Tinfas

Asvwadv yebuyebhen!

Yura t: Muhemmed ZAPID

Immarni d ijjen n udellis d amaynu ghar tedellist Tamazight, id yessufegh amyaru d uzrawi Saoid Belgharbi.

Adellis a yesmunan ict n tqebbitv n tinfas tiqudvadvin i d yusin adu isem “Asvwadv yebuyebhen“. U zi min xaf sent tenna tazrawit Maysa Racida, i yuran tamsizwarut i wdellis a: «usint id tenfas a xsent ad inint ca n ixarrisven, ca n tinawin, ca n taycitin (…) Usint id ad inint min yedjan, ad inint min yennufaren, ad siwdvent min yegwaren ghar wawadv (…) Tinfas a d ijj n usijji yefsus x wattvas n imarrisen, imarrisen a itwara umatnegh Saoid xsen ad twarin u xsen ad ssemren ixfawen nsen».

U zi imarrisen id yusin di tinfas a i yura Saoid Belgharbi, ntaf marra min yeqnen ghar tamurt, tayri, tameggit, tasghart, tamghart, tirelli… d wattvasv n min iqnen ghar tudart i yteddar aydud Amazigh, u zzay s aghezdisv n umezruy: «Di ltva di tugha ca n yewdan ssermaden i yessitsen ahrad s ccicwar ghar tisitin n waregh, tugha Trayetmas jar tisedjya n idurar, rebraqi dduquzven ghar uzedjif nnes, tessahret s dqer n rmunet i tarbu x weorur nnes d reowetc i yemjahden izedghen deg zeghran n dcar, hettvan car n Tamezgha huma war t ticaren ihewwasen».

Tinfas a d ijjen usvurif imghar itegg it amyaru Saoid Belgharbi ar warni attvasv n wussan i yeodan xef tira s Tamazight I ytegg Saoid deg iyyar n usefru, d ungal, d tinfas.

U zi tinfas a tina I d yusin di wdellis a amaynu ntaf: ahrudji, waf, isekraf n razv, aseqsi yujaren ixef nnes, tasarrawt n unaruz, taffa n imunas…

U mara nedwer d ghar wawar n Saoid I d yusin di tinfas a, ntaf yeqqar:

«Ticri inu ghar wesvwadv nni zi mermi d nettat traja yi akid s munegh, huma ad as secnegh amsvebdvi nni din jar anegh, maca mac gha d ggegh nec d ameodur n isvuraf, minzi ttugh ideren di radjagh n tarja inu, umi ghar sen gha d dewregh ufigh gwaren zzay sen yenneghnit».