War marrtegh ca xef tarezzut n tewwart n uxxam nnegh, mani i ddaregh ussan d iseggussa nni i yiwi wannay zzay i; axmi dja nnyin xef ca n tgharrabut temraywa xef tisfya n yeghzar issarewyen aman nnes, am ighzar n twangimt di tmun ridaret inu am ifetwizen mzuzzaren ssa d ssa.

Wami smuqqlegh di tewwart, uffigh tt x wudem nnes n zic, maca uylen xef tfelwin nnes sin n waccawen, oini n ca n tgheydet n wezghar igmar itt ca n ijj zeg idrur n tghermet!.

Deg akud nni, temhizwar; temsazzal ridaret deg ugensu inu, arezzugh ad tvfegh timewwa n ifiran nsent, huma ad snegh min itemsaren, war uffigh deg tebridt inu mghar timeghrudvin n twalfin ca yudef di ca.. mxumblent di twangimt inu, temxetwayent dayi; ad tinid ggigh am wenni innufsel zeg ixf nnes.

Idvennadv nni iftuttez zzat inu, zi txuxxet n wussan inu xezzaregh d ghar iwdan d izvwan ghar tewwart, tesligh i ca n ighuyyan tmuttuyen zi ssa ghar da; war ugzugh i min yedjan; axmi nni tarjigh!!..

Ass a war yarwis ca deg ussan n teghremt. war yedji ca n ucar, mammec i das qqaren da; axmi nni d itudum ujenna s ucar xef temdint a umi yessraw wudem s ixeyyiqen; yennughen di tattut zeg ami t isekka ijj n ugelid zi lwacun n LQAJAR**, oini ad yiri umi d tisala tughit tyarzawt!!..

Axmi d iccat wenzvar itawi d akid s tioejjuja n icaren, ttafed tamdint tegga am ca n tenda n ubaryudv...

Cwayt s cwayt, tssnegh aqqayi di radjagh n tidet inu; beddegh zzat i tewwart nnegh taqburt, maca war ssinegh mammec yegga udwar inu ghar manis i d usigh, mara oad ad dewregh nican?!...

Rajigh dinni alami twarigh ijj n uwessar yeffegh d zi tewwart nni, ismuqqul d dayi axmi nni dayi yessen wapli, sseqsigh t:

- Itoini tessned ameddur n tudart inu?

- Upu!!..

- D nnec iyeddaren attvas n iseggusa awarni tewwart a taqburt n wexxam nnegh amenzu!

- Upu!!.. oini war ghar k bu tidet, min snegh xef imzdagh n iseggusa nni, tugha war ghar sen bu tarrawet!...

- I rexxu izdegh hedd deg uxxam nni??

- Upu!.. Axxam a itwarder zi mermi, yeqqim d agujil n tzeddight!.

Issenta wenzvar itudum d, yargeb uwssar nni xef rxezrat inu, d nnec tadsegh s isvuraf inu ghar tewwart nni, xeyyqen izumal inu, war ssinegh mani dayi ghar yessiwedv yimal di temdint a, ixf inu yeqqen ghar ij n wakud d ij n uraq war djin ca inu, maca ucigh ira dja ddaregh da ict n tudart deghya tezri di zic inu...

Yeksi ayi weswadv ghar waman n wenzvar, d mani tmudjughen, axmi nni carrzen tammurt s tisyar nsen; tadfen zi tizza deg wur n ucar, tmudven dinni taryiwin d tinedwin, tacigh axmi ura d nnec ffudegh tamurt inu am n teffuden waman nni...

Smuqlegh di tnecnacin n wenzvar, tefruruyent d aman tissiqen xef tisi n ucar, udem n tmeddit yeswa s tuffet, tayyut tessdel s wafliwen nnes xef temdint, oini d tayyut i d twarigh!.. Teddu d am ixf inu i ttugh di ca n uraq; nigh nnufesregh zzay s di ca n ukud nniden!!...

Yuccar yi mezri di xsegh ad snegh min dinni yeffarn awarni tewwart nni taqburt!.

Deg akud nni tugha war twirigh mghar igudar n tallest bedden am ibuda di teghremt, maca ucigh iked uyenni is xarsvayi s wawal n uselway n tawuri inu, yeqqar ayi:

- Duktur! Tessned ira tawuri nnegh teffar xef marra timesna n midden?!..

- Wap ssnegh!!... di manawya war kessi s imunas!.

- Arr taynit!!.. D ccek i yedjan d midden jar anegh.. ghar k ad yeffegh ca n ughmis ghar mani?...

- Wap!.. ugzugh i marra min d texsed ad tinid!!.

- Mara war teggid s wawal inu ad nili marra itnegh deg umizi (danger)...

Zzat ma ad ddugh ghar da, ssensegh deg ict n texxamt tiggwej cwayt xef temdint!.. War ttvisvegh ca tameddit nni… Di twangimt inu tifraz n ict n tarbat azyen nnes yeoouryen, uryent id akid i ticarraw... ggwdegh ad ayi dinni yemsar ca war yedji amenni!!...

Ghar tuffut, arsigh tcamir inu amensvab (officiel) n tawuri, weddarent ayi tisira ticemlalin, arzugh xaf sent deg marra tighmarin n uxxam n usensu (hôtel); war tent uffigh ca.. ffarent di ca n mani, war ssinegh min tent isweddaren?!...

Wami d yusa ugraw n inemmazulen (travailleurs) n tawuri nnegh, nedpen ayi ghar sen s idvaren hfan, uffsen ayi s taqsuhi deg ict n tumubil nsen...

Aneddap n tmubil nni d atejjal, ixezzar s ughil ghar zzat n webrid di yeggur, waxxa amenni war xeyqegh ca xef min dayi imsaren amenni, war ssinegh mechal d yiwi umuddu nnegh n usrag (heure); ura d manis d nusa; ula d mani n teddu; minzi dja tvsvegh zeg wami zzay negh d teffegh tumubil, nigh tugha sniomiregh ira yiwi yi unudem?!!...

War d karregh zeg idvesv ad lami tesligh i ca n ughewwegh n ca n yewdan d yusin ad ssemgharen zeg tughdatt (mission) nnegh.

Sseqsigh ixf inu: “Mayemmi war dayi arrin taynit, axmi war dinni djigh jar asen!?..”.

Deg ummas n ijj n ubarraz yiriw s wattvas, qqimen marra idsen mghar nec ibedden, oini mmexsen ayi; war xsen ad irigh zzay sen; war dayi d iwyen ula d lkursi u xef ghar qqimegh am nitni!...

Deg umezwaru tugha ccemcimen (chuchoter) jar asen, s iwalen mxumblen; qesshen i tagzut, maca ssnegh ira ssawalen xef min yegga ij n innghi (criminel) zzay sen, aqqet iqqim jar asen dinni…

Ssentan temsawalen s zpir, d marra smuqqulen dayi, imwlafen (Photographes) kessin ayi tiwalfin n ighezdvisa inu marra, d nnec beddegh deg uraq inu am usebdad (statue) war tmuttuyegh war tarjijigh, arbugh advran n ridaret di timektit (mémoire) inu.

War xeyqegh ca deg ugensu inu, n bedd marra zzat i tafekka (corps) n ict n tharmuct, nxezzar ghar arrimet nnes yudvnen, war nuffi asafar n ugenfi nnes. Ittar zzayi uselway n tughdatt (mission) ad xaf s kwtegh; waxxa marra idsen ssnen ira waxxa tekwta (chirurgie) war tgenfi!!...

Ggigh s wawal n uselway inu di tawuri, waxxa snegh amegaru mamc d ghar yiri!!.

Yiwi ayi uyenni, dvwigh s twangimt inu ghar mani, ad lami dayi d issekkar uselway, ittar zzay i ad xaf s d gharegh ijj n aneqqis (rapport); yura day s:

“Taharmuct a yemmuten zzat nnegh; tugha ghar s irem iqqseh, dja war ghars bu tixuxxutin manis d ghar teffegh tidi, war das uffigh bu ugenfi i rattvan nnes; d suyenni deghya temmut!..”

Umi saligh tighuri inu i tfart nni, i ked cwayt n usrag (heure) tesrigh i uselway inu itzawar dayi s imenghan:

- Axmi war ghar k tmijja zi ghar tessiwled am iwetman, ini d min d teghrid amenni s ighuyyan huma ad nessefled marra ghar k!!...

Ghrigh t itwarat nnidven s ighuyyan huma ad ayi sfelden; maca walu war arrin taynit i wawal inu!.

Swizdven d ghari kuzv (4) n imedukal n uselway; ad ayi ksen tcamir inu, ad xzaren ma nican d awtem idjigh; nzewdvegh; nnigh asen:

- Upu!.. war d tteksem ca…

Srigh i uselway yeqqar ayi:

- Min yughin awal nnec i teffegh d d azdad ameni… siwel s tmijja n yargazen nigh ad..?!.

Twarat a ghrigh d xaf sen s tazla… s tigwdi, war srigh ula ij n wawal nnigh t, maca twaligh agraw nni marra sfarninen s tumart (la joie), ssfelden ghar min d asen qqaregh xef tanfust n umeddur n ij n innghi (criminel) yegga min yegga!!!...

Wami saligh tighuri inu, twaligh marra wi dinni dewlen zzat inu am ibeqqidven d ibarkanen n tmedji, umi d usigh ghar teghremt nni i ttugh mechal uya, nigh dinni wi day i yejjin ad noarqegh ghar ragwaj nnes!!..

Rexxu nec weddaregh deg ict n temdint war day s ssinegh walu, mghar tawwart tamenzult n wexxam nnegh, maca ma d ttidet snegh tawwart nni; ma d ttidet aqqa yi di tudart huma ad ssnegh min dinni yedjan awarni nnes?!!..

Jar tubbarcent n tallasin tesrigh i uyenni itragha yi d:

(Cek tarezzud xef izvewran n tayyut, akud i xef tseqsid yezri zi mermi... min d twarid amenni d turjatin n taghzut (fantaisie)… oad ad tmarrted s tarezzut di min war yedjin?!...).

* d amyaru d AKURDI

**LQAJAR: d ij n waydud zi tqebbal n Turkman d Lfurs, zedghen di tmurt n Iran deg akud n uhewwas Aoutmani. (Yarnu t umsuqqel, Ajouté par le traducteur).