Tawiza

Tnuhmuz di tassut, tennuhmez d afusi upu, d azermadv... Yuza ghar s yidvesv. Innejra yas, arezvment tittvawin nne. Tthada tanyart nnes, itoin tehma day s timessi,. Ioerbab n uxarrves ibarcanen temrawayen zzat i rxezrat nnes di tadjest. Moujjan d x iswingimen nnes hewsen as adji. Tekkar teqqim amen nettat di tassut tessaregh tfawt tengha

tadjest tesmûredvs it. Txarrvas di tanfust i gh ad tari twara ya. Teqqar deg ixf nnes: “Mermi mma yuza yi yidvesv tessnegh belli d tanfust i d ghar i yarezfen ad tarigh”

Txarrasv manten i gh ad tari amenn teqqar: Ma tanfust nni di dja txarrasvegh char uya x wenni i d yarewhen zi "lxarij" deg wbrid nnes ghar taddart isqad d areqqas ghar yemma s ad as d tesserqa aghyur nigh d "barwitva" i tsawent gh ad yari. Yemma s tesqad as d aghyur ad xaf s ini tsawent. Ighir as mmi s yiwi d attvas n iqurab ccûren war izmir i tkessit n tsawent. Asoa yeffegh as aghyur nni i

recwaghed i d yiwi d tarumect i d issedvfar anict n

henna s. Wdvan as ifadden. Tegga s recwaghed uca

yiwy it id ad tessara Arrif n lmughrib.

Tecmes tifact nni di dja ttari tendvar it teqqar:

-Upu!upu attvas i wrigh x ineoraq d uoarq, ad arigh tanfust i yurjigh idvennadv rami ca djigh di tebhirt n taddart nnegh u dinni "aqamiyu" n ozizi itsessaw ibuda n batvatva necc xezzaregh day s netta issenta itarjiji "itarranka" mebra ma ad day s yiri ura d ijjen, drust uca iddukki izzeobadv am acnaw arghemImmuzzaren itazzer di tabhirt da dipa mani mma itarezzva isekluten, ighettver ibuda, itparwadv imendi, itareddaj tidekkanin ar ami yewdva deg ij n wehbudv n waman. Nuzzer d ghar s neggêd x uqamiyu ad din innugh. Nessu yas tihenyin d tferwin deg whbudv nni, noaren ghar s ar ami d iffegh senni yedwer itazzer itett repwayec ammu d wam yin. Yedvfar ayi d ghar taddart, necc tazzregh ggwdegh x ixf inu igwdegh x taddart ad t yarder amen oad di tigwdi nni d tarjajat nni faqegh d.

Maca amares a war iccûr rxezvrat nnes. Tuca akid s d ict n tanfust war tecni i tira.

Txarres mlih tufa mahend ad tari tanfust tecna ad yaf umeghray ixf nnes day s ixessva ij n umaris ad issiwer x imxumbar n weydud d imunas nnes. Txarresv ad tari x tamghart tamazight d weydud d tirelli maca, tufa ad teffegh tanfust a d ungal maghar pa yamezruy pa ahewwas, pa izran, pa imettvwen oemmars ad t tsala. Nettat tarezzu ad tari taqudvat wapa. Teswizzedv ghar tefray amaru icsi yas idvewdvan. Tessenta ttari amen teqqar:

-“Itxessva yi ad ssentigh s uceddi n tenfust d mezri zi gh ad twaghar mahend ad t fesyegh ghar uneggar, tessars fus x tefray yessenta umaru abarcan itemraway yareccem tibridin x wudem nni n tifact tacemract.

-Yamna tettru deg wxxam, txeyyeq, baba s di remrah itzawar itmengha itnezwadv awarni wami yewta tamghart nnes s yijj n udubbiz jar tewwura n tghardvin tessesmadv it tettru di teghmart ura d nettat, baba s ytizzif yteghzaz tighmas izeooef deg wfus nnes yeqqar:

-Ayehhap! ayehhap necc war yenghin iref nni n Muhend ad as tvfegh deg iri ad dt smûredvsvgh din ad dt

ndvaregh deg ûnu mani dt ufigh yeqqim aked temcunt n yedji m”

Yeqqim x tbadut itxarrasv, temsenghan day s ixarrisven yarni yeqqar:

-“Tedjfed (divorcer) mara yedji m teffegh tanebdat n tewwart, tedjfed mara tudef d ghar m yemmas n wemcum nni n Muhend, zeoma Yamna nnem tubudv menzi ttegg mghar min d as yeqqar yiref nni n rmud n uzedjif nnes, ssuq id itasen ad t wcegh i mmi s n oziz s, uca nec frigh t”.

Nettat tari yuher as ufus tesgenfa drust mahend ad tedwer ad tari. Trettef fus nnes terpa akid s rami d tessiri rxezvrat nnes iyardv it utebpedv yudf it unexrio umi tufa iwdan tadfen d zi rkazi n wexxam nnes ijjen wennedvni, tecmummes teyru ghar s idvaren nnes tigwed, tarjiji tardvidvis amen tarjijin iseklan x ires nnes nettat teqqar:

-Min tarezzum? min tarezzm ghar i da?

Yarr d xaf s umeqran nsen:

-Ini yanegh cem mi tarezzud ghar negh? ca nedja mlih d cem i d anegh iparewdven tesmenghed jar ayi d rwacun inu.

Issiwer wennedvni:

-I necc mani d ayi yufa baba s n Yamna ira aqqa yi qqimegh aked yedji s? mermi d ayi yezvra? wi d as innan manaya? ar ami ad yawedv unebdu ad msemracen, ruxa ma oad ad dewren am ca djan?

Yudar udem nnes di tmurt, tessiwer temghart:

-Marra min d am nnan d ij n wezyen, azyen nnedvni ghar i, uyac ura d cem d tamghart ttacid s taycit n temgharin, uyac ura d cem zeg wydud a i xef ttarid, tessned, teghrid tezvrid tanfust n "tamghart d weydud" rebda d ajartir mara iparkusen n waryaz csin d abedjao,

nettat d zzif mara ifassen n tarwa nnes umsen timedji, nettat d ayer mani tzedjaoen waman yarewyen n ighezran d inessisen d tareywin.

Tennixses tewseq amettva yehma zi tmughri, texzvar ghar Yamna nnes uca tessusem.

Yesququo uyazvidv yarra xaf s wennedvni, msexzaren yewdan nni deg wayawya uca ffghen zi rkazi msedvfaren ijjen ijjen Tekkar tmarirt nnegh zi tassut tbedd tessedvfar asen rxezvrat amen ur nnes irettex izekkî, tenna sen:

-Maca tanfust oad ghar s aneggar.......

MARS-2000