ayam

Tura t: Mayssa Racida

Tccur aqduh, tayem dis s ubidaw tkebba deg uqduh, aqduh nni yuggi ad yeccur. tinuyam marra ssawarent, ca inehhed idvaren issuffa tifexsa deg waman, ca yesrira yaman s temrer n wudem nnes. Timuc oad ttayem d tkebba deg uqduh, ttayem d aman, ttayem d awar, ttayem d asuhart n tsawent. Aqduh yuggi ad yeccur. Tara tarenni yepruccur mermi mma fqiqsen d waman zi temrer n wur nnes tmarnayen d waman nnedvni itmarni d wefqiqqes nnedvni itbarjujjuy d d awesseg xef uwesseg d issiq xef yissiq temsedvfaren d imesvraq. Timuc s ubidaw nni isdeqren ticri n arrimet nnes tkebba deg uqduh, yuggi ad yeccur weqduh nni, tekkes tazizdect, tessij deg uqduh, netta yessij d xaf s ismar as d tazdugi d uwesseg n waman nnes, tarra xaf s tazizdect teqqen as rxezrat nni n fad. Ad tarni abidaw, ad tarni yayam n waman.

Izvra d iqarqacen thadan terghegh n treghwin n idvaren nnes serkukkudven day s fad d tsessi, mhizwarent tsekkifin ghar tmijja nnes sxesyent tzawa nni ca din yughin mani mma, tesseghri yamay tesseghri akid sen azghat nnes d ca n wussan iparewdv iten yidv a. Tkebba deg uqduh nni, aqduh yuri d ad yeccur yexs ad yejjawen ad igeooed ghar yefrar.

Timuc temsafadv akd tara tajj as injan nnes, tejj as fad nnes, tejj as tzawa n weqduh nnes, tuyem d ijj n ubidaw d ameggaru tereny it deg uqduh nni, aqduh oad yuggi ad yeccur , tekkes xaf s tazizdect tufa aman tissiqen d zi tisi, iyardv it utebpet tghawer abidaw nni ad tedwer ghar wemsafadv nni n tara ad tayem wennedvni.

Xsegh ad as inigh aqa yaqduh nni yarezv nigh day s tazzit xef ughezdis, maca nettat terpa ttayem d abidaw nni, ad tid tarbu tsawent nni ar aqduh nni yuggin ad yeccur, necc war d as nnigh ca!.