Agdud n tghessiwin (Tafult 3)

Yaru t: lhoussain Ideflawen (Tinejdad)

...Irwi wudem n tudert arway axatar, amm usidd amm tallest, amm tawda amm umdaz... tudert tedwel amm tqecbut n udrim mm yiwen wudem, amm upeddawi iskuttun ghef wayyar (vide) aderghal war areksen, ghef wayyar amatraw ittettren anebgi n Rabbi g twengimin n imeghban.

Mani gher netrara udem tura? Mayed ad negh iffer wakud? Mani gher ira ad anegh isselkem? Ifesti ur issufigh, ur da yesselkam gher akal n tudert. Ussan nnegh nneflen, kksen iselsa. Da tteddun g izeglalen min iselsa. Da tterridan ghef tmedvlin min iselsa. Ussan nnegh nneflen igellinen da

kemmin tizegnin n wagirruten iwraghen, ar ssumumen tismedlin d tqerqacin n uwiski... da ttelghen tizukin n yidvan amm izgaren ittelghen tisent... Ucckan g izniqen, seffdven iperkusen n iwdan s yilsawen nnsen iberkanen, zzenzan temzvi nnsen, rkan, xnunsen, da sdvidviyen... Djirt

ssun iqecbihen n ukartun ddaw iseghlay (ponts), ttlen amm ikwurdasen g iselsa iqburen, smunen udem d ifadden ar twaragen s unerghi n tafuyt d tqecbiht n ughrum yatvfuten d kan tfassin timelwaghin itturaren g tfekkiwin nnsen timahulin..."

**********

Tenzva seg uswingem nnes is tufa anamek n tudert, is tezmer ad ten tekref, teldid awal seg idisan nnsen. Tghiwel deffer n ukabar ad asen tsiwel ghef tifi nnes, ur nn tessakel awed yan, ddant tghessiwin munent d iberdan n udrar izel unaghiz nnsent ghef iselliwen... Teqqim ghas nettat, ur tessin acu tesskar ula mani gher trara azellif nnes g isfiffiy uzwu.

***************

Ucckant tgellinin ghef iberdan ur ttekkan ighwyal ula inejda... Iggez asent ubezzvid gher ifadden, yaley asent ughu n Tarir (ogresse) gher aqerru, yurar deg izvran nnsent, yaker asent tamusni, agerruj d kusant ghur imarawen nnsent. Nnemrurin ifednan nnsent, ggunzren idasilen nsent

da smiqqin aman. Salent tgellinin da tteddunt ghef ubrid ur isselkamen gher awed yan umazir... Tamurt taggug, tenfel amm waman n marur dat useksew nnsent. Djiwnent ibariqen, idiwa knan, tetca ten tfidi amm ighwyal n urwa, tsal tmurt nnsent taggug. Ig dvrant tillas, ssighent timessi, ttint as ar sawalent, ar itwagh wawal deg imawen nnsent amm itersiwen (blessures) nnsent. Ar ttelghent aman ad sent suddumen idasilen, mmensunt, sexsint takat (afa). Ku yat tgen ar tganna add yali wass... aken ad zdint tawada.

 Ighrem nn gulant ttrent anebgi n Rebbi. Ighrem nn gulant brint ulawen n imezdagh, gen asent azdugh ared ighiyent ad ddunt ghef idvarren, jjin itersiwen, ddunt. Ighrem nn gulant kken icirran deffer asent s iknennayen amm infalen.

Ddigh, teddid, idda da tteddugh, da tteddud, da yteddu ad ddugh, ad teddud, ad neddu! Tsal tezdi twada

(isul itteddu)