Ungal:

Anebdu 

2 - Idv azamur (la nuit sacrée)

Itari dt: Lmeddan Oumar Numid (Tvanja)

Yemsagar Masin deg wbrid i ytawyen ghar temzida n Dpar aked Buyreyzazen itari d zeg udcir n Imuruden. Ijj n uhenjir yemghar d azeyrar, yegdvar, aghembub nnes yiriw iqqurar am tziri, aqemmum  rebda yarzvem, ireyzazen tnessasen d xef wancuc n wadday, tudumen as d x idmaren, ssuffan as arrudv axartvitv iqqarqcen s yinjan. Netta d aberpidv d aminun, d aqubbani. Irur d amenni d agmawi (naturel). Maca, s umengal, ghar ugensu nnes yennuffar din ijj n utarras yecna iqad ghar s ijj  n wur yemghar, itexs marra yiwdan; rebda aqa dt isfarnin i yaryazen, isfarnin i temgharin… Wenni i ked gh ad yemsagar ad dt yesseqsa x yemma s d baba s d yaytma s d yesma s.

Umi i dt id yiwedv Masin, u netta yeggûr itmudjugh am cfar, iragha dt id:

«Massin nnegh!, a Massin nnegh! Raja yi a wma raja yi!».

Ibedd ad dt iraja, deg wakud d ijj yarra xaf s:

«Waxxa a tawmat aqqa yi trajigh cek, maca tag axmi tefsused!».

«Waxxa!».

«Mani teggûred? Ma ghar temzida nigh ghar Kebdani?».

«Ghûregh ghar Kebdani!»

«Maca necc ggûregh ghar temzida wapa!»

«Waxxa a wma ad nmun ar tamzida wapa!»

Issigh as fus i Massin, issigh as wa fus, uca issemda (continuer) Buyreyzazen awar nnes:

«Mammec dedjid a Massin? I yemma c mammec tedja?»

Inna s Massin:

«Marra aqa negh panet, netqada arebbi!».

Imun akid s s ughir. Tugha dt yeggûr ad yensver (vomir). Imsafadv akid s ghar temzida, yedji dt ad idvfar abrid nnes ghar Kebdani, netta yezri x uzvermadv huma ad yarzu x imeddukar nnes. Maca war yufi ura d ijjen ghar temzida. Zi ssin yemmutti ghar tsirt i dt yudsen s ca n imitrawen. Umi yargeb x teghmart nnes yufa din sin n imeddukar nnes. Yur anect n Massin di tiddi d tasut (âge),  ghar s ca n 16 n iseggusa, acewwaf nnes d abarcan, tittvawin amenni. Tiddi d tanelmast, war yedji d aqudvadv ura d azirar. Izri d amezvyan xaf sen, d aqudvadv xaf sen, acewwaf nnes d awragh, tittvawin d tizeyzawin.

Mparraden xef tcamma d min tegga tsedvma n Lmughrib di “Mexico” aked usulef (à l'occasion) n ufensas n umadval (la coupe du monde) n tcamma n udvar n 1986  umi tarna tenni n Burdqiz s kradv ghar yijjen. Zi ssin d usawen msawaren x ifilmawen s yinni n Lpind d yinni n karati. Amenni qqimen iij ikessi, ijj isrusa ar ami i d yusa Sifaw mmi s n Muh zi Kebdani. Netta yujar Massin s yijj n useggûs, izzuggar xaf s, acewwaf  ibbarcen, yudrus.

Umi d ghar sen yiwedv, yarzva sen aparred nsen umi d iragha i Massin:

«Yallep a Massin ad negg ict n tsarit aked webrid itawyen ghar wedcir n Ibuzegguten. Xminni gh ad nawedv ghar taddart n Karamas, uca ad nezri yabrid ssin ghar wedcir nnegh!».

War yermis rexdenni iswi (but) n Sifaw zi tsarit i gh ad kid s yegg xef taddart n Karams. D wa d amentil (cause) i dt yejjin ad dt yesseqsa:

«Waxxa ad kid c rahegh, maca xsegh ad ayi tinid min din gh ad negg di tfuct a? Twarid yac nzvum, necc anegh inu yuzegh s fad, fesyegh war zemmaregh ad uyûregh!»

«Yallep uca, mani tedja tfuct a da yedjan, necc uryegh d day s zi Kebnani, u cek tegwded tet amen teqqimed di tiri. Mayen din gh ad negg war d ac teqqaregh ca ar din gh ad nawedv ad tessned mayemmi».

Msafadven aked Uyûr d Ziri, ttvfen abrid ghar Ibuzegguten. Tfuct teccat asen s tvya deg udmawen nsen. Taneghda n ucar ttari d akid sen, nga (bonne odeur) , jjawi iteffegh d zi tewwura d rekwazi n tudrin. Yiwi dt id wadvu yefsusen ghar wanzaren nsen. Ssentan iwdan di tgharsit i yidv azamur. Ijj igharres i wyazvidv, wennedvnit i wqenenni. Sqarqcen marra izuray d timawin n yibriden d zzat i tewwura s idammen. Munen d yitvan d imuccwen  xef ixaremzan nsen huma ad ten djghen. Izu d xaf sen yijj n weqzin, sqaden as ca n imesdawen, iwyen war twirin abrid. Irdven d ihenjiren imezvyanen arrudv am isran d tesratin. Ca izvum, ca yarna dt arremdvan izvum ha yazyen n wass wapa.

Yudar Massin ghar ca n ihenjiren d awmaten ggin fus deg wfus, awtem d tawtemt, yisi d tahenjirt nni tamezvyant yetvfi t xef ughir nnes, yesseqsa t:

«Mammec d am qqaren a tigheydet n wezghar?»

Inna s i uhenjir:

«I cek a yaryaz mammec ad ac qqaren?»

«Qqarn ayi Hemmit»

«Tzvummed nigh rid amenni?»

«Wap zvummegh».

«I cem a Fettvuma tzvummed nigh yarna cem uca teccid?»

Teqqim mghar txezzvar day s s tittvawin nnes timezvyanin itissiqen. Maca Hemmit yarr d xaf s deg ûraq nnes:

«Tzvum s adu teghmest!»

Jjin ihenjiren nni, dvfaren nitni abrid nsen, iwdven ghar taddart n Kramas. Bedden awarn as, arendad nnes din ict n taddart d tacemratc, tugha din kradv n  thenjirin qqiment xef tnebdat n tewwart, irdvent arrudv atrar (moderne). Yessenta Sifaw ijeooar day sent, inna s i Massin:

«Xzvar i wazvri dipa xzvar, a Massin!»

Irmes rexxu Massin iswi i yejjin Sifaw ad d yass ghar uraq a. Ixzvar ura d netta, icmez awarni i wmezzugh s udvadv, inna s i Sifaw:

«Wap d tidett cnant! Areqqent s wazvri am tvya n tziri!»

«Tesseqsid ayi adjinna mayemmi gh ad negg tsarit a, aqqa c mayemmi ad neswedv deg ûzvri!».

«Iwa d azvri! Xsegh ad cek sseqsigh, mammec i d asent qqaren?»

«Twarid tin tameqrant yeqqimen x ufusi qqaren as Tiziri, u tin i yeqqimen deg wlmas qqaren as Traytmass; nettat d atamezvyant nsent, u tin dipa yeqqimen x uzvermadv qqaren as Tirelli».

«Man ten ghar yuyer ur nnec?»

Yesmutti rxezvrat nnes zi ghar sent ghar s, yarra xaf s u yenna deg ur nnes:

«War zmiregh ad ac inigh!»

«War ttiri ha d Tiziri, tameqrant nsent m wazvri yacedvbi!»

«Ad tagh ad tiri d nettat, ad tagh war ttiri, manaya ssnegh dt nec wapa»

Xzvarent id ghar sen. Tesfarnen d ghar sen Tiziri. Ssentant tedvsvant s kradv idsent. Maca nitni war ssinen ma tedvsvant id akid sen nigh tedvsvant id xaf sen, umi yufa yamenni Massin, iragha tent:

«Mammec tedjant a tinewwacin inu?»

Arrint id xaf s s yict n tadvsva (rire) temghar, arrin as d idurar, issiwer ghar sent Sifaw inna sent:

«A mi kennint yughin ttedvsvant? Ma teswint aman n udvir nigh? Ini ayi a Tiziri mermi i gh ad nmun?»

Arnint di tadvsva. Tessiwer d Tirelli di twara tamezwarut, tarzvem d ajeqmim uca tessenta ttekkûr iten:

«Tvebgem ghar yemmat wem, ad teccem ixf nwem a yitvan!».

Zi ssin tekkar d zeg ûraq nnes, tesmun d ca n yezvra deg wfus nnes, tzarf iten d s yijjen, maca war ghar sen d yiwidv, temzaryadv d kid s Tiziri teks as izvra nni zeg wfus uca tzawar it:

«Min d am ggin umi ten tzarrfed s yezvra a yedji s n unuri!? Wellep huma nnigh as dt i yemma».

«D nitni i d anegh ipekkwren, tesrid min d anegh d nnan?».

«Qim… qim mana apwar i cem pekkwren, cem tetten cem ifassen nnem attvas, nitni qa war nnin walu»

Inna sent Massin:

«Jj it ad tzawar! Waxxa day m a Tirelli a tyazvidvt n waman, ar gh ad tsvûrd deg wfus inu uca ad am ssecnegh izvra zi d anegh gh ad teccated, imara war d am kkisegh fus nni zi d anegh d tazarfed  a tcuntet!».

Dvfaren abrid nsen ghar wedcir nsen, xtuttren deg ict n txuxxect. Tfuct targeb awarni wedcir, war tejji ha tezwegh nnes sennej i ydurar n Sidi Mesoud. Nitni dvfaren awar nsen xef yessi s n Mimun. Ipard as Sifaw i Massin x Tiziri idja yessen di Tvanja ura d netta tugha dt yeqqar dinni deg wseggûs a yeodun. Bedden umi d udsen ghar tewwart n taddart n Sifaw, yenna s Sifaw i Massin:

«War d ac ssiwregh ca oad x yict n wetcmat sent aqqa t oad di Tvanja tecna yattvas, ma tessned nigh ya yazvri i d as yuca arebbi war dt yuci ura i yict!»

Yesseqsa dt Massin:

«I mammec i d as qqaren?»

«Qqaren as Nunja»

«Ad d tass ghar unebdu ya nigh?»

«Ad d tass wap, ad ac inigh ass n tafaska (fête) tamezvyant ad tiri da».

«Mechar ghar s di tasut nnes?»

«Ad d tass anect nnec ammu nigh.. cek mechar ghar k n iseggusa?»

Iskef Massin tazwut uca yenna s:

«Xsegh ad t zvaregh!»

Iks as Sifaw awar zeg wqemmum huma ad as yini:

«Ar ass n tafaska mara yexs arebbi uca ad tet zvaregh. Balak ad d tass zzat i tfaska».

«Waxxa mar neddar».

Yemmunsu Massin aked rwacun nnes s arrfis n trid aked uyazvidv. Yemmutii ghar temzida huma ad izzadj. Yufa t teccûr s tzewdviwin yuffsen s seysu d iyesman s yinni n iyazvidven d yinni n ifunasen d yinni n wacraren, i d yiwyen kid sen imezzidja. Yufa din abarru n imeddukar nnes amecnaw Sifaw, Yur, Izri, Tuttu, Asekkûr… Ccin swin zudjen, uca ffghen d ghar barra, qqimen aked ughezdis n tewwart n temzida, ssentan temparraden xef yidv azamur d min day s itemsaren. Issiwer Tutu inna d deg ûwar nnes:

«Ghar tmeddit tnufsuren d day s jnun, ayyaw ayyaw d wenni ked gh ad msagaren ad zay s mmunswen!».

Massin tettvf idt id tiwdi, yuca aked ucewwaf nnes ibedd, ur nnes ineddu s tazzra, awarni yijj n useghdi d amezvyan yenna sen Sifaw:

«Qqaren is idv tnurzvum day s tewwart n ujenna, u xminni tnurzvum min mma tettared zi Arebbi ad ac dt yuc, u necc ghar i min zzay s gh ad ttaregh, ijj n wedrar n wedrim, d ict n taddart temghar, d ict n ttvunubil Mirsidis mudvil aneggar, d ict n thenjirt tareqq s wazvri ad t ggegh d tamghart inu».

Dvsvan marra yidsen, arrin asen d idurar, nceqdven yitvan kkaren d ad zun.

Ksen awar jar asen ad qqimen ad rajan tawwart n ujenna ad tennûrzvem, dvfaren awar nsen, yisi Massin tittvawin nnes ghar ujenna yebbarcnen, yeqqim ixezzvar deg itran itriqriqen di tadjest ihedqen. Isala aparred, yessenta useghdi, teqqim ha tazut n yitvan zeg ûraq in d win  zi twarat ghar tennedvnit, d ushundart n yeghyar zi taddart in ghar tin, d ujvawi n iqarqriwen i d itarryen zeg ighzvar n Uriri.

Yiwi ten unudem, qqnent tittvawin, yarna ten yidves, msafadven, ddun ad adfen ghar tudrin n imawlen nsen huma ad tvsven mebra ma ad zvaren tawwart n ujenna tnurzvum! 

(Ad yetwadvfar)