Awru d i drust n issgusa ira tghiregh zzpir n tmettudvt war ghar s ansa jar tadjest issdvren xf Arrif, aghir a wa nita iruh uca yemzzvi, ar ami iwdvegh ad ssnegh belli tedjest day s titritin (awtem n itri) areqqent tmkabarent ak isekraf, txsent ad ggent tifawin, waxxa attvas n imxumbar djan izmmaren ad twassarsen deg webrid nsent.

Maca mara nekkar ad nexzar, ad naf di kuy yeyyar day s titwtmin mesrent tifras nsent xef isenflal nsent, s uya dg yeyyar n uzawan nzemmar ad naf: Taziri, Fattvum, Taghribt, Firdaws taziri… deg umezgun: Luiza Busettvac, Lkbir, Numedya… di tazvuri: suoad ckkuti… di tsekla: Fadvma lweryaci, Mayssa racida, Oica lkurdi, Oica busenina, Samira yedjis idurar n arrif, Naoima Farissi …

Akd tina i d idaregh d tinneghni i yeqqimen oad din attvas n twetmin isnnuffaren timkffitin (lmawapib) nsent, xsent ad ten tenghen deg ixf nsent, minzi deghya ssarsnt aghanib / tmijja nsent zzat i izerfan n waydud nnegh abitvririki (wen i di tareyya uwtem) issrusan tionkraf zzat i twetmin mahend war tt itejji ad teffegh ghar usenflul (création) war ttegg «am marra tiwtmin» tasghart nnes di ddriz, ad teghz isem nnes bac arrawen i d ghad yasen ad itt tmkttan (ad it fekkaren).

U nec ssentigh tarigh aya idviren (isettaren ) ssarsegh d jar tittvawin inu tihengarin timgharin i yewcin i taghrma (civilisation) d umezruy Amazigh di Tamezgha amecnaw Tipeya tazedjit ibedden deg wudem n uhewwes Aorab i tmurt nnegh, d Tin pinan tenn issarsen ddsas n ighref (peuple) atwargi di wadday n tiniri (ssehra). Maca ruxa nessen marra mammec idwer waddad (situation) n temghart di Tamezgha u di Arrif s unegmedv.

Naoima farissi, tamghart yarzin asqar

-Di lltva i yeodun tugha tamghart amec tssnem marra, d nettat itmudven izran di tmeghriwin, ussan n tmeyra… maca nshissf war d anegh iwidv ca zeg min nnant timgharin nnegh, minzi war itwazemmem ca iqqim di tatlayt (oral) u tanya war d anegh yiwidv ca ismawen nsent minzi wcint agra nsent i tagrawt (jjmaoet).

Amec nnigh belli tugha war tghiregh ghar negh timgharin timsnflal di Arrif, maca oemmars ma tghiregh bac ad d tass ca n ict zi radjagh n Ayt tuzin ad teffegh ghar yeyyar a yecnan, Naoima farissi yedjis n Midvar altvu, ansa ya i d yejjin imussnawiyn d imeqranen maci ghi di Arrif wapa di Lmerruk amen ikmer.

Asenti n tezrawect nnegh ak izran ira yedja s taorabt (nessen marra mayemmi !!) maca taycit nes s ires n tmazight tfaqq d akid s zic, ad yiri tufa ixf nes deg ires n taymmat nes, taca s tarzugi d tiqesst nican s nbghar ma ad tssughel deg wadji nes, s uya itarsa ghar tmazight amec twarigh necc .

Da nita oad tmekktigh min day i tenna tazrawect tamqrant nnegh Mayssa racida belli Naoima tugha tccarec deg unpil (programme) i tugha itegg arradvyu n tmazight “awar di rmizan” ak wattvas n izrawien i ghar yedja ruxa ansa nsen ameqran di tayyart tesklant di Arrif.

Naoima tesntta ttari izran xf 13 issegusa, tura xf tayri xf izalen (les valeurs) isvbhen, maca deg ussegwas n 1995/1996 tura taqessist nes tamezwart s tmazight .

Naoima am ticcemt (majorité) n irifyen d trifeyin uran xafsen atlao d uzwag ghar tmura n midden ar ami i xafsen belloen tiwwura da nita deg ujemmadv a.

Di pullanda nican di ruterdam, tazrawect nnegh war tennughmar deg wesqar, upu, teffegh ghar tawuri (rxdmet) n tmsmunin, ruxa aqet d tamsladvt di tmsmunt n timazighin n Nederland, amec i di tcac deg wattvas n imsagern n usefru di pullanda, u ameggar qahh wen itegga tamsmunt n Sifakes di Utrixt deg usemghar ines zg useklan d umarir Muhemmed Caca .

Naoima ass a tssitim bac ad tyru tiqessisin nes i tura deg ijj n wamud n usefru.

“Araghi” n Naoima farissi

ak tighri inu i isefra n utecmat nnegh Naoima, ucigh ak tingimt inu tettvaw deg imedvlanen itegg taqessist nes itesszwel s “Uraghi” tameggarut a day s tifras n izran izaykuten (iqdimen) d marra min ksin s tnixt nsen yecnan iccuaren s tebratin

amec i day s asmaynu nnes deg wattvas n ighezdvisen, ujar xmini tehttva asekkil ameggar zi kuy izri i ticen i tqessist ijjen wazzri, itejja atarras id as ghad i ghasen ad as ikemmer ughir minzi izran n Naoima jebbdven tittvawin d taynit attvas gharvsen minzi jar ibehrar nes nzemmar ad naca ak udvuoouq, ufqqus, tarzugi, iyezzimen, aghedjuy, acemmudv… itejjan taqessist day s axeyyeq maca axeyyeq ni it id fghen zi radjagh n waddad n waydvudv arrifi d tghuni ismunan aryaz d temghart.

bettvu nes xf wen itxes yegga i tezrawect nnegh azzuyett, xenni tetragha ad tax ad msawadven ca n wass nniden:

“ragha ayi d mara isqinfedv wur nnec, zeg wussan it qemmhen

Ragha ayi d mara twdvidv…di tudart itwadvoqen

Ragha ayi d ad tafed, wur inu d wur nnec di raggwaj teddaren”

Azuyett war yedji d ameggar n tsekna (souffrance), i ghad isighan ad tsxeyyeq yiman, ad tarzu xf ufugh zzay s war ttif …xenni ad tarr tvram di tudart ityejjin ammu

“ini anegh a tudart, ma war ghar sent ameggar…

Ghar tehuja nnem yarzigen .

Nigh, ma war ghar negh bu wemcan

Deg ussan nnem mara sebhen

Aqqa nteddar xf idvennadv, ma iri ndvfes tifray a i yeqqimen”

Ghar umeggar war yeqqim ad inigh mghar azul d ameghnas i Naoima farissi, azul d ameghnas i marra timgharin nnegh di Arrif, di Tamezgha …ar ghad temksi tadjest netraja attvas zi temgharin minzi nitenti ikisin tisarutin n imar nnegh, i nssitim ad yiri yiff xf yidv a.