Tanfust taqudvadvt:

Tsima yeccin udem i dcar

Yura t: Said Belgharbi

Min yezzvu jeddi n tseklutin uryent id ad azghent, tissrawent icten awarni tenneghnit, war itghimi walu ad qdvant marra, ad yedwer reorasi d amessuci.

Mayemmi tmettant tseklutin n dcar, ma d aman iyuzghen deg wur n ucar, nigh d taryazt i yuzvghen deg wurawen n imezdagh?

Ajemmadvin i tudart n zic, tugha yedja dcar d wenni d reowetc n imezdagh, mara yemmut ad mten ura d nitni, rexu upu! dcar yemmut qqimen nitni ddaren am mmuten.

Jeddi tugha icekwi d ijj n ureqquzv yemghar zi tecnift, ad t yegg di rqeb uca ad yezvwa ghar reorasvi ad yemmucru s rghudan izeryen aqemmum s tnenni jar tefray n wurtan, ad yeccur aoeddis uca a d yari tsawent s tyawant ghar taddart, di ltva ya mri yeddar jeddi uca yepwa ghar reorasi muhar ma ad yari senni yejjiwin, ad t tecc tfeqqeht din ad t sseghri amen t tesseghri tzawa ur n tseklutin, tssizegh ura d urawen n imezdagh.

Rexxu mani s mma tarrid s rxezrat nnec ad ac d terqa tsima, ura d tsima tessizegh rxezrat nnegh, dcar yudef di tsima, tsima tudef d aynegh, wenni ghar issitmen ad icem i cwayt n ccum ucar zi tugha n thennac udmawen n tudrin nnegh ad ti d terqa taqsuhi n tsima.

Tsima… tsima… tecca azvri i dcar, tmurud x rehyudv am tkecca n tzura, tnetti amezruy jar tittvawin nnegh, tneqq s taqsuhi nnes ura d ttaycit nnegh, tesseqseh ura d zmann akid s, zmann n yidva ura d netta yarwi s tsima.

Tsima tegga am tmessi, tsvarredv azvri i tcuni, mri oad yeddar jeddi iri war i tejji tsima ad tezvwa ghar dcar. i wcar nnegh mani ghar i twaxreq mara tsuged tsima ad thewwes tifras nnegh? car nnegh akid negh yiri, zzay s i ghar n hennec udmawen n tudart nnegh, day s i ghar n twaxemmer axmi nni ghar d anegh tacar raxart.

Ura d imedvran nnegh tumsiten tsima, timedvrin aymaren nsent d tsima, tacigh aked jeddi deg wendver nnes yetru d inexsisen, yenduqma, ighufa din s taqsuhi n tsima, i tass d ghar i di tarja, i tseqsa yi x wartan mani s d tugha d i tekkes timuzriyin, qqaregh as:

-Ttves a jeddi war kessi bu s imunas, tsima war tejji bu wartan ura d tihwicin, tecca dcar, tessizegh amezruy nnec, tweddar it a jeddi.

Itkehhar s tizmin n ineghmisen inu, uca ad yedwer s udiqqi ghar yidves nnes yudjghen.