Tira

Yura t: Mimun Amsbrid (Biljika)

(I Hmed Zyani, yesneddun tamazight)

War yedji d axeyyeq _

Marra iwdan txeyyyiqen

War yedji d anecredv _

Marra wi s yufin yetnecriredv!

War yedj d axarres _

Mani yedja wen war yetxarrisen _

S nnican nigh s usefregh!?

War yedji d razv ura d ajawen

War yedji d mezri _

Iwdan marra ssitimen!

War ghar i ca ad t’ inigh

I yewdan war t’ ssinen

War ghar i bu tibratin, inu wapa, ad tent ssekkegh

Ad tent ssiwdvegh i yewdan

Bac ad tagh ad sen tcen.

Amacnaw marra iwdan: dvssigh, txeyyiqegh!

Amacnaw marra iwdan : trugh tberripegh!

Itiri d ayi wmnus

D mezri, ssitimegh!

War yedji d aya, ura d uyin

I d ayi yejjin ad arrigh.

Axeyyeq d uberrep

D tdvessva d imettawen...

Inni mghar d taghrvawin

Teggegh tent i wawaren_

Awaren n yemma, bac war tweddviren.

Inni d tiracciwin tettvfegh d aysent awaren

Nigh inni d izerman n tseddyin n wawaren

Ssadafegh ten d tidmamin, huma war tnuwwicen.

Ad qqimen munen di min d yegguren.

Yemma tessiwdv ay ten d s yires

Nec di tira ad ten smunegh

D tira i ten ghad yehdvan

War tweddvren, war tmendvren

D tira i d ghad yessufghen

Azvri i d aysen yedjan.

Awarni umi tugha tcuni nsen deg izran

S tira, i ghad yadfen deg idva

War tghimin n yidv nnat.

 

Nec war xsegh ad irigh amacnaw imenza

Ssiwren irs nsen, uran s yinnidven

Ardvren irsawen nsen

I wawaren n midden:

Xarrsen d aysen, ucan d aysen

Nnan d aysen, sghuyyen d aysen

Kkin wussan, usin d wussan

Itwawcar wawar nsen

Twawcaren ixeyyiqen,

Itwawcar usitem.

Yetwattu bab nsen

Nigh yedwer d wennidven!

Jjin anegh d iyujiren,

War nessin wi negh yiran

Teqqnen anegh ghar wa, teqqnen anegh ghar win.

 

Tira inu d tiyujirin_

Maca rux ad msarrawent!

Tira inu d timezvyanin_

Maca rux ad yment

Ad arrigh huma ad irigh

Ad ksegh timennawin.

 

Mimoun Amsbrid, Biljika, 25/10/02.