Tanfust taqudvadvt:

Azuyyet

Yura t: Said BELGHARBI

Jar ad inigh d war qqaregh, jar mri djigh d war tirigh, din tidet inu tweddar, arzugh x ixef inu jar awem, ufigh kenniw, ixef inu war tufigh, turem ayi tudart jar awem, tejja yi ad kenniw oiffegh ad kenniw siggwjegh x min day i n radas, dehyegh ixef inu i tyennurin n raggûj yemsarwasen di ttasio nni din jar tidet d ixarriqen, ixef inu yudes ayi radas n tayri n tyemmat immis aseymi d iruren d amaynu ghar tudart.

Ura d nnec ruregh d d amaynu, marra inu d amaynu, maca ur inu d amenzu, ur inu tazzren day s idammen nwem, urawen nwem xwan i tsvudv day sen mghar wadvu…

Ip! wenni d nnec i tugha yedjan, rexu war djigh, tennghim ayi, teddarem kenniw, tendvrem ayi, tessifem ayi d taneghda x inuda n wudemawen nwem i yezuyyet uraji, udemawen di tennugh tidet nnegh, tezdegh din jar ixemrawen n wussan, tennugh din d taghennant i useqsi n ad irigh d war djigh di tudart i kenniw yedjuzen mammec djuzegh ixef inu ixef arezzugh…