Tigira ad, aghulen idsen amm idd ten ikcem isidv. Ggezen xef ismawen imazighen n ansiwen ar ten ssefrvaghen ad ten raren s taorabt. Pan “Ifran” da as ttinin “Yefren”; meqqar id teffegh tarratt nna da ittinin ad yaghul s assagh nnes amezwaru. Tizi n talghwemt tega “Fejj Talghwemt” d imedyan ggudin: Timehdvittv (timahditt), Xnifrva (Xnifrap, ar ad teg Xunayfirap), Wansifen nghedd Wisaffen (Umm Arrabiâ), Agelman Azegza (Oeziza), etc. . Mriret, mec nfesta, ad tughul “Murayritap”, nghedd “Ummu rait” ar adday as gan “Ummu ghayt”. Awal nnex nna nessen –tamriret n uwtul, tabridett nna da ittaddeja adday izrey- ad te sefdvn awin ax ed taorvbet n uneqqerv g ansa nnes. Ad nesbedd tasbdert ad nna nghiyy ad nseghwzef anect nna nera. Ghas tazwarayt, hma ad nsawel xef awal amazigh.

Ad ghifs nsawel s tamazight, iddex nezdvarv ad nsawal xef tamazight, ar nnesmummuy ar ed nrvmey. Mec idda ar ed ismur wawal amzigh, amata ur yad itteggwed ar ittini, netta da amezwaru “Nekkweni de imazighen; azur nnex iga amazigh; maca, deghi, nega aoraben”.

Unna iran ad yisin xef tasemdna (génie) n awal amazigh, ad yaf ca g adlis “Pour un maghreb d’abord maghrébin” n M. Chafik.. Nekk, ghas ad cex idsent tinnayin nna ukzex seg mayd da swingimex, xef awal amazigh, ugar n 30 (krvamraw) iseggwasen ayad. Ad tent smunex g kkuz n tiqiffitin.

1 -Awal amazigh yiwen ayd iga, ur idd sin, ur idd krvadv.

2 -Tella tacceki g ku tantala.

3 -Taghul tedrus taseddi g ku tantala.

4 -Tella tanemmadut inger tintaliwin.

Ur illi awed yan wawal min tajarrvumt nnes. Tamzwarutt n winnex tin Dda Lemulud, s izwilen n talatinit. Tin tantala n taqbaylit aynna tt issemrayen

imiqq. Yili dix idd ur diges afray n iwaliwen. Maca, ad ur nettu idd inna Dda Lemulud: Nekkwni nessenti tawiri, illa xef wiyyadv ad ghlelen. Teddu ed tajarrvumt n Aselmad M. Chafik s izwilen n tarvamiyt : Arbaoatun wa arbaouna darsan fi allughati al amazighiyyati. Ira t ad ig win usseghri. Digs timsirin imsedvfaren d ilughma. Maca, ittuska xef uzettva n awal aorab; ayad isemray aynna d yiwi xef imiggiwen. Tajerrvumt tisskradvt tin L. Ulhaj. Yarutt s tafransist. Ur ittuski xef awal afransis ula aorab. adlis ad digs aseneflel. Yiwid ca igan amaynu, lumenn xef imiggiwen. Taseftitt nna ica tserarrey xef akkw tinna itteyassenen. Nekk bepdvex, ur ukizex mahê allig id tusnawal festan ifesti igan yiwen xef adlis ad. Ad ten nessektey, ghas s amedya, idd tajerrvumt n tafransist, nna nessen deghi, ghas yiwet seg tinna ittusersen. Ayad xef yan wawal nna xef ttuga tawiri cigan. Piwa, mayd nettini xef tamazight?

Adday da nsawal xef tamazight, iqqan ax ad nsawel xef Ddarija. Llan winna ittinin idd taorabt ayd tga; ayt tixendillas, addej ten ad sgezdvifen. Nekkwni, nannay diges, s tadersi, 50% n tamazight. Neghiyy akkw ad naf iwaliwen nna nettu maca sulen diges. Adlis “Addarija almaghribiyya, majalu tawarudin bayna alamazighiyya wa al oarvabiyya” (Académie Royale du Maroc, 1999) iga amghaz n wurgh n imedyan. Add nasey, seg diges, ghas idsen: Ataras (catastrophe), Ajerrvum ou Agurram (le noble, l’hermite), Adal (l’algue, le lichen, le fucus), Idrasen (les rangs, les rangées), Amsu ou amsu (le gain d’un travail ou d’un commerce), Abecnix ou abecnigh (lbecnixa; a donné le “visnage”), Tazugayt (l’hymne militaire; ici, M. Chafik rapporte ce que dit Ben Khaldoun: yataqaddamu accaâiru âindahum amama assofufi wa yataghanna fayuharriku aljibala arrawwsîyya wa yabâatu âala alistimatahê...), Lmelzv (le mélèze i.e. le faux cèdre; en tamazight, Imelzvi veut dire le faux), Aqebban (l’analphabète), ... .

Awal nna ur ilin imyarun ur inni ad imghur, ur inni ad yidir. Sulen urta ghurrex llin cigan. Ar deghi, iwinett iswangamen, g tazwiri, g tajerrvumt d imawalen; d isenflalen g isefra d umiyen imezwura. S tumert, llan winna tt yiwin g umezgun. Maca ilkem uzemz nna g nettaru Ungalen, Tinaramin, Tineghmisin, etc. . Ad nebder s wawal izvilen idsen seg winna issentan yad, da nezzan idlisen nnesen nghedd upu. Illa S. Ssodi , E. Afulay, H. Heddachi , A. Ikken, Akunadv, atg. Nessuter, i winna ur nessin, ad ax ssurfen.

Llan imazighen ittinin ur illi gar. Iwalen da ttemmekcamen. Yyip, maca ur idd adday izdvem yan xef wayedv. Ikka ghif nex Oarrib lisanak“ n Rradio, attayen n 1960; rzvan ax imezgan s „Qul wala taqul“. Aya ur igi mnid as ghas „Sawel s imi nnec“ n Ayt Hdiddu. Ikka ghif nex “Ttekkellem b lâerêbiyya; ac ta tegul”, “Ac hâd lhêdra?”, atg. . Ttesân ax xef ismawen nnex. Amm yan uselmad, seg Ddezair, ikkan g Lycée n Azru, inna ax: Asma oendkum. Ayad iddex illa “Bu ifullusen“, “Qebbac”, atg. Yiwen yadvan, seg Loirvaq, inna ax: oendkum asmae, wa law iji sehhar yeghletv fipa”. Iselmaden ad, s sin, ur ssinen idd nitni ayd ur illin g tamazirt nnesen; ar reggemen icirran imezzviyen nna ur ighiyen ad raren awal. Nsella i Tamazighet, lahja, maci lugha; tamazighet lugha deoifa; wac neta cleh ulla meslem? Ar Allal alfasi nna iddan allig inna i imazighen, ghur sen g Atlas: Ayyupa al barbarv, innakum oarvab (ah iberbrin, pat kkwenni d aorvaben). Mec da sawalen imci, winna ur igin imazighen, neghiyy asen. Maca, mayd nettegga de imazighen nna da ax ittinin: Tamazight, nna nesseghrva, ur telli; ifukk ad tt d nsenflel. Amm widdex ayd ax ittinin: Aghulen immezvanen ur ssinen „awrvagh, uzwigh, ...; da ttinin : asvefri, ahemrvi, ... .

Inger atnex nekkwni, ad nisin idd awal amazigh yiwen ayd iga. Ghif nex ad namezv, nec. Nebdu d „ur da t nettini“, „nekkwni da nettini“, „tacelhit ayd igan awal iqqurn“, etc. . G yat tasga yadven, imsawlen n ttilivizyun ur uciyen s taggwatt nna ghif sen ula tawiri takeswatt nna ghiyyen ad gin i tamazight. Awed inegbawen nna mi da qqarven, ghas da sâerêtobbucen. Ghas amm uddezair nna innan g uzemez n Frans: Krazatu lmacina u rêmsuhê mersowat mersowat. Uma timesmunin, da ttegganet tawiri izvilen cigan, maca nnix idd mec ur da sseghrvanet tamazight pat uddejanet ca imeqquren ur da t ttegganet.

Deghi, nekkwni imazighen ur da nekkat awd yan, ur da nzawar awd yan, ur da nettvessva xef awd yan. Ghas da nettini pat nella; ur idd nra ad nili. Tamazirt ad tinnex; ur d neddi seg mani. Nra awal nnex, nra izerfan nnex. Adgharv i unna innan ikkad berra, mec ur iri ad ax ikkes, ad ax isfedv.