Teggwdegh xafem

Yura t: Mimun Amsebrid (Biljika)

Tamessizwarut

Zegw ami d ffghegh zi tmûrt inu – s ughir – nec tasegh d ghars ict n twara nigh d sin deg wseggûs. Usigh d aseggwas ad deg wyûr n yebrir. Ucigh akid ca… Ucigh akid tamûrt nnegh tudven. Tughat tudven attvas zegw ami, maca ucigh akid wattvan nnes yarnu, yemsarraw, yedwer yessaggûd. Usigh d ssinni xeyyqegh, xeyyqegh attvas: wdvan ayi ifadden. Amenni i qqimegh xeyyqegh… Di tmeddit n 16/05/03 urigh awaren ad id ghad idvfaren. Saligh tira uca ttvsegh. Tiwecca nnes, umi arzvmegh tittvawin inu, swizzdvegh ghar arradvyu: "attentats suicides à Casablanca, au Maroc." Tennedv zzayi tmûrt. May kid ucigh war yedji ca d tawacit n umedyaz i djigh wapa! Yeffegh d wamzviw i tugha ssiccan di tadjest attvas zegw ami. Yeffegh d wamzviw i tugha ssyamen.

***

Teggwdegh xafem

Teggwdegh xafem, cem i ybedden

Cem i war ghdvirent

Tiyyita n iseggusa d wussan

Cem i war ghdviren imenghan

Cem i yarnan azagh

Tarnud arazv. Tbedded i Yidj d Wadvu

Tbedded i Tfuct - tzzraf

Tbedded i wenzvar, waxxa yeghza arrimet

D addriwen

D ighezran

D iyeddimen… waxxa iyezmi cem

Tbedded i yinni yexsen ad cem awyen s ughir

Inni i war yessinen ad cem xsen.

Tbedded!

D tiyyart n uzemmûr

Izewran wtin deg wadjagh

Tisedvwin wcint i wjenna

Tcettvhedv akid wadvu mays ma yekked

War cem yiwi wannay, war temrudjyed

Yudrus min d tticced.

Maca yif

Maca yizidv

Maca yecna… Akid uyenni teggwdegh x afem!

Teggwdegh x afem zi tzura nni i cem yudfen

Ttet am ur

Tsekkef advuf

Tsess idammen, tqettvu izewran, ttijja irem

Ttijja t i wswadv n barra

I tittvawin war yetwirin

I yinn i war yessinen

Nigh war xsen ad ssnen

Inn i war yezdighen.

Teggwdegh x afem.

Teggwdegh x afem

Temsaraw daym tzura

Ttet war tyiwin, tfeytas icem

Yuyur daym arecwan:

S wur i tugha tettvfed, yettewwêt wur nnem.

Wtin cem ghar wur

Ur nnem d imezdagh nnem

Ufin xaf sen tawwûrt:

Ssudvsen ten, dvarnen ten

Ccin ten, ghedvren ten

Sekkwdven war twirin

Ttun ixf nsen: war urezzun war smussunen.

Urezzun tazyawt npra yadvir

D Sizif n wengur

Tazzren xafs, dveffaren t

War twirin, war tesrin

War urezzun x yiman nsen, war ssinen mayn yedjan.

Teggwdegh xafem!

Teggwdegh xafem!

Cem i xef uzzren idammen

D ighezran

Cem i xef hdvant tmgharin d yeryazen

S arrimet nsen

Hhdvan cem zi Tfuct

Zegw advu

Zeg innidven.

Teggwdegh xafem.

(16/05/03)