Tanfust:

Umyey (Mythe) n remandvar  n Jeddi*

Yura t: Yusef Oazz Eddin** Assughel: Said BELGHARBI

“Tugha xsegh ad ttugh tarja inu, war ssinegh mammec d ttusa ura d mani tt urjigh. Maca min day s zrvigh netta d tarezzit ggin remnadar n jeddi deg uzyen nsent, war ssinegh mammec ggin al ami itwarzen d iceqfan, war ssinegh ma n amentil (cause) i yejjin amnus nni izdegh di twengint inu, isweddvar ayi amezwar d umeggar n tarja nni!!!?…”.

Zzat ma ad yemmet jeddi yenna yi:

- A memmi inu! Ad dac jjegh remnadar inu d aselghes (dépôt) deg ufus nnec, yuccel (falloir) xaf k ad asent tarred taynit min ghar tekked teddard, ghar k ad asent imsar ca, amezruy n remnadar a d amenzu, tugha djant d agra n ijjen n umsebrid itmuddu d amennejru deg umadval zi tmurt a ghar tennidven, d netta i dayi tent iwardan, zzat ma ad yuyar ad iweddar ghar raggûj nnes, deg ijjen n wass n tejrest nnujwegh ghar s; yenna yi: (righ ad dak wardigh tiwsiya, maca xsegh ad as tarred taynit; teddared nigh temmuted!!…).

Wami isala awalen nnes, issenta ukuffu issfay d d acemlal zeg uqemmum n jeddi, itmarrni d, itudum xef tassut, yiwedv al ami yudum xef ufus nnes afusi zi yettvef remandvar  nni.

Twaligh jeddi yettvef day sent, axmi war yesx ad ayi tent iwarda, axmmi d tugha d tayarzawt xef min dayi yenna, war zzaysent yesxi waxxa raxart tessenta teghzvazv dayes, maca oini yessen min yeona azal nsent!?.

Itwandel jeddi deg ijjen n uraq mani tugha issutar netta ad dinni indvel, di tmurt n ragwaj, manis war isvuref udvar. Zeryen xafi attvas n imalas, righ ad arezmegh txabect di yeffar jeddi remnadar nnes, txabect iqqarqec ughamus nnes, tessur s wedrim d yejghulen d tioeqqayin n lluban, smuqlegh di remnadar nni uffigh ibeddel wudem nsen, axmi war yedji d yenni i dayi iwarda di tudart nnes, oini ad yiri asmeskel (changer, ibeddel) n wudem nsen d ijjen zeg tufrin d wadrug (mystique) nsen, oad twarigh day sen tittvawin n jeddi d tibarcanin jeooarent id dayi, s ticarraw n tigwdi i dayi d yetvfen, marregh arrigh tent ghar txabect nni iffaren di tburjet n wexxam nnegh, mani yemmars adlis ughris (lkitab lmuqeddas).

Adlis nni tugha yeqqar ayi xaf s jeddi:

- A memmi!! akuc deg udelis a i danegh d yenna amezruy nnegh, oad ad dyas ukud di ghar nedwel ghar webrid nnes, maca ssutaregh zzay k war tejja hed ad isteftef di tefray nnes!!.

Marra yenni yessen jeddi zi radas, mkul ijjen d assagh (rapport) nnes xef umezruy n remnadar nni, mkul ijjen d tanfust nnes, maca marra idsen tghilen remnadar nni iwca s ten ijjen n wudayy umi tugha yedja jeddi d anelmad di “lqacla” (caserne) n teghremt (temdint) di Istvambul. Jar jeddi d wuday nni tugha dinni amuni n ict n tadukli temghar s wattvas. Maca ict n twessart ura d nettat tugha tedja d tamedukelt nnes, tugha tessen xaf s attvas n tuffrin, ijjen n twarat tenna yi:

- A memmi!! mara texsed ad tesned tidet n remnadar n jeddec, sefled ghar i ad dak d tinigh nnec, remnadar nni bab nsen d Mas ALMIJR SUN, maca war ssinegh wi ten zzayes d yucaren, ad lami d iwdven ghar ifassen n jeddec, mara war ggwidegh ad sxarqegh; ad dayi iwadem akuc; oini d jeddec i ten yucaren s ughir zi mas nni, nigh oini isgh iten xaf s, maca min snegh belli remnadar nni ksin attvas n tuffrin, war zemmaregh ad ac tent inigh nec!!…

Marra manawya war dayi yecqi, snegh belli remnadar n jeddi ghar sen amezruy yemghar, ghar sen azal deg uraq n tudart nnegh, d manawya id ayi yejjin ad asent arregh anict uyenni n taynit. Hima war tefghegh abrid id ayi yenna jeddi ad xaf s uyaregh isvuraf inu.

Ddugh ghar taddart n umesgenfu n tittvawin, waxxa tacigh iked rxezrat inu amenn tenna, i ssek xafi tmcinat ghef tittawin inu, ixezzar ma ad d asen remnadar n jeddi xef usmuqqel inu, yenna yi:

- Wap!!.. remnadar a ghar sen tinumal (attributs) am rxezrat nnec nican!!...

Maca nec ittvef ayi utvebpet ghar wawar nnes, min war ugzugh; netta d mayemmi xaf i d ghad asen, d nitni n rxezrat n jeddi, nec tallin inu war arwisent di tinni nnes?!..

Ass nni i di jjigh amesgenfu, fgheghd zeg umesganfu (sbitvar); twarigh marra tiwwura n tudrin d leswaq n temdint arejrent, iwdan udrusen, zi twarat ghar tennidven ad twarid ca n ijjen yezvwa tma n webrid s umari d tazla, oini oemmars taghlemt a ma teddar tioejjuja am wass a, teccur s rghetv n icaren t yedlin am tayyut?.

Tiharyadvin a ilul d akid sent abarru n yitvan, tmarnyen d s wattvas, zpir n tzut nsen di marra iruqan, tenfifiren jar d jar, di ca n wexxam yarder nigh di ca n txuxxet jar igudar d icarcar, twarigh ijjen n weqzin i tennedv i yect n teqzint d tacemlalt, rajigh ad msvebdvan xef ayawya nsen, maca uggin, ksigh d ijjen n uceqquf n wezvru heryegh ten zzay sen, maca yuggi ad zzayes yarxu, twaligh msersvaqen zi tcarmin nsen, tugha war ssinegh belli temsarawt nsen amenni id yegga, uffigh amenni; jjigh ten ad salan ddab nni n tayri nsen!!!..

Ula d nnec ilehfay uxeyyeq am tayyut n temdint, dayi amnus n remnadar nni, gwdegh ad ten qqnegh xef tittvawin uca ad dayi imsar ca n umutten, nigh ad twarzen xef taqsuhi n tmurt, nigh ad weddaren di ca n mani, minzi nec lebda texsegh ad nnujwegh attvas ghar mani tmunen lghaci, ghar tfeskiwin, d tfugla n tmeghriwin!!…

Ijjen n twarat tugha yi d annuwji deg ict n tfaska, war ucigh al lami d teqqim zzat inu ict n tharmuct d tungalt n wudem, teqqim ttades d ghari s cway cwayt, tenna yid deg wawal nnes amezwaru:

- Attvas zi melmi d nnec ssarsegh xaf k tittvawin inu, d zi melmi d nnec texsegh cek!..

Smuqlegh dayes, arrimet nnes teksi timitar am tfelwin n unazur (artiste) GHUGHAN(1), tugha tacigh axmi d netta id tyarecmen s idvewdvan nnes, turi d s waddud iqad, s tcuni izi tessur… Awalen nnes teqqsen s lebput, ttayem d asqinfet zi radjagh nnes i tudum d dayi s cway cway, Axmi nni tarezzem taqemmumt nnes twaligh cwayt n tafrughi di tighmas nnes, taghmuzin arenyent as azvli d tcuni, tugha texsegh day s attvas tizvemmi id tteg i tancucin nnes, ineddep ayi ghar s uyenni, righ ad marghegh di arrimet nnes…

Tugha tarjigh axmi necc d amsebrid, tfafigh deg umadval, al lami uffigh ict n tegzirt teccur s tuzziyzewt d tseklutin ilelcen xef tmewwa nnes, mghar nec d tharmuct nni day s d imezdagh, traghigh as s izwl (ism) nni i das ggigh TALAR (2), war ssinegh tidet n usemqar nnes, neqqim sin idnegh n tenyuyur xef ict n thennayrurt yuyren ghar tseklut, TALAR axmi war ttif tiwalin zi ghar texs ad tini min texs ad tini, taff tijdvidvin deghya sughulent asqar nnes ghar iwalen; ghar ilaghan, mermi mma xzaregh ghares taffegh tittvawin nnes bbepbarent id ad runt s imettawen di yeffar min war ssinegh.

War ugzugh i mayemmi ttaf askuti nnes ghar imettvawen, oini txarrvas di twengint nnes ass nni umi d tewdva xef trict n uyyiss nni acemrar, wettvu nni i day s yejjin ayezzum war itgenfi; yeddar d iwezwizen xef udvar nnes afussi, mermi mma day s tessendef ad ttayem imettvawen ghar ririwet n tittvawin nnes.

Nec d TALAR nmsagar sin n twaratin di tudart nnegh, deg ict n tfaska wami tugha yi dinni d annewji, zi senni tweddar; war ssinegh manis i tekka limart nnes, yeqqim ghar i d asutar ad tzaregh i twarat nniden, suyenni mani mma tedja ca n tfaska d ca n tmeghra ad dinni nnujwegh, qqaregh as deg ixf inu ad yiri TALAR aqqet dinni; huma ad nemsagar!!...

S wattvas n twasit inu ghar tfaskiwin a, ssentigh tesnegh abarru n innujiwen, maca ijjen n ugwennactal (clown) lebda aqqet dinni, d netta umi ticcen ad issiwel xef min itemsaren di tmeghra, issawal idehhek s tighmas nnes ticemlalin, itawi d tinfas ar ghar bbeojen marra innujiwen nni s usfarteq.

Yezri ussegwass xef raxart n jeddi, u oad war qqinegh remnadar nnes xef tittvawin inu, war dayi yenni ixf inu adef sadu icudvadv n tuffrin, lebda tugha arezzugh ad arewregh zi tumyin i tugha dayi yeqqar jeddi di tudart nnes.

Maca tagezzant nni tawessart d min dayi tenna xef remnadar n jeddi, tejja ayi ad xarsvegh mammec nniden, ict n twarat tus d ghar i tarsa rizar; tezvwegh n lhenni tugha xef tifassin d ddarin nnes; azyen n iffan nnes yuffen seyhen d d ioaryanen zeg warudv nnes; tessezwegh ura d tancucin nnes; tighmas nnes ssajnt id d tibarcanin… tarni i wudem nnes ict n tezbibt ghef tagemmizt nnes, tkehher i tittvawin nnes tizegzawin, teqqim zzat inu, tekkes xaf s ahewwaq i tugha teghnes d acemlal, uca ucigh teqqar ayi axmi d ca n tarja zi krat n turjatin nnes, tarja ya war ghares asenti ura d ameggaru, maca s krat idsent day sent jeddi iddar jar asent.

Tenna deg ijjen n ughezdis zi tarja nnes:

- I tettvef jeddi di twessart nni, i kessi t ghars ad t yessni xef trict n uyyiss nnes acemlal, ad t yawi akides ghar teqseft nnes, maca deghya itwanegh s ifassen n ca n iceffaren n webrid, tawessart nni ucaren tet ghar sen d tanecruft, teffar mani war yessin hed!!..

Deg ijjen n ughezdis nnidven zi tarja nnes; tenna yi d:

- Tugha ghar jeddec tam d mraw (18) n tmettvutin, d mkul icten d azvri n wudem nnes d mkul icten d timitar n tifraz nnes… ura d ilsawen d tutalayin d timagitin nsent msvebdvant, maca marra min yeqqimen zi tarrawet nnesnt d ijjen n warba i yellan d ccek, deg imal ad tirid d agellid xef temdint a, ad taffed tiwalfin nnec uyrent di marra tiwazviwin (régions), ad itwassen usemqar nnec xef marra alsawen n imezdagh d midden, ad zzay s semman tarrawt nsen d gha ilulen.

Maca min yedjan d axatar di tarja n twessart nni netta d min day i tenna ammu:

- Deg ijjen n wass n tejrest; axmi nni ghar tegged s wawal n jeddec ad teqqned remnadar nni xef tittvawin nnec, ad tmerced iked tharmuct nni umi teggid TALAR, zi senni ad temdukled iked lwacun nnes, ad ac d arren azal nnec, ghar unfarar ad d dewred d aselway n temdint a!!….

War ugzugh i marra min d yusin xef yiles n tgezzant nni, war dayi tidfent tinfas n tumyin ghar twengint inu, maca ghar umeggaru ucigh iked yexf inu yiwyi t wannay, s min d tugha dinni n waggu yeggin tisiynutin deg uxxam inu, aggu zi tugha tteg timegga nnes, war ucigh iked ixf inu al ami d kkaregh zi uprudji inu, uffigh tawessart nni war yeqqim mghar araq nnes, uffigh ixef inu d aoaryan, arsigh mghar tirmect inu, s umarret yuccar ayi unudem n yidves, war d kkaregh al ami d xafi sijjen izenzaren n tfuyt, twaligh zzat inu ca n iskiren (lehruz), yura day sen: (gg s wawal n jeddec, qqen remnadar nnes… maca ghar k ad texzared ghar mani nnidven s nebla zzay sen!!!…).

Ixf inu war izemmar ad yuyar ghar zzat, azder (svbar, Patience) inu yefsi, war zemmaregh ad saligh tawuri iked inelmaden inu, attvas n twaratin tugha war ssinegh min tugha dasen sselmadegh, ula d min xef tugha nessawal, maca tugha ntettves attvas deg ugherbaz, wenni ghar yurjan ca n turja am tenni inu ad yesmurs (réussir) ad d yawi tiwsi d tameqrant n ugherbaz.

Inelmaden inu tbeddalen attvas deg udmawen nsen, iharmucen tmarniyen meghgharen s tazla zzat i tittvawin inu, tiharmucin waxxa d timezyanen maca tugha twarigh tibbicin nsent sfuffuyent id waxxa akud n tinenni nsent oad war d yiwidv, zi twarat ghar tenniden tugha swazzdvegh ghar sent, ura d inelmaden inu axmi nni dayi twalan; arezzun ad ggen am nec, nedvwen deg ihesyan n ijjen d wennidven, mermi mma dasen oawdegh xef tefray n umezruy n XALID BNU LWALID umi yengha MUSAYLIMA… tugha tacigh akid sen teggen timegga am ibupaliyyen, kssigh arekkudv zi ghar ccen aqabu, zawaregh ten, nnigh asen s taqsuhi n wawal inu:

-Upu.. upu!!.. ma war tessinem belli aqqa yi d anecruf n ixef inu, war dayi arenyet tighufi, d imxumbal ghef tmukrisin di djigh, necc arezzugh ad tirim amen tenna, aqqa nec oad war ggigh s wawal n jeddi, tacigh iked ixef inu war sekwigh walu, war djigh am umezwaru, war ssinegh min qqaregh ula d min teggegh, awalen a i da qqaregh war djin ca inu, n twessart nni tagezzant i ghari d dyusin tameddit nni, i xafi yesrun arudv inu, ura d amessegur n ugherbaz; ad ghars d teddu di ca n tmeddit; ad das tegg am nnec!.. Righ ad dawem inigh belli nec war djigh ca iked min tugha d awem sselmadegh n umezruy!!…

D cwayt yudefd umessegur n ugherbaz, tugha itesla imarra min tugh dasen nnigh, uca arenyegh deg wawal inu:

- Mri war tedji d HABSAT XAN ANNAQIB(3), ad yili war arezmen tinmal (agherbaz) n tharmucin di teghlemt a, ixessva ghef marra i dnegh ad nayer tasmaqalt n HABSAT XAN xef igudar n ixxamen nnegh, ixessva anegh ad nessen amezruy nnes, ad narzu deg umeddur nnes, ad nesijj xef marra min tura di tudart nnes!!…

Yewta umesggur n ugherbaz xef teghrudvt inu, uca yenna yi s usfarnen:

- Tanmmirt a yamselmed, cek d azwel n tneflit (développement) ugherbaz nnegh, maca ghar k ad tegged s wawal n jeddec; ad teqqned remnadar nnes xef tittvawin nnec, oini ghar ad tent tegged ad ibeddel umeddur nnec, ad tbeddel ura d tudart n tawuri nnec. Ghrigh ass n idennadvt deg ijjen n ughmis n Taglanzit yura xef ijjen n rmass dayes marra min yedjan d amenzu zeg wagra n jeddec, zi txedmiyin nnes d mawsat d marra reqcuo nnes… it oini tugha yeddar d aryaz s tirugza nnes?…

D cwayt udfen d xaf negh ghar tinmel ca n ihewwasen, uzren ghar ragwaj xef inelmaden, swizdven ghar tasmaqqalt tugha yuyren xef telwiht n tira, ijjen zzay sen yarz it; teftuttez d iceqfan, ijjen yeqqed timessi di rcighed nnes. Zi senni nexzar deg ayawya nnegh uca nesfarnen deg udmawen nnegh, war nuci arami nuffa ixf nnegh deg ammas n lghaci, jar ighuyyan d rhesvran, deg umezwaru n lghaci nni twarigh TALAR; tlagha s tagrawla, d lghaci ssefliden ghar s; ccaten xaf s camxat.

War ucigh arami uffigh remnadar n jeddi ghef tittvawin inu, oini tugha ggwdegh ad dayi weddaren jar tazliwin n lghaci, nigh ad twarzen jar aofass n idvaren nsen, uffigh iwdan nni marra jeooarend dayi, marra idsen arrin ayi d taynit axmi ghar sen djigh d agellid, d nitni undven ayi d am isemghan inu!!…

Toini amentil (cause) d remnadar nni, d suyenni arezzun ad xafi hbibaren, huma war dayi ten i tekkes hed zeg iceffaren n temdint, uccigh iked usbirreh (tumart), wami uffigh marra iwdan nni arrin ayi anict uyennni n taynit, oini wami ggigh s wawal n jeddi; qqnegh remnadar nnes i usmuqqel inu!.

Ghar radas n umuni nni; twaligh taharmuct nni umi ggigh TALAR teksi “lmikruffun” ad tessiwel ghar ugraw nni n yewdan, tenna sen: