Tawiza

Ufla n usselku! Mayed yaghen ighyal? Lpan! Ufen medden! Ighyal ayed issalin tagherma n igduden. Min ighyal ur inni wemya ad yili!. Midd upu? Tessend! Yal amdan tsul digs teghyuliyt, negh cwayt n teghyuliyt as d issektayen ig xsen ad hnejfen (ad semghuren iqerra nnsen) is ikka ar ikkat igenna s tiqqar, ar ikettu imezran d wuggaden (urines) n teghyal d tserdan deg ibriden, is iga walim utci nnes akuyas. Ghas ig ikrez ayed ittetta kra n temzvin.

Ughul agh d zarsen; tudja negh waqila teghyuliyt nnegh nuccka, tudja negh ad nettalegh ighyal, nettu awal nnegh amezwaru. Mellulent wallen nnsen, da smengharent ur da ttinniyent acu yellan dat atsent. Ifassen nnsen ferghen amm imegwran, anzvaren nnsen unfen amm ifran, sufen, setghen amm iwerzan n umekraz, azzar nnsen irka, tezdegh digs texxuct d uberduz... Llan ur llin! Ddren ur ddiren! mmuten ur ukiyen!... Ur ssinegh matta tmurt g d sfaffin amm yirden, negh igenna g d ttuttin. Rwasen ixenteffuten iddren g tama n tama n tudert...

Ah ad mer ten tannayed!

Seg wass g ten annayegh swingimegh g waddad nnsen id d wass, swingimegh g wacu zemregh ad gegh akken ad ten ssufeqqegh seg tlufa g ddren, negh ad ten slelligh seg tenfel asen imegren tigzi... Ur ssinegh acu sskaregh! Ttemran g udrar amm isellufen g tadawt n igdi, zedghent amm ibuxxa, nnaghen ghifs amm igadren...

Kerzen akal nnes.Tcen Seguyenna d

ittarew. Brin ul inw, ssendun ixxan g izuran inw, ur ssinegh mayemmi!

Ukigh is gigh yiwen dig sen... Midd ghas kra n teghyuliyt inw ayed i udjan xsegh ten?... Uress! Uress! Max allig tssusmed ar tsa..

Siwel... Ur da ttakzegh acu ran ad iyi sseknen imussuten n ifassen nnem, ula awerwer n wallen nnem. Ur trid ad tsiwled? Ad ur tsawaled! Mer day ur sar tsawled! Nek ghuri ammi tsawled ammi tfestid, yaf is tfestid! Ur hmilegh ad sawalegh d medden ur isawalen acku ur zmiren ad siwlen imkinna sen sawalegh. Ur trid ad am siwlegh ghef tmurt, ghef temzvi, ghef ighrem n Talat, ghef wudem nnem war tifiras... Trid ad fellam skirkisegh ar am ttalsegh tiqessisin ... Awed yan ur ighiy ad icced i wmezruy seg ifassen, min amezruy ur tezmired ad teddud ghef iberdan n imal ula tessend mayed msen imarawen nnem... Siwel iyi s tutlayt trid. Ghuri tutlayin gant kifkif... Smutter tiberyin n iwaliwen amm ijewyan n teqwlilt iddgedgen, rar imyagen (verbes) ad gen tizelghiwin d yils nnem ad ig amzil. Adj iwaliwen ad urgun seg imi nnem amm wuggaden, adj ten ad zzdigen agensu nnem, ssudun tudert g ugerjum nnem izwan, g kkefrurin isekkilen. Adj iwaliwen nnem ad afrawen s tlelli.

izri wakud nugari d tafrara... Ghas siwel, ur izmir awed yan ad am isiwel; la leqqayed, la yagellid, la amghar n ighrem... Awed ya awed yan.. Siwel iwr inn i tsudutin (institutions).Tisudutin nnsen xemjent. Sbughlu idles nnem seg ikarifen n Uwanek (Etat), swingem min tawda... Hrey imsulta (policiers) d ibniqen seg wallagh (esprit) nnem. Ur llin, kem tellid amm karif. Tisudutin, mami sufrent? Da kerrfent tilelli n uwdan, raren t d ismex...Tessend...Tilelli d tugdut ayed igan ikerkas ixataren d issenfel Uwanek n tsudutin akken ad ikref medden. Ur telli tlelli ula tugdut ig llant tsudutin ur d iffighen seg yidles n tmurt, seg udis nnes...

Kem rdel tent. Siwl iyi... Isekkilen nnem rwasen isennanen, akwmamen g tnumi nnsen, rwasen agari, akkefrurey ger tudert d tudert, negh tudert ger ukkefrurey d ukkefrurey...

Awal nnem iqbur amm imal, ighwba amm umezruy, istegh amm uwerz n umekraz. Awal nnem igma g tmurt, utan izuran nnes g tighbi n udrar. Sennestef tilawt, ssukkef d tikerkas seg izvuran, tekksed iselsa i tidet... Kkes asten min akuker, ur tgi argaz ula tawtemt.Tidet tga tidet. Ghur s yiwen wudem ur idd meyya... Tutlayt nnem terwas tudert, agezzay d uters, terwas agerruj, adrar d uzbu... Tagid tutlayt nnem berra n tsudutin, agensu nnsent, taqessist yadven ad am tt hkugh tikkelt d iddan...

Lhoussain Zergui.