Tanda nnex texwa

Yura t: Saoid Oebbuti (Tifarsit)

Ihenjiren imezvyanen

Tarwa n dcar inu,

Aqa yen qqimen di tiri

Deg ussan n unebdu

Tussuyen marra s tidi

Iqebs iten ijj n rehmu

Am wenni n uhaduq n tmessi

Axmi di tudrin nsen

Amecnaw rehbes yuddjegh di tisi

Ixsan nsen d ireqqaghen

Amecnaw adfer s tfuct yefsi

Maca min ghad ggen nipni

Nettat tanda nnex umi

Di dcar tedwxer ttawi

Icfar itrah day s itawi

Yesdvar icefrawen s usendi

Itbarrah s min ghar s d araghi:

«Uyurttiw aqa tanda ya ttawi»

ammu i d anex temsar

wi yexsen yepwa nix yuri

dcar nnex netta yedwer

amecnaw alemmas n usegmi

n ihenjiren d thenjirin

I wabar ghar urumi:

Ra d ahenjir igi weddvaren

Di tamara ar yiri

Ra d tahenjirt am tfirast

War tufi wi ghad tawi

Txemmamen ad yuren ghar barra

Huma ad qqimen dinni

Ammu i d anex temsar

Mechar zeg ami

Ra d tfawt nnex i nesgha

Tighrva s djiret txessi

Aryazen n tidett mmuten

Imezdagh izedghen day sen anuri

Waxxa tfawt tendvu ghar umensi

Nipni tudf iten tigwdi

Waxxa ghad tiri zi tziri

Suya may numu macca

Igi yardven tarzugi

Am tenni idjan deg wriri

Suya may umi tudart

Rebda teqqen ghar rehriq

N tighmest twizwiz

Tagi ad anex tawi

Suyenni amezwaru ya yarwer

Netta yagi ad xaf nex yari.

(Ass n 1 zi ghuct 2953)