Tadewra ghar idvennadv

Tura t: Mayssa Racida (Bentveyyeb, Nnadvûr)

 Zeg usenti n weydud di tudart ak marra min as d yundven, zi taycit nnes d tusna nnes i min yedjan nnedvni ikid s iteddaren. Temghar d ict n tyumi ak weydud amazigh, tyumi i ntaf tkessi t mkur tamektit (mémoire) deg weydud a yamazigh, amezvyan, ameqran day sen, tyumi ya id imgharen ak tmektit n weydud, amen d tesmeghghar mkur tamektit n usiymi, nettat d tyumi n tamzva nigh targu. Asemqar a i ntaf izdegh yemsezdagh ak (thajit) tamcaput (conte)  mermi mma twaydar.

Amec tmeksi di tmektit n temgharin attvasv x yaryazen, u tmuttuy zeg isuta (générations) ghar isuta. Axmi ntidar tamzva tamektit nnegh tedwer ghar timcupa, tihuja nni henna s n mkur ijjen nigh d yemma s nigh d tameqrant n mkur taddart, amenn mkur ijjen zzay negh mammec yesrusa awlaf (photos ) n tamzva ya di jar ixarrisven nnes d tmektit nnes tasedmunt. U tamzva axmi twaydar di tmacaput rebda d akebab (Symbole) n uganed (mal) d min yetwaydaren rebda s tmesrayin war yehrin maghar toawaden xaf s: Ttet iwdan, ttet imurdvasv d min yursvudven, amec nettat i rebda tumes injan, tciyyadv zzay s tursvudvet.

Marra manaya i nessusen zi tamzva d ict n tamunt n txarrisvin nigh d ict n tghuri i nettat zi tewwart n tmacaput i nessen marra ayed negh. U tirizi n imazighen d tanebghurt (riche) s temcupa ya amecnaw: tamcaput n Qidec, tamcaput n tbuparect d tmighist, tamcaput n nunja, tamcaput nMhend rpem, tamcaput n tamzva d uccen…….

Maca i mara dinni ca n timektitin n temgharin ksint xef temgharin nnedvni zi zic belli tamzva d ict n tirawt (réalité) yeddar it wattvas n rwacunat zeg segwussa rami tugha udrusen yewdan di redcur, udrusent tzeddagh, war yedji amesni (transport) i zi gha yemutti zi dcar ghar dcar nigh zi tmazirt ghar tennedvni, rami tugha iwdan ssacaren s idvaren nsen nigh xef ca n rmuddar (animaux). Mammec zeg ghezdis nnedvni tugha tammurt udem nnes yedra qao s ixeccaben d yexrijen tugha yetmarni ughemmuy n tagant (la forêt) megal i wakudv a nteddar, tighawsiwin a marra qqarent belli tamzva tugha teddar ak yewdan, teffegh d akid sen deg wattvasv iraqqen (=idgharen, places) amecnaw: Ighzvar i di djan yefran d tagant d idurar war yezdighen. U nettat war tegwar s uzir mghar s tmeddit tegwar tyemmar min gha d tec nigh ad tessec tarwa nnes, tyemmar rmuddar nigh d ijdvadv nigh d iwdan, iwdven qao nnan xaf s belli tessawar am nyewdan s tutrayt nsen izi temsawaren. Wap manaya i toawaden yewdan i yeddaren akudv n tamzva, war yedji d tamcaput i ghar  dewregh mahend ad ssemregh marra timesna ya maca dewregh ghar timektitin n temgharin i yetoawaden manaya i ymeqranen war yedji mahend ad sserpant isiyman. U axmi toawadent x temzva ya n tidet tugha yedjan teddar ak yewdan tidarent tadewra nnes di min d igwaren, maghar redcur ssentan issyuran (vider) zeg imezdagh, tudrus rimart nsen di marra iraqqen i tugha yizwar nidar.

Zi min nnant x temzva: netta icten tenna: belli tamzva d ijj n wejdvidv yemghar attvasv ghar s acenqub, ghar s afriwen mkur afar ad day s yksi iwed. Icten tenna: Tamzva d tamghart tegdvar tezzugart ghar s acewwaf di marra yarramet nnes, acewwaf n uzedjif nnes yemxumber yfsi yeccenkek. Icten tenna: Tmzva targu tamghart n argu yina yedjan rayah d jnun tbeddaren deg wattvasv n wudmawen, ddakkwaren d rmuddar, ddakwaren d iwdan mammec xsen ad d dewren ad d dewren.

Amec dinni ijj n umyey (légende) temsar deg dcar in icten di dcar in twannant jar temgharin n redcur.

War ssinegh ma s tidet tugha tedja tamzva ura ma s tidet oad ad tedwer?

Maca qa waxxa war tedji tamzva amec tt id mrint temgharin a aqa tedja amec nnedvni u maci d ict n tamzva wapa attvasv d tamzviwin i yedjan mani mma.