Tawiza

zzat i ma ad temghar taseklut nni ira yezzvu rmexzen jar webrid ameqran n ttvumubin d tawwart n taddart nnegh tamezvyant, ira mikat deg ujenna nnegh ttvawent am mammec xafsent tfarfarent amacnaw tifridjas nigh oad cwayt ugar.
ira ghar sent tirrelli war yedji ghar tirelli... yeffus nsent d zvermedv nsent, tamurt nsent, ajenna nsent. ira teggent mammec xsent, maca ruxa upu zeg wami temghar tamcunt nni n tseklut mgharent id akides attvas n tcudvadv i yarecmen s tisar n ayt bab ines, ruxa tudart di tudart nnegh tebbarwi ag raxart, s tesbbanyut zemmeght jar rxezrat inu d ijjen n rqpwa s ughi (cafe con leche).
ra d mikat nni ira i tendven ag ussan nnegh ruxa war qqiment tendvent, dewrent d tinehbas jar wackuden n tseklut, am mammec ntwahebbes neccin deg ixf nnegh s yixf nnidven, zi twarjet n wexxam inu idewren d araq inu, war twirigh ghar wadvu itqepered "mikat" zi raggwaj d radas ghar tseklut war yiggwijen x tittvawin inu. maca xmini tnedder tadjest, itghima mghar wesqar d rxezrat inu temsarawent ghar temcunt nni n tseklut, taseklut s yixf ines trah ttemghir jar tittvawin inu, tetwarigh t amacnaw ca n umettin iteffeghd zeg under ines, tuzegh temsizegh qqimen dayes ghar yexsan, tarni ddarreo tubbarcent nni n "mikat", am mammec bbarcnen ussan inu nec.
di tmurt a n...!!!
zzat i ma ttessij tfuct n zic, ssajjant id tabriwin ines ihedqen s tiwarghi n temrer n iman ines. zzat i ma d yessij mimun abupari sadu i woiccu ines iseqfen s "mikat" d iqartvunen i yuffen s nda n tmedditi
yuta usvemmidv, tsajjant id issis n jjwan amacnaw tighrarin tefghent id. icten awarni tenneghnit, tniyrawent teggent ijjen teqwart jar asent.
zzat i tewwart n taddart nnegh, tirarent cway zi meqen tvuttvuc, cway zi (juleq)... nigh tidarent cway zi tqessist n bu-seboa n ttverba:
takedduft tegga urar
qaqra tegga yatay
tegga nneonneo yudrus
burxes iqsa s rhar
ddat ines tusus
bu seboa n ttverba
war yeqbir rmessus
ijbedd rkabus...
zi ssa war tkemmirent i tqessist nsent d mimun abupari zi ssa war d itiwedv wawar ines gharsent, ad tafid kur icten man abrid i tettvef, war itghimi deffar nsent ghar toejjajt d wawar n tawra:
tamimunt: arwer... arwer...
leoziza: wap aqqadin, arwer, arwer...
tamimunt: tettud tacdat inem a tamcunt
leoziza: idja tiri ra d muqebbuz tender tisira ines.
tsemma: "rbaz yuta deg ifidjusen", amya i t yenna wenni i t yennan.
mimun abupari xminni war itif min gha yec itettvef iqzinen imezvyanen igharres asen itet iten, maca xmini war itif min umi i ghad yghars, igharres i wqemum ines s tghuyyit iqedvoen, iggwar itoiyyedv isghuyyu itrakkwar, itoayar marra min yedjan sennej i tmurt: "a wlad leqhab a tarwa n walu, a ywasriwen, a tarwa n bupeyyuf" war itesghid war itzyenfi ar d ghad yawedv ttvarf i tseklut, war ifessi i reqfar n ssarwar ines ar d ghad yawedv sadu wackuden n tseklut, war itbeccic ar d ghad yawedv ghar tiyaret n tseklut i yejjiwenen fad zeg wass n trarit ines, maca s tidet i mri war yedji d ibeccicen n mimun abupari, iri tufid taseklut i izzvu rmexzen tuzegh zi mermi...!!!
(kassita:13/12/2003, wajd_rif@hotmail.com)