tawaghit n tmmetrit

Yaru t: Belaid RAMI AZWAW (ANFA)

Rix ad inix..

Ksudex ad tennit..

Akud ira asekkir, mad tessugert ad tinnit..!

Rix ad ayellex zeg SIWA ar TICIT,

Ad zuzzerx g uberid ametta am tirsit..!

Rix ad fessax..

Macc a tasa ur iy tujjit,

Taguri llis qqelx, TWWA, maxx ur tt tennit?

Tega tadbakt abbanekik, tega tazzit,

Tega tatawt asewwad g ufus, is sul tekwtit?!

Rix ad irix..

Macc a annaz ur iy terit..

Ayyur ig d ighli, mad kem sul yaddern a titrit?!

Iruf wakal, s uheni yiwi tighit,

Ittekref ils, ittekwrs izeri, tennfel tibbit,

Meradd ur d yan mennaw, ikun a yul texsit,

Iqqan d a addur amagur ad tessuzzeft tesgenzit..!

Rix ad susemx..

Macc alangaw ur iy issusem,

Icca, iswa, igusem,

I g rad izelg adis isennsetm,

Irwi usays s indudduyn, iggudem,

Ider ubakeccu, ur k sul neskir a- yudem..!

Rix ad inix..

Ksudex ad tennit…

Tin wakuc ad tegit a TANIRT,

Bab n SIRTA d MERIRT,

Ar as tebndaqt arid, ar ttirirt..

Igenna n tgeldit nes ag tesayjat, ig am tasrirt,

Ar kem nettemmtra nekwni s izeri g iggi n twrirt,

Ar kem nettmmetra nekwni s ussirem ddaw twrirt..!