Antun n tirra

Yura t: Mimun AMSBRID (Biljik)

"La poésie est indispensable, mais je ne sais pas à quoi" (Jean Cocteau)

 Yetwanna yi: ur ttarrid

X wazvri d tmgharin,

X tayri,

Xf iyezzimen nnec

D tghufawin.

X uwddvar

D imettvawen.

X tirra nnec i farghen,

X ybriden war itiwdven,

X ticri di tallest,

X wttvu n ifadden.

Xf inuraz yuyren,

X wur yedjuzen…

Xafek cek:

X wi tedjid?

Mays d tusid?

Mani teddud?

May tarezzud?

Mani tedjid?…

Nnigh as: arzu xafi deg idvffisen n tirra,

Jar wawaren,

Jar useghdi d usiwel,

Deg ineggifen n yzvri,

Di min yessghad,

D min itini.

Iman, tayri, azvri_

D nitni d antun n yzri.

Antun ur yetghimi imun!:

Yetwagw deg warcti,

Ifessi days,

Iticca s tujjut nnes;

Zzay s i ytinbi,

Xafs i yetwacc.