Izran iqudvadven

Yura ten: Mimun

Amsbrid (Biljika)

«wa uùtitu bil hurufi fanakahtupu» (Ibn Oarabi, Alfutùhàat almakkiyyap)

tareymamt

Teqqur treymamt x imareddiwen nnes,

deg wmardix n tisi tbarkikkidven, tghufan…

wdva d a yanzvar, wdva d!

ccer xafsen taregmamt;

ad azzren waman nnes,

arrimet ad tefses,

ad fethen imareddiwen,

ad iraren jarasen,

ad ccen, ad swen,

ad ddaren ussan nsen!

Yecca yi wur inu

Yecca yi wur inu…

x tzvayart n usammar,

tehbedv x izekkunen.

taqqayin bbarcnent,

iwdvent id, ccurent;

tayyut d arudv nsent,

jar wafriwen sferninent.

Ayezzim

Ad nndvegh uzzar inu

deg yezzimen nwem,

war ten tejjigh ad ggenfan,

war kenniw tejjigh ad tettvsem!

Aman n wawaren

Imri war djin d awaren id ay ikessin,

iri qqimegh di tisi,

iri mmutegh din, arcigh.

ssarayen ay d ghar nnej,

arezzmen ay ijenwan,

twarigh zzaysen ghar aggûj,

war tghimigh d adverghar.

Ameghwan/llwiz

D ayezzim n wjghur,

id itejjan ameghwan !

zegw yzzimen n umedyaz

i d tekken yezran !

Idrizen n yexf

Tûrwent ay d tirra inu,

tawyent ay d ghar tudart:

zi may tugha yi war tarigh, nnan xafi war djigh.

marra min nnigh, amexmi war t’ nnigh!

marra min ddaregh, marra min ggigh,

iwyen t’ yinni yuran, jjin ayi d uzzvif.

tacaren ayi s wass, nec wardji min gha yinigh!

wtigh ixf inu nnit: wen yewtin ixf nnes war yetru!

d nec i yurran ixf inu di tirra nsen;

tasyurit nnes harwentent, jjin ayi!

iwyenten t, iwyen ayi, u s nnej tuffen xafi!

maca idvnnat d idvnnat u nec war qqimegh d wenni!

ad smunegh iman inu,

ad t’arcmegh di tirra;

ad qqiment awarn ayi d idrizen ssawaren;

war tejjint wi gha yinin nec war ssa d kkigh;

nigh nec war djigh d nec, nigh nec d wennidven!

Afsay

wi d am yennan nec d «aryaz»?!

nec d acar, nec d aman;

nec d tazwut jar wûrtan;

d tayyut n tuffutin,

d aseghdi n ijenwan.

d ansa i wmsawadv,

n tiwecca d idvnnat;

n tfawt aked tadjest,

n useghdi aked wawar.

war xafi ûrezzu munegh:

war d ay ttifed!

war d ay smuna: ad ayi tenghed!

fsyegh di tudart, jjay days fsyegh!

(Mimun Amsbrid: m_amsbrid@yahoo.fr)