Tawiza

X umegrad i d yusin deg uttvun n Tawiza 78, asebter wis 4, yessawaren xef Xalid IZRI d wemsagar nnes yarezvmen aked tmesmunt n Tanukra di Nnadvur. Ta d ict n tmesract tecna u ghar s araq nnes yemghar awarni uoaq yegga Yizri, yoaq akid s ughennij d lgha amazigh, u yejja attvas n imeshessa i ghad yedja qasu n ughennij mebra yaghennij, mebra lgha, imeshessa n ughennij amazigh atrar, aghennij n wawaren yizdigen, n wawaren yessawadven tabrat i ghad yedja iswi (but) d weswir (niveau) igeooed jar ighennijen nnedvni di ssuq.

U man wen zzay negh war itesrin, war yessinen abrid nni yazirar i d yekka umeghnas a, acannay n imazighen Xalid IZRI, waxxa abrid nnes dja yeccur s isekraf d toenkrifin aked ayet bab n uzemmem n tesfift, maca netta rebda itemcubbuc tioenkrifin a mahend ad anegh d issiwedv aghennij mammec nexs u mammec narezzu.

IZRI itwassen deg wmadval marra lgha n ighennijen nnes csin t ssemgharen zzay s ura d regnus n barra. U awadv a marra war d yusi ca zi walu nigh zi tuffenyent d tazzra awarni «duru» amen teggen ca n imeghnaj nnedvni ghar negh, u s wattvas deg wazzay n ughennij n tmazight.

U wi zzay negh war yeddaren, war yuyuren abrid nni azirar i yarwen jar uzrawi Hamid LYANDUZI i tarin, itwassnen s isefra nnes yizdigen u yizvidven d ucannay IZRI. Sin a n imesneflulen i d anegh iwcin ca n tizvitv deg ghennij netqass it’ zi twara ghar tennedvni di tudart n reghnuj.

Amec d yusa deg megrad n umat negh Asfed yenna: Ghar uneggar n wemsagar tewc as thanjart tamezvyant Taynaste «gitarra» mani d anegh ighennej aghennij nnes umi yegga yasemqar AMAZIGH u yenna xaf s ad yiri ughennij a d ijj n ughennij di tesfift tamaynut ghad yegg ak JURJURA. Maca necc da tqeqsigh: aghennij «AMAZIGH» netta n Hamid LYENDUZI. Min yetwarin megal i tidett a yedjan, ma ad yiri d umat negh yuran amegrad i war yarrin taynit ad yini tidett n ughennij, ura d IZRI umi d yennufser wawar amec t neghra? Suya ssarghegh tfawt x tadjest a yedjan. Ta d ict n tesghart ra n umeghnuj ra n uzrawi ad tiri amecnaw azir s tfuct n unebdu.