Asedvrer (Radio) n tmazight

Tura t’: Mayssa Racida (Bentveyyebn, Nnadvûr)

Deg wamas n talghut (information) n tmazirt nnegh, temmewc ict n tesghart, imara nzemmar ad nini tasgahrt. Minzi (acku) kuzv(4) n timar (heures) deg ûss n umezdugh arifi isghad asent, d ijj n wakud d aqudvadv attvas i yijj n waydud d aqubbani i tghuri d tira, yetcar xef tusna d talghut n umezdugh wapa.

Arni ghar s tamghart tarifect i war iteffghen ghar barra mahend ad temsawadv aked weydud s usrid (directement). D nettat i ntaf d tanekruft jar igudar  (murs) n taddart, isbezzaz xaf s s wemrusi ya nnes ad tesghed i wsedvrer n trifect acku tafgant (humaine) a asyeddi nnes d agmawi (naturel). Amya i yedja texs ad tessen amaynu, ad tessen ineghmisen, ad tessen marra min yedjan u d min d as d yundven di tudart nnes tamezvyant d tmeqrant.

Maca imara nekrebbet (méditer) kuzv a n timar mlih, ma ad day sent naf marra assaren (besoins) nsen jar ipallen (programmes) n usedvrer a n trifect? Mammec ntaf attvas zeg weydud arifi yxezzvar ghar ipallen a am ict n tbûrjet i zi yetwara qao amadval u ytemsawadv akid s. Dinni irifiyen imneoraq di tmura n uzewweg am nnedvni: zi tbûrjet nni i d twaran amur nsen d tayedjint i ghar sen ghar ucar n tmûrt nsen d ayt bab nnes. U manaya iticc anegh ijj n ugmudv (résultat) belli asedvrer a yetwatesra zeg taggayin (catégories) d timezvliyin (déférentes). Maca netta war day s bu wesmesker (changement) ura d aodar ura d tamarniwt deg wakud nnes. Arni gahr marra tighawsiwin a n utesri atig (prix) nsent i yteffghen zi tiweswin (impôts) n weydud a s ixf nnes.

Manya, zeg ijj n ughezdis, maca, zeg wghezdis nnedvni, imara nudef ammas (milieu) n usedvrer a n trifect, ntaf tutlayt n tmazight n tidett udrusen inni i d as issnen, temsawadven zzay s akes weydud arifi. Attvas zzay sen tarran amxumber a n usiwel s tutlayt ghar ulemmud, acku war t ghrvin ca. U da, mara necti d ijj  n umacnaw (exemple) netta d ameghnas mass Taoemmanti i yewcin attvas i tutlayt n tmazight u oad aqqa t'. S uya yuccel xef ineghmasen yettvfen ipallen d ineghmisen n usedvrer ad sqedcen (utiliser) tutlayt n tmazight mahend ad zzay s ggen  ijj n ugherbaz (école) iremmed zzay s marra wen d as itesran. Ma mara qqimen ineghmasen a ssefruruyen, tarezzvan di tutlayt n tmazight ad tafed tarenni tweddvar u ttembezzao. Mammec twarigh nec, tmazight d ict n tebrat deg wfus n mkur amazigh ad t issiwedv mani yedja u min di mma yiri.