Tawiza

Tamnadvt n Arrif, am marra timura n umadval yeddarent timessi/takat n wdrar(volcan) deg idj n wakud d aqbur n zik qbara/ciyygan. Din tugha tamurt teddar ict n trarit/amuli n wzvri nes i d as ucint tiwugha ugamma amcnaw timessi n wdrar yessezraghen/yesmentilen arjiji n tamurt u din tarecceq tamurt tessanaf tisedjya nigh d isaffen jar/inger idurar d tiwririn u tamurt i d yusin xef tamma/idis n wayrer/il tnesdam ituffu d azgen is d tagzart ula d ticcadv n idurar tedwarent d roaywet.

D tidet d wa d udem n tamnadvt n Arrif. Ass a ad naf tigzirin nigh d tighisa d timezvyanin d tisedjya u arni ghar waya ad naf ura d azvri ugamma n tamnadvt n Arrif yarwes gi cra n tmura yeddarent ura d nnitenti akud nni n tmessi n wdrar. Zi tmura ya yetwassnen s tawaghit a ugamma ad naf amknaw tamurt n igwanciyen (tigzirin tikanaryin). Tessenta tilit nsent jar 20 d 24 agnid iseggusa zrin ar aseggwas 1492 deg uzveggu/azway n Imazighen d umedvfar nsen Columbus ar tmurt n Miksik kkin xef tigzirin tikanaryin u din tugha idurar n taghremt n Teide sul/zeddigh qqimen sfuffuyen d timessi yessiwdven atuc yedj n wazvri drus mani/anda ad naf am/zund netta maca idurar d tiwririn n tagzart Fuerterentura ad naf udem t tiddi nes d idj ag cra idgharen deg Arrif.

Da ad nidar ad nejbed awar xef idurar n Uoarwi ad nessen min ituc ad yini wawar a u maghar idva s ucin asemqar a "Aoarwi" nigh roaywet. S wawar n tidet i d anegh iticcen ict/yat n tmatart temsed belli tamnadvt n Arrif teddar ura d nettat akud n timessi n wdrar.

Roaywet d adrad ttiri ghar s tqiccet maca awarni timessi i ssin d ghad yesfin tessefsay ticcet nni ttijja idj n wehbudv sennej ad twarid ghar s imi. U imi nni qqaren as roaywet (Aroui). zeg ughezdis nnidven ad naf gi ddemnet a idgharenmanis tteksen uzzar. Arni ghar s admam yedjan deg wayrar/ilel. S qqao tighawsiwin a mmrent anegh s tidett belli car/akal n temnadvt n Arrif yesgam timessi yedjan d mezregh/amentvil n w arjiji u car/amnucceg w akal zi twasnent abaru n tmura i d yendvent i w ayrar umrir anemmas amacnaw tamurt taghriqit yemdedjaqen t tigzirin s w arjiji n tmurt i tugha yeccaten s w attvas deg w akud nni n tuhuwsa irumiyen, arjiji n tmurt yessiwedv ad yeghdver attvas n igherman i tugha decren/skan ijedjdjiden. da ad nini belli igherman iqburen n tallit irumiyen intaf qqimen d ass a d igudar wdvan nzemmar anini belli azgen/ahric ameqran zeg sen wdvan s w arjiji n tmurt. Ura t tamnatv n Arif am nettat am timura n nedven msaren ges dunnit/caygan n warjijen n tamurt deg min yezrin xas/meqqar nessen belli drus yetwasnen deg w annar a tarezzuyin urap/ulac maca din mind iqqimen d remzaghat teddar xef irsawen n yewdan yeqqaren belli taghremt n Nkur taqburt ighedvr it warjiji n tmurt ura d Ibeqquyen yedjan d imezdagh imenza n Beya wejren belli tugha temsewdva deg wammas yekka ighzvar jar as.

Mara nessen attavs n tmura i d yendven i wayrar umrir anemmas ddarent timessi n wedrar u twawtent attavs n twaratin/tikkal s warjiji n tmurt ntaf cra zi tmura ya tentam nigh temmut dag sent twaghit a ugamma maca gi temnadv n Arrif teqqim arziyyet a teddar ar ass n 24sinyur2954/04 deg wa mas n idv tewewwet temnadvt n Arrif s ict n ticti i d yessinfen timettanin, inegzam/imugas, imeodar d ib jiren tar imarr wen/imawlan nsen, tudrin ntutant surent ar ucar uffun d i dan tar ixxamen nsen. War ntettu tamekrazt yedjan d acemmac n usexnitar n temnadvt a minzi/acku ura d tamekrazt tewdv it twaghit a s tarezzvi n taregwin yessawadven aman i wsessu. Arni ghar s imuddaren yemmuten izemmar ad ssinfen rattvan. Min yujaren manaya netta d arjijen yeqqimen temsedvfaren zi twara ghar tennidven.

S marra tirewt t temghar n twaghit a tesrur d tigwdi deg urawen, tigwdi yedjan d ufugh n imezdagh ad jjen tamurt nsen maca s ict n tdawra ghar umezruy n imezwura imenza ad nessen belli tufgha zi temnadvt a d awezghi. Nezvra awarni useggwas n 2944/1994 u izemmar ad yiri zdat useggwas a te sar ict n tufgha n wattvas n imezdagh mmutin ghar igherman nnidven amacnaw Tingi, Aoric, Tittvawin d yennidven maca ad yif mara nessen min ten yejjin ad fghen? Mamec iga ufugh a iggin? U min onan yinni yefghen? S tawariwt xef iseqsan a ad naf amentil i ten yejjin ad fghen war yedj ca d arjiji nni yewtin deg useggwas 44/94 amak tghiren attvas n iwdan minzi din ufughen zdat useggwas a u yenni yefghen azgen ameqran zeg sen teddaren di tmura n barra. Amentil i ten yejjin ad fghen netta d abrid amak qqaren netnin u din ura d yenni yefghenarendad i tmesghiwt d menziwt minzi ksin s tmughri nsen belli tamnadvt n Arrif war deg s imar n usexnitar u yetghima abrid lebda d amentil. Mara nesseqsa xef ufugh iggin war nzemmar ad nini belli yina zewgen s tidet tamurt. Tamurt mani irur utarras d car mani ihnunnedv tghima tadewra ghar s teddar. Tugha gi twengint am tferyunt xef tqesmat minzi ntaf ussan i tekken deg Arrif deg usijji i t teggen seg useggwas ar useggwas ujaren ussan i tekken deg igherman mani mmutin. War ntettu ci tawca n tudrin yemmarnin deg iseggusa ya yezri awarni i wsenfar n ubrid n ayrar iteqnen jar Beya d Malagha i d yarin asfayren i wudem n imezdagh d tfawt i temnadvt d usexnitar is maca awarni arjiji n 24 sinyur yedwer d udem izekmen yenughjet abayrrep.

Mara nennehqar ghar ughezdis n umezruy ad nejbed iman negh ghar tudart n imezwura nnegh imenza ad nessukkes tidet yedjan d tamatart iqqaren belli tufgha d usinef n tmurt d awezghi maghar/max tawaghit ugamma din min t yujaren u nettat d tudart n zik iddaren imezwura.

Mara nesseqsa xef tudart a nzemmar ad nini belli imezwura zedghen tamurt s ur d ameqran zzvidvren i timarin n wakud nni yedjan d isufay n waman, idefrawen, d inuzvar i tugha itekken s wattvas gi zik yesnughan/ismighin tudart acku/minzi anzvar/ageffur mara ikka amalas iccat amak qqaren itijja iwdan ad ddaren razv maghar ikeccudven tghiman uffen ttertren u wen yeggin tawiza igaw/izdi ikeccudven ad yaf min ghad yessaregh ad yesnen maca nessen deg wakud nni attvas teddaren zveredv war zemmaren ad ggen tawiza. Arni ghar manaya/anecta aseggwas n razv d tzawa/taghart yekkin xif/af tamnadvt n Arrif yedjan d idj n arziyyet d tameqran temsar deg weydud n Arrif. Amak qqaren imenza belli dunnit n iwdan yemmuten s razv, smiffen tamettant deg ixxamen nsen ura tutra, ccin min war itmeccin huma ad qqimen ddaren x ucar n tmurt nsen yif zeg mara fghen zewgen. S tirugza n imezwura yeqqim Arrif yetwazdegh sul ad iqqim yezdegh oemmas/urdjin Arrif ad yedwer t tamurt mani qqaren i tguyt Trayetmas.

Yewta warjiji n tmurt awarna s yal/ac yedj mighar itara tawaghit a idj ad yini d aweddi/tamarrut n Wakuc, idj nnidven ad yini d tawaghit ugamma wapa qa t tamurt tesmeskr tessenfel qic i xef tbed maca tidet yedzen am unexxar teghighi am ughi ntaf it gi tinfas/tihuja n zik i talsen tiyemmatin. Ntaf itas d gi tenfust belli imuddaren ssawaren, tedja radja uxxam, issawar ujenna/igenna, tessawar tmurt d tidet tamaccaput war tedji d acettvih nigh d tiserkas n usudves. Tamurttessawaramak yessiwer Arrif deg wass 24 sinyur 2954, yesghuys iman is yesnekkar taghuyyet xif tanbadvt i t yessinfen yekes aghemmus x tidet i weddvaren d ccerwaw i drin xef tittvawin waryezvrinmayn din.