08 Mars g ku aseggwas, da isfuglu umadval s umata ass n tmettudvt, yan wass igan tajmilt i tmettudvt ghif twuriwin nna da tesskar.

08 Mars g useggwas n 1908, iga ass g nekrent twetmin n Nyuyurek g tmurt n Marikan, g twada nna g usint asentel “ Iledjigen d ughrum” nna g nnant bibiw (s.o.s) i uzemmuzder d usselku n yizerfan n twetmin g twuri. S toezzvit-nnsent rurant-d uddur i tmettudvt g umadval.

Tawada n twetmin n Marikan yudja d assa g ittumu umata n tmesmunin yusin anezwum n tmettudvt, g usxiter n id mma, maka wapli n yiseqsiten ayd ur ta yufin abrid s asidd, zund, matta wuddur d matta wass illan ghur temghart tamazight isulen yusin asentel n “tmara d usselku” ? Is as iqdva yan wass i tmettudvt igan aoemmar n txamt tamazight? Is as iga yan wass i tmettudvt nna itcan tamara g wagensu ula berrva? Agensu g usemghur n yicirran d twuri jaj n taddart, berrva g twuri g yigran, takessa, azeddam d wapli n twuriwin nna ighal umata id ghas iregzen ayd issnen ad aghen tanbadvt-nnagh. Maka ad ur nettu uddur as-tka tgherma tamazight i tmettudvt, tekka xef ighf n tenbadvt (Dipya, Tinpinan), tanezbayt (oedju Muh, Fadvma n Sumar) d watig n usemghur-nnes axatar iga-t arraw-nnes, ar nettini ugma, uletma; (uletma: ulet + mma= tin mma), (ugma: ug + mma= win mma).

G tmizar n wabudv n Merruk nna ur ta nn-igula uratsa (réseau) n yizerfan n tmettudvt, tsul temghart tamazight da tettidir gar tudert, tudert g ur illi isem n tejmilt i tmettudvt, tudert nna g ur illi umya n mayed d yuwey “wakud amaynu”, ula “tamurt n yizerfan n ufgan”, tudert nna mi ur nufi xes isem n “umerret n Sizif”. Seg mayd tneqqer tafuyt ar aghlay, tamara d tqweryant ayd tettirir tesfift n wussan afella n yighuliden d yidraren nna g mmuten Yimazighen izzvlen Arumey, tiwetmin d warraw n Yimazighen-lligh isswan akal s yidammen-nnsen, ur asen-d-yagh g umur-nnsen ghas imettvi d yiqecmiren g ur nnin ad ddren yimudar.

G wass-ddegh ameqwran, da nettazen yat tebrat i unna g illa ka n wul ittebbin, ka n tasa ittemmectagen, ad raren imik n yizvri-nnsen s tghemrin nna ittyattun g umezruy d yizerfan. Seg wansa-a da nettasey aghuyyi i akw mayed igan tamesmunt, tuddsa (organistion) g umadval ad awsent tamghart tamazight g tmara d usselku nna mi ittvef udabu algamu.

Ad qqnegh amagrad inu s yan wawal g nessemghur tamettvudvt tamazight, tanemmirt i id mma agh-issudvedven idels d tutlayt tamazight, atigen n timmuzgha, id mma nna iswan tamara dlent s xub mar ad nidir. Burzemt ay id mma! isul mayed akwent-igan afrag, isul mayed akwent-issnen atig, tarwa-nnkent tgula-nn ayedda tertamt.

“Wanna iran yiri-k, amm mma-nnek ur illi.”

Inzi Amazigh.

(Hasan UBRAHIM, Askuren g 24 -02 - 2962

07 – 03 - 2012)