Tawiza

Key ayennagh,
Ad nmun,
Iwa munagh.
Mun yidi,
Xirak ad teggwded;
Pat amm keyyin
Amm nekkin.
I ma k yaghen
Trid ad tinid kra.
Mas nedda?
Mas nra ad neddu?
Ddaw ubrid
Nnig ubrid
Matta ubrid?
Tghald is ur idd nekk aya;
Mek ur trid tfested.
Tfested.
Ghas tfested.
Numezv abrid,
Gher teghmert,
N wukus n imkuraren:
Ad dd nger tiqqad,
I gar ikey.
Neskectu cwiy,
Nerzvem timukrisin,
Ad gh yesmunndven.
Ad d neggwez
Seg wayyur,
G nn nsires tiwirga.
Qan nn naf iregzen,
Tiwetmin,
Awd ticirratin.
Iwa awi d afus,
Pakkak amezv digi,
Mar ad ur tderd.
Asidd idrus;
Iwa slutef,
Gher idmaren nnek
Ad ur terwel tasa .
Tgerd adad nnek,
Nnil imi nnek.
Akwersi inn
Ighey ad ig winnek,
Negh win yiwen
Seg infalen yadven.
Magh is ur ad k t nnigh,
Nnigh ak yad:
Pat nneflen.
Mar ad ur idsen,
Yakey awdyan
Sbibben ak keyy
Tunnefla.
Iwa tessend.
Mmgherd ghef tadawt.
Ttu tasmunt nnek
Negh tamettut nnek.
Ad ur ttedvsva.
Fast pan ayt udghar
Ugin tamusiqt.
Qqen allen nnek.
Qqen imi nnek.
Qqen tiserrawin nnek.
Rzvem i ifassen nnek.
Rzvem i idvarren nnek.
Rzvem i twengimt nnek.
Sserxu tafekka;
Nnek s imikk imikk
Negh s kigan kigan.
Amezv taweryitt i twargit;
Mun d ubrid amellal
Ittyaffren iseggûsen
Agensu nnek.
Mun d ubrid ungal
Ittyaffren iseggûsen
Agensu nnek.
Mun d ubrid aferqac
Ittyaffren iseggûsen
Agensu nnek.
Mun d ubrid war ikli
Ittyaffren iseggûsen
Agensu nnek.
Pak s uhezzudv
Ma k yaghen?
Tegrit issen;
Ighef nnek ayennagh.
Ad ur k issiwid.
Ad ur t tessiwidved.
Pat imk nnagh
Ayd tgid.
Asahla g ti tukzed!
Asahla g ki yukez!
Matta keyyin?
Trid iselsa?
Imagh tennfeld?
Mayd trid iselsa?
Ma k ran iselsa?
Mani wenna k issawdven?
Ghas keyy ayd illan...
Ur k izvri awdyan
Izvir titts nnek;
Mami tghiyd.
Matta keyy?
Taghuld d asemnu.
Ioma lemri
Keyy ayd t ioman?
Midd netta ayd ioman
Ighf nnes?
Ma k yaghen?
Skunzer wann.
Nnagh d wa.
Ini ayen trid.
g ayen trid.
Maka dat uyennagh...
Azven afus nnek,
Ayeffas negh azelmadv,
Azelmadv negh ayeffas,
Unna ak iwepnen.
Ghas ad ig winnek.
Setti t i tfekka nnek;
Izir axs ur innegza kra,
Izir axs ur tennegrat i kra.
Key ayennagh?
Mek trid tkemzed,
Negh taserrkemed .
Nekk da kemmzegh,
Ipi nekk lligh.
Nekk lligh,
Ipi nekk...
Sikk afus nnek
I adghar nna trid.
Key ayennagh.
Ighef nnek ayennagh.
Sew asekkif nnek
Meqqar degs inzaden.
Axs ur ak
Ikkis udvbib asekkif?
Azven yat tjebbant
I ixeddamen,
Pat da ten ineqqa ighef,
Ku tadeggwat.
Tazend s tisdawit
Ad d awin tighenjiw.
Unna yran aledjig
Ad yisin ighetran nnes.
S tit tsawaled?
Ad idk munegh;
Magh mad i trid?
Pan awd nekkin,
Gigh amm keyyin.
Righ ad allegh dsegh .
Righ ad dsegh allegh.
Kra n tikkal
Meqqtegh tumert.
Mek ts d kkigh.
Chal n tikkal
Ayd ghalegh is da tteddugh ,
Amzvegh afus,
Asag d fafagh
Taqqen agh n tazzla;
Mar ad nawedv.
Iwa mun yidi
Ad nawedv agensu nnegh.
Ayen nufa pat winnegh.
Xira k ad teggwded.
Amm key amm nekk.
Iwa mayd tannayed?
Tighmert n tiqqad teqqmer
Tenyama kigan
Anetta drugh tucckid,
Inger igudir ns.
Axs ur trid
Awd keyy
Ad tessummed tirrgin?
Idda wa yerwel
Ighra yas d wann
Yufa ka n umettin.
Axs ur idd winnek?
Magh ur temmut?
Iwa ddu ghas key
Sucku nekkin
Qad ddugh xs nekk.
Taghufi ad ts kksegh
I yeghf inu.
Anerghi ad t id sikkegh
I yeghf inu.
Ma k yaghen digh
Da teshencird s tlelli?
Trurid iselsa?
Kemz, slutef, nsed
Nekk da kemmzegh,
Ipi nek lligh...
Illa ma k itfaren kra
Tssend dghi mis neddva?
Ku yamdan fnan
Suqrat amdvan
Ipi suqrat fnan...
Numzv abrid
Ad neffegh tighmert,
N tiqqad.
Ad nmeyyek
Ghef yinfalen
Mis ddan?
Ma k igan?
Pun medden,
Gran ak itnan.
«Asahla g -d yaghul»
Tezri tten
Ur telli tugdut,
Tar... tar...
Ma k yaghen tezmummit?
Aqqmu nnk ayennagh
Tughmas nnk ayennagh
Iferhed
Midd tferhed
Ghalegh is tferhed
Netta zzigh tferhed.
Iwa ddu,
Myagh idsen ifassen;
Pan winu
Tamudint tesmar
Nufa asafar
Win yettnadin
Ad yaf.
Nekkin aya?
Xiri ad ggwadegh
S tit sawalegh?
Iwa mun yidi
Munegh didk
Munagh.
Ini yagh ayen nra
G agh ayen nra
Ffeghagh takufda
Ur tukit s uzaglu?
Ur tukiyt s tguta
Tippistimulujin?
Tsuld n g wayyur
Key da ttisellid
Ipi key tellid
Ipi key...
Zveyyer tafekka nnek
S imiqq imiqq
Gzey abrid nnek
Tamezv t s dat...
(Nurdin BAWEDRA (Goulmima-Maroc) Ghust, 1994)