Xnifra nnegh(3) 

Yura t:  Bajji Saoid (Xnifra)

Tamazirt n Izayan

Teya tmazirt n izayan ict g tel Mughrib ixan s idurar d ticcaw nnes yed Mukzazn, g llan kigan n wansiwen n kessa s umata ffir n Djbel “Bamusa” g nettafa “Tazrpunt, Talmut umzil, isarfan”. Ur ntettu ites i caliwen issakvayen llat aghul ad yin ansiwen n kessa n kew Taqbilt illan g wcal a.

Bela ma nettu ites yadv wansiwen am “Lutva ujdir, Agelmam, Tazirart, Tabaghurt, Talasa…” gher tenjaoen imaksawen zeg kew Taqbilt g taqbilin izayan s umata g ineggura n lmectut d imezwura n tifsa, acku leori ya llat ioraqen s utfel g lmectut ar sufughen igdjiyen d tuga g tefsa, ar zedghan midden yits n tefrawin s ixxamen.

Ibdva wasif n Mrbio sin wansiwen: ansa ighemsan s utfel d usemmidv g lmectut iy lhuren imezdagh s waman d wadvu asmmadv g tefsa  d unebdu d wansa irghan itezoen g unebdu s waman idrusen d tafukt isghusan, d lmectut s ughuda n uzeddugh. Ig wasif n Mrbio idj g isaffen ixatar zeg sswan izayan tiwaliwin nsen, s umata wis izeddghen idis nnes. Llad itazzla wasif a zeg titv nnes idder illan g wacal n Ayt Sgugu, ioerqen s 10 km zeg temdint xef idis afasi, ar dikes d uttvun ites isaffen imezvyan zeg maggan tanila, inzegh wasif tizizwi g idisan nnes s umata g tefsa uzinin. Tamazirt izayan tetwassen s “z” isaysen: Azaghar, Mrbio n Djbel izayan.

Azagahr: Tamazirt d yumzen zeg idis anafella, zeg uzvemadv ar idis anadda n Xnifra (zeg Lbûrj ar Lfidja): tazvrut muxbu, Talmektrat, Ment wardvan, Sidi Buoabbad, Tazerpunt, Taddart, Isarfan, Djbel Buwazzal, Djbel Bamusa d Zeyar djbel izayan.

Djbel illan g idis afasi I Mrbio yumzven zeg udrar n Buhayati ar bugdjiy d ujdir d tekkad xef udaxsal d uqellal.

Mrbio: Yumezv mag umezv wasif zeg titv illan g idis anafella n Ayt Bumzugh ar idis anadda n Xnifra. S umata idis n ifidja d Lepri, mani ged ibdva wasif n “Seru”.