Agraw n ayt umeskan amazigh g Meknas ass n 26/5/2002 (14/5/2952)

Tafirt n tmesmunt ASIDD

Ighra t mass Hasani Oali, aselway n tmesmunt ASIDD

Aytma d isetma, azul,

Tazvayt issun (Marhaba issun) ass a g agraw ad ameqran n ayt umeskan amazigh.

Agraw ad n wass a g Meknas iga win Umukuc anammas (Maroc central). Izriy dat as agraw n Nadur ghif tamnadvt tagafayt (région du nord), agraw Marrakec ghif tamnadvt tunzvult (région du sud).

Agrawen ad ddand deffir (dar) n ugraw axatar n Rbadv nna gan anmuqqar wis cradv n ayt umeskan amazigh, g ayur n nuwanbir 2001 (sin mgam d ayun). G agraw ad n Rbadv nemsasa ku tarbiot ad tesmutteg (tessujed) yut n tallunt (plate-forme) lla tini dig s mimec da ttannay tudsa (organisation) n ayt umeskan amazigh sga gher dat, d matta tarettva (structure) nna ghur s ittilin.

Eg ad ad xef nejmao ass a.

Ameskan amazigh am ceg nna tessnem, dig s tutrawin tixatarin ghif mi msasan imazighen, tutrawin ad zrin ghif sen zeg mayd ilula umeskan ugar n sin n isegwasen, bla isugwasen nna zrinin datas; apa isul ca isvhan gher tmazight ur illi, tsul tmazight ur tekcim gher tgherbuzt (école) hma y ad ttuseghra, isul ttilifizyun ur as issin, tsul “Lmahkama” ur as tessin, agwd Agherbaz n tgeldit n idles amazigh ghif mi isiwel ugellid nnex, isul ur irzvim, ur issentiy tawuri nnes.

Am ceg d, tamazight gher dghi isul ca ur as ili, maca tella tamunt n imazighen, pa nekwni nejmao asekka g ca n wansiwen yadven.

Tamunt ad nna y ad temghur, acku nekwni nna ghas lxir i tmazirt a, qqah imeghrabiyen winnex ayd gan ur ghur nex illi unfur (étranger), ghas wenna da itthasaben ixf nnes d anfur; ag ad mghvar llan winna ranin ad rzvin tmazight, zeg mayd ilula g amussu adelsan amazigh d nitni lla urezzun mimec ad as gin tafa y ad ibedd, g tizwiri ran ad ax smunnadven ag nna mi da ttinin “Ddapir Lbarbari” nna ur igin winnex, lla x ttinin araw n “Listiomar”, araw n Lyutvi (Lyautey) mghar ur is neccar ghas lbarud d imenghi, lla x ttinin tram ad tebdvum imezdagh n tmazirt ghif sin (imazighen d waoraben) d nekwni lla nettini imeghrabiyen d yun ayd gan ur dig sen sin acku tamazirt d tmazight ag tgan.

Al ig annayen is ddan imazighen gher dat mghar ag ad, ur asen iojib lhal, kkren dix ussan ad  lla urezzun can tmukrist yadven, ssufghen yut n tanfult g “Journal la vérité” lla tettren dig s ad yili yun uzref ad hecmen is ghif medden nna gan imezzazvaren (racistes) t m ag msin midden ad nna da skarnin tamezzazvart g tamazirt ad? Nnan imazighen, ayt tanfult lla ttinin is llan yits n imazighen nna gan imezzazvaren bnid n waoraben.

Imazighen nna mi ittyukes awal, nna mi ittyukes acal, nna mi ittyukes umezruy, nitni aggan imezzazvaren (Racistes) g tmazirt nsen!!!

Ag ad lla x issenoat is isul abrid n tmazight d imazighen ighezzif, tsul ghur sen tawuri, ixessva sen ad moawanen, ad msasan inger asen a ku mani llan, mec ran ad awdven ag nna ran.

Am ceg nna niwedv ad ax slin, ad ghif nex arun, ad ghrin i yits n midden zzef nex ad zrin g tilifizyun, mghar drusen; nghiy ad nawedv s ugar, acku “Lhaqq” iga winnex, apa ur da nurezzu ghas ad imghur waddur n tamazirt ad.

Hma y ad neddu gher dat ixessva x ad nesmures (réussir) i ugraw ad axatar, d tudert i tmazight.

Tanemmirt.