Wami d ssuyes tallest ifiran nnes, x dcar nnex, nec deg udrar n Tewrirt iqedoen*1, asvemmidv izewyay imezzughen, nec taroiooicex s tigwdi i dayi zzvun ighuyyan n yitvan d wuccnan, xezzareghvd ghar dcar, ira yellan d ighrem, d axxam i gha d targwahegh, srusix xafi rehmer n imunas, s reoyat ag tiri n tayri, ass ad ghar nec wapa deg tewrirt iqedoen, tvya n tziri teccan ay tabridt, maca tabridt ad tezzvu s isennanen.

Ass nni umi day ggin car (akal) x imezzughen, nnanay isnga (enemies) kkar ad tuzud x iman nnk, kfa c zeg uoarrem x idurar d tqiccitin nsen, kkar ay aqzin ad dtewled (ad taghuld) d izem, ma a teqqimed lebda d asenoet; kkar qa tarwa n dcar trajan u dasen gha yemren, qa tarwa n dcar nnec dewren d yargazen, qa toawaden xafsen dewren d ighilasn.

Ass nni, tumert (joie) tuyar deg izvewran inu ag idammen, nnigh as min ra trajix war yeqqim d asitem, idwer d tiddet .

Smunegh d isvuraf msafadeghd xef udrar (tawrirt iqedoen), d itran, d taziri ira kidi yennumen; jjigh d ixf inu d umyey (mythe) jar asen, char tru tafukt –innumen lebda ttafay i fsaregh x iseghwan n uxarres, lebda toummix deg imettvawen, nix dagsen gharqex .

Ass nni ggigh d taharyadvt di teysart (tacsat) n tewrirt iqedoen, ffudex ad zvarex dcar inu, d iwdan nnes.

Ass nni; wap ass nni, wami ghari d fghen, tarsa xafsen toejjact, i xasen jjix, taoejjact nni d tenni i ten isdarghren, ar ami d asen qqaren idagharen, ass nni rux iyzem wur inu, iqqsay usitem inu; itra tghirex idwer d tidet, ass nni isix rehnudv inu, nnigh as ad dewrex ghar wansa (adghar-amcan) inu, ad rahegh gha yen day i texsen ad agwjex x toejjact nsen huma war day sdvarghiren zzages, zeg wass nni nec aqay tenqetmarex aked tewrirt iqedoen, arzzux ad ghares aryex, maca war zemmarex ruxa ffghen xafi yemcumen inu, ghedvren ay ifadden umi ten gha zarex, ruxa tsawent ad war zemmarex ad taryex .

Maca di tiddet, ad qqimex da tenketmarex aked tsawent ad, ura ma rahex /dewrex gharsen ad ay sdarghren.

amawal:

*1= yen n wedrar deg tmazirt n ijounen n kassita .

Tafuyt n usegnu

“Ghzigh deg ucal s ugelzim, arezzugh xef tesghart inu io day tenna yemma di temzvi “qa tetwacar ”. ghzigh s ugelzim ar rami das yarezv uqicc, idvwa isdagher ajenna, idwer am usegmi yetru tafuyt zzat nnes war tufi ad kides tarem imettvawen, war tufi ad ar s weorar ad teg anuri deg unuri ”.

Wami xzaregh deg ujenna ufix t yegnu (nuageux), kkarex ghar unedrar, arezzux x tfuyt di tghemriwin n ujenna, mmutyex ghar yetran; ufix ten war llin, isix deg uqenfid nnix deg ixf inu: “min yughin ajenna? tfuyt d yetran ma tiran akidi tanufra? nix netni weddaren?!!” ad yiri, ura di j zzaysen war yessin abrid i t gha yawen ura d wenni i t gha yaren.

Qqnex x imezzughen tazzrex deg idurar n inndven i dcar, d ighezran, cuqqex refyafi, zvrix zi tamara min war zvrin iwdan. zi tmurt a ghar ta, zeg ujenna ya ghar wa, arezzux x yetran i day iweddaren, zedja kidsen nnumex.

Wami uhrex zi ticri d tazzriwin, nnigh as ad ttux min day iweddaren, ad dewrex ghar dcar inu di yegga ughrum d waman, d ralla yamma, d sidi baba, d tarwa n dcar, d imeddukal. qa min teggex ammu war da ca.

Zi rex denni ufix illa tidet xmi gha xafs turezzud war tt tifed; am nec yarezzun tfuyt d yetran netta ass ignu (assegnu), thayyut temjarra ag tmurt.