Asneflul d tutlayt n tmazight

Tura t’: Mayssa Racida (Bentveyyeb, Nnadvûr)

 

Tutlayt n tmazight am nettat am tutlayin marra. Nzemmar ad zzay s nari, ad zzay s nessermed, ad t nesghar, ad zzay s nxarresv. Maghar upu ad zzay s nesneflulla (créer) di marra izuray n tsekla (littérature).

Deg isseggussa ya imeggura, temmutti  tutlayt n tmazight zi  yirsawen d tmenna wapa ghar min yedjan yetwari. Tudef iyyar n tira. Tugha nennum i rebda ntesra i tenfust, i temcaput, i yizri, i ymedyaten, i tirizi x yirsawen n yewdan nnegh imusnawen d tmusnawin, icannayen d tcannayin n zman nni nsen d nitni i ghr yeddakkûr hettvu  d tasyumi d usviwedv n tutlayt n tmazight ar ami teqqim temsagha zi zman ghar wennedvni. Arni ghar s tutlayt a s yixf nnes ghar s tazmirt i zi gh ad temcubbec, gh ad temmughzer x uraq nnes ak marra tutlayin i xaf s d yudfen zi marra tighemmar. Ura d tenni n usammar ra d tenni d yezvwan ajemmadv i waman.

Maca amutti nni tegga tmazight zeg ires ghar tira d uzemmem n tirizi s marra min yesmun usemqar a d timesrayin n zic ticti d icten, akid s ruren d imariren d yezraweyyen d icannayen: ca ytari x wakal, ca ytari x umezruy, ca x min yedjan n usermed am tjarrumt, am taseftit tasenselkint am tmesrent d usughel nnes. Yennedvni teggen isneflulen di tghawsiwin n usefru d tenfust, ad beddegh ghar tneggarut a, d nettat d tamesract n tenfust:

Tanfust taqudvat nigh d ungal di tsekla tamazight oad war ghar s bu ca n iourrac n yedvrisven s wattvas. Maca dinni ca n idellisen n imariren ra zeg ughezdis n Arrif ra zi Sus ra zeg Latvlasv. Arni ghar manaya min yetwafsaren x wudmawen n yeghmisen d tesghunin. Marra manaya d ij n wagra yekka d zeg usneflul n ayt bab n tira, ayt bab n wemnus yecsin x weorur nsen amnus n tussna d weydud d yemxumbar nnes. Da ad smectigh ict n taghit x tenfust n tmazight zeg utecma tnegh Fatima Buziyan tazrawect itarin s taorabt deg ij n wemsawar ak "arradyu" n tmazight di yarbatv deg useddi issewjad Mass Oali Azehhaf umi qqaren "Tusna s izvewran nnes". Yuss d deg wawar nnes: "Aqa ghrigh marra min d itefghen s tmazight u dveffaregh marra min itwafsaren deg ighmisen n tsekka; ufigh imazighen war ghar sen bu wesneflul di tenfust taqudvatv u war zemmaren ad ghar s awdven s tmazight."

Axmi twara nettat belli s tutlayin n umadval i yedja wesneflul wapa, tutlayt n tmazight nettat war tedji n wesneflul u imazighen marra war zemmaren ad sneflullan s yires nsen. Necc war ssinegh min xaf s gh ad inigh? Ma d ririwet  d raggûj n tussna i d as isgharen marra taghit a d wawaren a i tenna di tesghart n tutlayt n tmazight nigh d megal (contre) n tmesrayin a i t issiwdven ad tini min tenna? Arni ghar manaya nettat d tamazight tessawar s tmazight ghar imeshessan d imazighen waxxa ttari s taorabt. Ghar umeggar n useddi tenna: "Necc war ssinegh ad arigh ura d sin n tiwinas (phrases) s tmazight, waxxa ggigh tizemmar inu, maghar yeqseh s wattvasv tira s tmazight."

Da, necc tafegh utecma tnegh Fatima Buziyyan tarra xef yixf nnes s yixf nnes rami d temra tizemmar nnes d tmesna nnes i yiyyar n tmazight am yicten n tutlayt n tira n usnefluli marra izuray, mghar wenni yexsen itbedda zzat i tutlayt d aqubbani n uoeqqa nnes d marra min d zzay s inettan d amaynu. U tutlayt n tmazight, necc twarigh t d ict n tara oemmars ad tazegh, marra taymen d zzay s, sessen, nettat tarenni tbarjujjuy d tedduqquz d d aman, d awaren izdigen triqriqen.

Necc war djigh ca mgal i tira d usneflul s tutlayin n umadval qao, maca taghit axmi gh ad nagh ad nesseqdac tawengint nnegh zzat ma ad nagh x yict n tutlayt, ad newdva di texceft n wawaren i d neqqar di tesghart n iyduden. U mara nuss d ad nessefsi asemqar n "tutlayt n tmazight", ntaf it ismuna marra tamezgha d imazighen n umadval, xelli d irifeyyen wapa.