Araghi i ymazighen n tmura n barra

Yura t: Hassan Ahfidv (Aliman)

Itxissva ad narzv ttvabu (Tabou) ya iyarddfen tmazight, iwfeqqusa innughen di tmijja n n tmazight zeg isggusa n 56 ar wass a. U nican ass umi yeffegh uhwwes afransis d usbbanyu zi tmurt nnegh, ass umi tekkar tanbadvt (gouvernement) tamezwarut- adu ukabar n "listiqlal"-imraddafen n Tasertit  n tmura n waoraben, ayt bab n  tuggemdva (Orientalitarisme) yihsvaren ssentan ad ggen tasertit n wesoarreb di tmurt nnegh. Nnan qa iswi nnegh ntta d hettvu n Lmughrib zi min id yijja uhwwes Afransis. Nnan ad nehdva Lislam i warraw nnegh s tasertit n wesoarreb.

Maca ruhen ussan usin d wussan netwara billi iswi nsen yudjegh attvas. netta war yilli d hettvu n Lmughrib >zi Tafransist, maca netta d qettvu x tmazight d umezruy amazigh, d wefran d wesyard n remjaj imazighen s marra min ten iteqnen ghar inuba (Les aïeux) nsen imezwura, ghar taryazt n imazighen d yimjapden ijapden s ufus nsen ar tudimt taneggarut deg idammen nsen, ar mani issufghen ahewwes Arumi, ar mani ssuryen bandu n Lislam, iwyen d tirelli i di taddaren ass a umi qqaren “iwataniyyen”.

 Manaya mamec innigh netwara t’ am tfuct n wammas n uzir. War din min ghad ffaren, minzi tarwa nsen ssekkan ten ad gharen Tafransist d Tasbbanyut deg igherbazen imgharen di Fransa, ad gharen ilsawen n midden ad snen tusna n irumiyyen. Tarwa n ayt bab n taseretit a n wesoarreb ssawaren mghar tafransist di tudrin aked imawren nsen, war ttesrid ghar Mama, Papa... U nitnin tiraren x weydud amughrabi -amazigh- qqaren neccin d aoraben, neccin d imsermen, neccin d ayyawen n .....  Manaya marra i d yarrin tmazight tweddvar di tmurt nnes jar ayt bab nnes, tesghuyyu tesghata. Taqqim tmazight am tayya di taddart nnes, tedwer am usidvudv wid ghad yeodun ioejjen xafs s idvaren. Tasertit a n wusoarreb tarra tmazight war zzayes n teg walu, d ij n wawar itxissva war itiri mani ittiri taorabt, “awal n Islam”.

Advan n wesoarreb d “Lfirus” (Virus), d tzura ya n yixsan yarddef d imazighen nnegh ar tmura n barra, awarni umi yeqdva x yinni di Lmughrib. Tasertit a iggin ayt bab a n wesoarreb tudef d di tudrin n imazighen iteddaren di barra, mebra ma ad acan aked tidura (conséquences) nnes. Imazighen iteddaren da deg Uruppa mara tessiwred akid sen s tmazight x ca n mmacca nigh x ca n tmura tmenzant, nigh.… ad ssentan ad ssawaren mebra anggar, maca mara tessiwred asen x taghawsa n tmazight ad cek arren war tedjid d amesrem, qqaren neccin itxissva ad nghvar taorabt mayenzi nettat d awar n Lislam, tarwa nnegh ad remden ghar taorabt, mara nesghar tmazight i tarwa nnegh ad tafed n tettu taorabt, awar n Lquroan. Maca maghar war qqaren war nesghari bu talimant nigh tapulandect i tarwa nnegh bac war ntettu Lislam???..!!

 Imazighen n tmura n barra waxxa teddaren di tmura n tirlli d izerfan n ufggan d tadimuqratit, maca rebda twaran awar x tmazight d ij n ttvabu ad t’ nej ghar ij n teghmart war x afs nessiwir, nigh ad ac inin jja negh zi tsertit, jjad nec aghrum di repna. Unitni teqnen izvuran nsen ghar usammar, waxxa ssawaren tmazight qqaren neccin d aoraben, mara isseqsa ten ca n ij min teonid yiqqar nec d aorab, mayenzi war yissin nican tanettit - tamaggit- nnes n Tmazight. Manaya marra zi tidura n tasertit n Wesoarreb icuqen di yarrimet n imazighen teskef aduf nsen.

 Araghi inu i ymazighen n tmura n barra netta itxissva ad snen billi Lislam yuss d i yiwdan marra n ddunect war d yussi i waoraben wapa, neccin d imazighen war nedji d aoraben, d imazighen i yehdvan Lislam war dji d aoraben. Itxissva ad nar taynit i wmezruy nnegh d tussna nnegh n tmazight war ntettu izvuran nnegh d car mani nima.

 Tudart i tmazight di tmurt n tamazgha, neccin d imazighen ad neqqim d imazighen, xsen nigh war xsen ayt bab n tsertit n wesoarreb.

(Ahfidv Hassan, ass n 20/10/2003)