Agdud n tghessiwin (Tafult 1)

(Le peuple des squelettes (1ère partie))

Yaru t: Lhusin Ideflawen (Tinejdad)

  Isella i wemneqqer (bruit) n wareksen d win tsura da rezzvment tawurt n tebniqt (cellule) nnes. Awal n umerras (gardien) irwas uzzal, amm wakwmamen (clous) ijujjur deg imejjan nnes iwehlen, inna-yas:

-Nker!!

Terzvem twurt, imcucedv ghef udis amm ifigher, iseksew agnir (couloir) azirar n ubniq, azzar idla udem nnes s ilezda... Yusi unfus, tduy tumert amm uskawar (volcan) deg ighsan nnes, nyuddun as idammen deg izvuran. Ikjem uzwu tiyenzar nnes, iskuhhed akal s tkarent turin. Tekrez tudert ifsan n tilawt deg ighsan nnes imahulen, innemrurin, mlalan, dduklen, mcucdven amm twekka, bedden, gen awdan... Yuki d unyuddu n tudert deg izvuran nnes izawraghen... Zwighen s idammen, irzvem allen ghef tudert min ad yall. "Awdan ur ilaq ad yall g wass n tlalitt nnes tiss snat, ass g ira ad yinniy udem azedgan n bab n tezmert!!". Wagi d aswingem nens amezwaru deffer n wughul nnes gher tudert. Iseksew tiseggwin nnes s tawda. Tafuyt urta d tenkir g usgwen nnes. Udem n wakal yura, ur izvri awed yan. Duyen iseqsiten deg uzellif nnes amm iydan. Inna: "Is akw nekren medden adjen i ghas nek! Is i yettu Yakuc, bab n igenwan d ikalen, is...." .

Inker ar ikkat tifelwin n tmedvlin, yat deffer n tayedv, ku yan igher as s yisem nnes ammi t issen seg wussan imezwura n tudert. Ku yan inker d, iskuhhed min yall, irzvem allen ghef tifawt ilhan g isfiffiy yan usemmidv usdid ikejjmen ighsan... Nekren dd tghessiwin! Ufan dd tudert tsul ghef wudem n tudert. Ufan dd ussan sulen da ttegnunnuyen ghef tseggwin ar mezzvin iwdan iwehlen. Mmghin dd g yan wass n yan useggwas ur ssinent g yat tmurt mi wer ukizent udem. Ukint d wakal g ddrent ur tent iri, ar itnagh ad tent dd issufegh sag udis nnes, kerzent, wirint s ifassen nnsen ihercen amm uqbu, ttcen seg uyenna d ittarew. Swangment g yat tikkelt: "Akal yugin tarwa nnes! Iwa pan timucupa n tgira n wakud, amm tmacaput n tghirdvemt ittettan yemmas, negh tin teslemya (nourrisson) inghen tamessudvett (nourrice) nnes.... Aya ur ghur s ghas yan unamek (sens): Ur idd tamurt nnegh aya! Iwakken (huma) an nidir, ilaq an nerzu ghef tmurt igan tinnegh. Tamurt g ddren imarawen nnegh, g mmuten, g udren, g da sgunfun tura... Maka, anida tamurt nnegh? D acu ygan tamurt". Rant ad nekrent ad nadant, ur ssinent mani gher trarant ighfawen nnsent! Ur ssinent tamurt nnsent, ur ssinent idd ad asent tecfu (tioqqil), idd ad dig s afent timdvelt negh upu, idd...? Mhuzen iseqsiten ar spiwwin g tmektitt nnsent, ur ssinent mani gher xsent ad ddunt. Salent ar swingiment grend izinzvren n tafuyt ifassen nnsen gher akal, ar sawalen ifullusen imezwura deg izvuran nnsent... Annayent asidd azeggwagh n tafuyt, umrent, snint ighef gher aneqqer. Tifekkiwin nnsent ar dig sent ttawghent, ar itteqqed usidd allen nnsent innemyaren tallest takuyast, innemyaren aqraf g udis n wakal tent yugin. Zdint tawada ghef iberdan isselkamen gher aneqqer, ar reqan idammen deg izvuran nnsent, immeldey ubettan (peau) n wudmawen nnsent, afent azmummeg d tumert, awal d uswingem, akint d yiccki ar itcerrag s ijenway nnes adis n tilawt nnsent tamaynut asen dd igran itnan amm isnayen.

 Awed yat tghessa ur tessin utmas. Ku yat ar tseksiw dat as... Sdukklent izvri d webrid azirar war tigira ittawin gher akal n tmurt g telha tudert. Maka, mani tudert? Ur tent issin awed yan, ur ssinent awed yan, ur ssinent akal g llant. Yuruten dd wakal, ffghen dd seg udis nnes irruyen, gent amm ipeddawiyen ghef iderdan n tudert. Ku yat d tamacaput nnes, d amghaz n temdvelt nnes. Ku taghessa tugel s advar nnes. Kud ttidirent ttizirent, ussan nnsent ttehruruden ghef ifadden, nitenti zdint tawada gher aneqqer. Assidd n tafuyt da sen dd issektay kra n tghawsa, kra n wawal, kra n twargit, waqila kan tmurt ssnent negh awed kan izli, mayed issnen?....

                 (Isul itteddu)