Tullizt
Injan ur itiriden
Yura t: Mimun AMSBRID (biljika)

Iteggw, yesrira, itzvemma; iteggw, yesrira, itzvemma…
Tighardvin n Hmed wdvant id, ca war t’ iteg.
Injan tiriden, teffghen. Injan n ihrucen n Hmed war teffghen. Injan n ihrucen n Hmed war djin am yinjan.
Itghima x ubadu n wbrid, ihrucen nnes zzat s, ifadden bedden, azedjif yudar ghar dat, tittvawin war teksent zeg ihrucen nnes; isvuraf n imsbriden i tekken ghar idvaren nnes war t’ ssermighen; ighuyya n yewdan d uzewwec n tmdint war t’ tiwdven… Hmed ysrira… War itezneyfi.
Hmed war yesriri ihrucen nnes s waman d tghighect: yessen is marra ighezran d tariwin, marra tghighect yedjan s nnej i tmurt war tiwdven i wsriri n yinjan n ihrucen nnes.
Asriri n Hmed yuzegh.
Injan n Hmed war djin am yinjan u Hmed yessen ayenni. Ihrucen n Hmed war tiriden, maca Hmed war izemmar ad yeqqim war yessirid.
Injan war teffghen, Hmed war itezneyfi.
Yessen Hmed is min ghad yekk yddar s ughir xafs ad yeqqim yssirid ihrucen wa itiriden.
Tugha mermi ma kkigh zzat s itawedv yi d ar aqemmum ad as inigh mayemi war iteg aman d tghighect hama ad ffghen yinjan.
War as nnigh ca.
D Hmed i yssnen.
(Mimun AMSBRID)