Tameddurt n Muhemmed Cukri

Yura t: Saoid Xuttur (Pulanda)

Amaru Mohemmed Cukri tugha t’ d aqubbani arami ghar s tiwedv 21 n isegwusa.  Deg ûsmudder a temmewc as tnufsitc bac ad yadef ad ighvar deg ûgharbaz. Awarni wadaf nnes ghar tghuri s ca n isegûsa, yessenta ittari.

Temzvi nnes tugha war tnewwec ca. Razv i yreqfen Arrif deg isegusa nni, d wattvan n uma s; manaya marra yegga xaf sen aghir netta d imarawen nnes bac fghen ghar tneddam nneghni, Tvanja d Tittvawin. Deg ûdlis nnes amezwar yura “aghrum abazin”, yura umaru temzvi nnes di Tvanja: tudart deg izabuqen, timettawin d ubernedv aked imcumen inni war ghar yedji bu tzveddight.

Ura d ict n temezzult (imprimerie) tugha war tzemmar ad tnebbedv/tzoem ad as tessufegh arraten i yura. Mri war dji d asedwer (Traduction, asaghul) n Tefransist “Le pain nu” iri adellis war itif imeghra nnes di Maruk (Deg ûmezwar yettwasufegh s Tegranzect). Aghmis n “al-Muharrir”, di sedyûr 1981 yessufegh zeg “aghrum abazin” 5 n isennifen twadvfaren zeg ûdellis mani tugha deg wakud a yettwaged/yettwattvef di tmedvghar nneghni.

 Zdat i wengal a tugha Mohemmed Cukri itari ura d imegrad d tenfas yessufugh itent deg ighmisen d tesghunin, tinfas tismunin “isidv/anafal n nwac”. Zeg ûrraten i war yeffighen din timezgunin, ungal, d imsagaren aked Jean Genet d Tennessee Williams.

Cukri deg isegwusa tugha i di yarecceq s ungal nnes, 1935 ar 1956, tugha Arrif adu wesdar n usebbanyu (espagnol). Di Tvanja d Tittvawin i di teodu temzvi n Cukri. Cukri irur deg Ayt Cicar u netta d Amazigh n Arrif. Attvas n Irifiyen yeksi ten Franco bac akid s mmenghen aked ughezdis nnes mgal i wmenghi yekkarn jar Isebbunya. Ura d baba s n Cukri tugha ksin t, maca yarwer d. Tawija nnes usin d ghar Tittvawin, maca Cukri tugha ifarn tamdint n Tvanja bac ad day s yenfifer. Tamdint a i ntaf deg ûneggar n udellis teddar ij n umyawaz n idammen zdat ma ad yettvef Maruk/Lmughrib azarug.

Timsutal izverdven yekkarefsen i di yeddar Cukri, d tina d dduzan i t' yejjin bac ad imkabar aked tudart. Tukkardva, tamesruyt (prostitution), aman n udvir d rkif. Yeccat zzay sent deg idmaren nnes. 

Ungal “aghrum abazin” d ict n tghawsa war kid s nnumen Imarrak s ddvab nni i zi yura. Amaru ifarn/idvfar ijj n webrid n tira s yijj n wawar yepwen (ddrija) ca n imuren/twaratin s Tmazight. S tidet d taryazt i zi yura Cukri tanfust nnes mani d as yemmewc ijj n wazal i wdellis ra di Maruk ra di barra. Mohemmed Cukri yudes attas x imura imarrak i ytacan belli nitni udsen timsutal n tmetti d tsertit n tmurt nsen.

Asedwer zeg wdellis nnes “aghrum abazin”:

«Jar ihenjiren nneghni qqimegh trugh x ozizi yemmuten. Ca zzay sen ttrun ura d nitni. Nec war ttrugh bu s jjepd illa mara yewt ayi ca n yijjen, nigh mara weddvargh ca n tinat. Twarigh ura d inni yemgharn ttrun. Arrif day s razv. Tzawa d umenghi.

Tameddit nni war xsegh/zemmargh bu ad sbeddegh zeg imettvawen. Razv iteqq ayi. Tedjghegh idvewdvan inu. tarrigh, maca war d itteffegh walu zeg wqemmum inu illa ifiran n ireyzazen. Zi twara ghar tenneghni teqqar ayi yemma: “sqar, ad nuyur ghar Tvanja. Din aghrum ikasex. Xmi din ghad nawedv war teqqimed oad ad ttrud x weghrum. Iwdan dinni tetten ar ghad bbuydvn.”

Uma Oebrqadar  war yettru ca, yemma ttini/teqqar: “xem uma c! netta war yettru ca. I cek tettrud!”. Xezzargh ghar tefras nnes i ywarghen d tittawin nnes yeghlilcen uca iri sbeddegh zeg imettvawen. Awarni cway uca iri ttugh sbar i dd zzay s ssufudegh.

Yudef d Baba. Yufa ay i ttrugh x weghrum. Yessentta yecca t’ ay i s ighebbar/arcur d idubbaz:

“Sqar, sqar, sqar, ad tecced ur n yemma c a mmi s n tmesruyt/tmedrunt/tqêhbect”.

Yeksiy ayi deg wjenna, iretx ayi aked tmurt. Yettvf ayi s ighebbar/arcur ar ami ûhren idvaren nnes d nec ssuffegh di ssarwar.

Deg ûbrid nnegh ghar wetlao, nuyur x idvaren nezvra timeghsa n wudji tendven asen t ijdvadv ibarcanen d yittvan, ccum n waressudv, isarewdvan ftutsen, tikeccawin d idammen d rewoi.

Mani mma yetvf anegh d razv d rwehran neccat din taqeydvunt nnegh uca yri ntesra i wesbuoruy n wuccanen. Iwdan, ca n imuren/twaratin netvren imettan nsen mani mma wdvan.

Uma ayenni ma yiwedv itusu. Amen ggwdegh Sseqsigh yemma:

-Ad yemmet ura d netta?

-Lla. Wi d ac t' yennan ad yemmet?

-Xari yemmut.

-Uma c war yetmetti ca, netta yudven wapa.

******

Di Tvanja war zvrigh qao aghrum nni xef tugha d ayi tessawar yemma. Razv ura di jjennet a, maca war ttugha bu zi razv nni yneqqen.

Xminni d ayi d itettvef razv tefghegh ghar ij n dcar  “Oin qtiwet” arezzugh deg ifuradv ma ycetv ca zi min itemwaccan. Ufigh ijj n uhenjir ura d netta ittoewwef zeg ifuradv amacnaw nec. Deg ûzedjif d ighezdisa nnes tibukkar. Idvaren d iferkahen arudv yeqqars. Yenna ayi:

- Ifuradv n temdint tifen ifuradv n dcar nnegh. Ifuradv n irumeyen tifen inni n yemsermen.

Awarni umi fghegh x manay a, dewregh ca n imuren/twaratin, ggûregh yigwej x dcar nnegh: mghar nec wapa nigh aked ca n ihenjirn n ifuradv.

Ufigh ict n tyazvidvt temmut. Sghidjtegh as ghar yedmaren inu uca uzzregh ghar wexxam nnegh. Imawaren inu di temdint, uma yezzver di teghmart, azyen nnes n sennej yuri sennej i tsunta. Itarra nnefs s ughir. Tittvawin nnes yemgharen i yisrawen hettvant adaf n tewwart. Itwara tyazidvt. Tfaqant id tittvawin nnes. Yesfarnen.

Yettnehmaz axmi d itfaqa zeg wnaxi. Itusu s tumart, ufigh rmus. Itusu ineggef. Arrigh azedjif inu arendad i temnit/rqibetc: mani twarigh yemma rebda ttara ssenni aghembbub nnes uca iri tzvadja. Nnigh s jjehd: “bismi allah allahu akbar”. Ammu i twarigh imeqranen teggen. Gharsegh as arami yeqdvu uzedjif nnes. Rajigh bac ad azzren idammen nnes. Rebbzvegh tet atagh ad d zzay s fghen idammen. Uzzren d drus qquren zi txubbicin n yiri nnes. Di Arrif zvrigh ten gharsen i wcari. War ssinegh ma n t aydud. Ggin ijj n ubuqar adu i yiri nnes i yttuzzuren s idammen. Yccur ubuqar wcin as t' i yemma i yudvnen. Zrigh ten tetvfen tet di tassut nettat temkabar akid sen war tagi ad tsu idammen. Zveyyarn xas bac ad ten tsu s ughir. Yexnunnes as ughembbub d warrudv. Texnunnes di tassut uca xenni tesqar iri tparddef s ca n wawaren war gzin. Mayemmi war tuzzuren idammen zeg iri n tyazidvt a amec tugha ten zvrigh tuzzurend zeg iri n icarri? Ssentigh ssencafegh tet. Srigh i tnight nnes:

-Min tegged? manis t id tucared?

-Ufigh tet tudven. Gharsegh as zdat i ma ad temmet. Seqsa uma.

-I yisidv!(am tekfar teks ayi t). Bnadem war itet amûrdvus.

-Nec d uma nemsexzvar deg waya waya s ict n tmughri txeyyeq. S snat/tnayen itnegh neqqen tittvawin netraja min ghad necc.»