Tira n useghdi

Yura t: Mimun Amsbrid (Biljika)

Mayemmi tarigh s tmazight,  iles ad yarzen, inuwwcen; iles ad umi weddvren wattvas n wawaren; iles ad yellan netta "war yelli", yeddaren netta "yemmut"?

Iles ad i war yessinen ad yessiwer, i war yetwafarsen, i war ssuydint tsatarin n imariwen; iles ad yemsebdvan x yilsawen; iles ad itaryen-yettvar am buhber di yarrimet n umessiwer (locuteur)  iteddar akids, yetmetta akids: am tghuyyit, am tadvessva.

Mayemmi tarigh deg iles ad i war yetwarin? Ma d "ilsawen n tira" i war ssinegh nigh d tamazucit (masochisme) i dayi?

War telli d tad ura d tin!

Zeg ami ssentigh ad xarsegh di tira, necc twarigh tent d aseghdi, d aweddvar n wawar; nigh d tarewra zeg wawar: awar mamec ma yegga  d mizidv nigh d amarzag. Tira  ghari  d twakkit awarni tisit n wawar: mani war twirid tifras nnec amen d ac tent id ttarra tisit n wawaren.

Tira d zekkvu ghar yexf/iman (inu) di mani yezdegh, deg wansa nnes: mani war t' ttiwedv "tfawt" n wawar. Tira d ufugh zeg wawar; d aguji zeg wawar, s wawaren yetwarin, ghar mani war tiwdven wawaren yetwannan. Tira d ticri yetneqradven, yesteftufen di tbambast n yexf, di tighemmar nnes yarrin tiri, deg yeddimen nnes d izabuqen nnes…

I tmazight di marra mana yad? Tugha ffghegh zeg wseqsi: mayemmi tarigh s tmazight (wardji s ca n yires zeg "irsawen n tira")?

Tamazight, amen nnigh s nnej, d ijjen yires i di war urin ayt bab nnes. S tifras ad tin ad, tamazight teqqim tudes i wseghdi (le silence); tudes i temrer tamezwarut,  temrer n tmezwura. Ssawaregh x tira war dji x wawar. Tamazight tessiwer,  tessiwer attvas!. Tenna  war tejji min war tenni: tessiwer, tsghuy, tghennej… Maca war turi. War tenni di/s tira. War d tessyem bu tmuddurin di tira; war daysent tssuydi bu yebriden. Tidet n tira tesseghd xafs tmazight; twaddja t i wseghdi (tira d useghdi war djin d ijjen?!).

Xminni tarigh s tmazight, tarigh s yires n useghdi. Xminni tarigh tmazight, tarigh aseghdi s yires n useghdi.

Xminni tarigh deg irsawen nnidven, ssawaregh. Xminni tarigh tamazight, teddaregh (ssghadegh huma ad tessiwer tudart).

S uyenni i tarigh s tmazight.

(Mimun Amsbrid,09/2002)