tifras
Tura t: Mayssa rachida EL MARRAKI
Iseyyeh d wesqar ssenni…
Nec tesrigh as…
Marra min d yenna
Marra min d gha yini.

Imesraq n wawaren
Ibriden n wemsawar
Izuray n ixarrvisen
Ixemmer iten useghdi.

Tigharsi nni yeqqarsen
D usendef itwezwiz
Xesyent tfawin
Tudart marra texsi…

Imettawen n wur
D uqessi axmi yetxur
D tefras n tfeqqeht
Ssarezfen ayi d mezri…

Iwezwizen fetren rehriq
Tidaren tidet
Tidaren axarriq
Wi ighiren ammu zi mermi.

Ayezzum itirar di radjagh
Izekkû d itezzvu rehriq
Di manis d yeghmi…

Cewren ifqiqqas
Mjaren drus
Mjaren attvas
Zeg ur inu idewren d dmani…

Tarez remrahet n tudart
Yarzeg razagh imetni
Fzegh mlih iwecwicen
Sgheryegh tarzugi….

Imurdes uraghi
Ftutzent tirja
Zedjoent di tubarcent
Tawi tent tmedji….

Israwent rxezrat
Aghedjuy iceyyar d
Yenna d….
Uca yenna d…
Yarra yenna d…
Tudart marra ateghriiiiiiiiiii.