ten d jejjin s wsghun n toebbudvt ig iteqqnen aseymi ghar yemmas.

Awaren n tmazight oad tbeddan s wattvas xf yemmat sen arrimet tamazight: war zemren ad irin mani war telli, ad ddaren nepra nettat; war zemren ad fesyen tisariwin nni i ten ghars iteqqnen bac ad agwjen, ad gujen, ad ddaren tudart nsen…

Arrimet ttaher, ttadven, ttemsebdva, tfessi…

Min ghad kken wawaren n tmazight war nnufsren, war ffighen zeg whsin n yemmat sen arrimet tamazight bac ad arcmen ixf nsen di yarrimet n wkud, ad qqimen d imezvyanen, d uyedjinen, d imudrusen… Ad teqqim tudart nsen d tazyent. U balak, akid wussan, ad twaksen - war tirin.

Tira war llint d tasraft nigh d agadir n wawaren!

Tira d iyyar n wawaren: deg iyyar n tira, awaren ghemmyen, ccaten izuwran, ttvfen, temsarawen, tarwen… Deg ijj n wawar: teddaren. U teddaren tudart nsen.

Imazighen war zzvun awaren nsen deg iyyar n tira zi zic bac ad aysen yetwarnu, ad attvasen (zeg wattvas)... Jjin awaren nsen uyren ghar wancucen nsen, itawi ten wadvu, twettvan ijj awarni wennidven… Inni yewdvan ujaren nni yeqqimen. Amazigh n wass ad i yexsen ad yari, i yexsen ad yeffegh zeg wawar/asiwer bac ad yadef di tira (ad yeg min war ggin imezwura), itaf ixf nnes d amezrudv deg wawaren, d amezrudv di timeddurin ("styles") n tira… Imenza war as d jjin min xef ghad yedwer. War as d jjin bu wagra yetwari, huma ad ghars yarnu: war yufi bu tasarrawt zzat is.

Amazigh ig tarin deg wkud nnegh, amariw amazigh, war ghars bu babas/ymmas: d mmis n yexf nnes. D mmis n tira nnes.

Min ghad yeg uyujir ad n tira? Ad yeqqim yettru, yeccat deg ifadden xf yemmas/babas nni war ghars?!… x wagra i ynuwwcen… agra i war hdvin ayt bab nnes?… Nigh ad yekkar x idvaren nnes, ad yezzerz azellif nnes, ad yesmun min t id yiwdven zeg wagra yad yeqqimen i yewran, ad t' ifars, ad t 'icarz, ad yezzvu, ad yessu, ad yessyem, ad ghars yarnu… Ad tagh ad yettvef, ad tagh ad yeghmi, ad tagh ad yawedv… Ad zzays ccen imazighen (iyujiren). Ad zzays ccen yinidven.

Maca is d tidet amariw amazigh d ayujir anict uyad? Ma s tidet d amezrudv anict uyenni? War tghiregh!… Maghar ghars ires: ires n tmazight oad yeddar. Ifetwizen nnes twanuwcen d ad d dip ad, maca llan. Amariw s tmazight xafs ad ten yesmun, ad ten yeqqen ay ad ghar ayad, ad zzaysen yeg tiseddyin d iqurar n wawren yetwarin… Xef umariw amazigh ad ten d yardver xef arrimet yessawaren bac ad ten yewc i tafriwin n yedrisen, mani ghad ssenten ict n tudart nnidven: tudart n wawaren.

Balak awaren n tmazight i yeqqimen ddaren udrusen xf min itexs ad yini/ad yari umariw amazigh n wkud nnegh. Maca tira,  tira n tidet  zemrent ad ggent s drus attvas! Imara ssenent ad ghzant xf izuwran n wawaren, bac ad ssnent manis d kkin, manis d usin; bac ad awdvent ghar tracca nni yudjghen i ten iteqqnen ayad ghar uyad, amen ten tteqqen ghar tamezghiwt i yellan d ict n tzeddight n Tamurt (jar tizeddighin nnidven).

Zi tiwessna yad n tudart n wawaren d tudart s wawaren i ghad yeffegh umariw amazigh bac ad yessini tamazight min yxes ad yari/ad yini netta, huma ad yarzvem xf ijennawen nnidven.

Siwregh x yires amazigh d wawaren nnes… Maca netta amariw amazigh war itari s yires (s wawaren) wapa. Itari s marra min iteggen tiwessna. Ssiwregh s nnej x "tracca" nni yudjghen, i war itemwirin iytettvfen awaren n yires ayad ghar uyad… Imar nswedv zeg wadas, ntaf tiwessna war telli d ca nnidven: amen t ntaf awarni wawaren n yires, ntaf it di tisi n marra min yetwaggen s wawaren (izran, tiqessisin…) d min yetwaggen s ca nnidven (traxt, targist, azvru, tanuqart, uzzar, tadvuft, akccudv/azghar, tiggest  di arrrimet nigh di ca nnidven)... War-yelli ayenni wapa: tracca yad ntaf it awarni isinaryuten n tirat…

Tira s tmazight tessutur ict n twessna tiriw u tudjegh s min d tejja tamezghiwt: min di tenna ixf nnes, min di tesscen iman nnes, min di turar imqn nnes…

Maca tiwessna n mana yad tghima d ijen usvurif wapa deg wbrid n tira. Awarnas itas d wfsay d tighuni, tarezzit d wsmuni, afsay d umudvi, advran, afran, idez, ahray, iggû… Deg ijen wawar: tessenta twaggit n tira.

Amariw amazigh, zeg ûami llant tira netta yarettver ires nnes i wawaren n yinnidven (tabuniqit, tagrigit, talatinit, taorabt, tafransist…). Balak yiwedv d wass nni di ghad yari (u ad yiri) ghar yexf nnes.

(Mimun Amsbrid, 11/09/2002)