Buyebawen

Yaru t: Mensvuri Hemmu (Ayt Ishaq)

«Pat yat tisilet, qqimanet kratv d iyis»

Ikka yan urgaz d amezludv war tawuri. Yan wass iqqim gher tama n yan wasif axatar. Ar itexemmam mer ghur s taradsa, mecta n uselem qad inezegh, mecta as dda ad ten izzenz. Ar issagh iselman g wasif, ar iteberram yan ubaw ineyer idvudvan…

Ttviy! Tagh as d yat tikkelt aneli: Ad izzvu abaw ttveref n wasif. Issu t s waman nes. Ar itewarga s wanaf n wallen: Mec t' zzvix aseggûs a, imal ad asix kumraw ubaw. Zzux ten, cin i snat n loebrat. Arunet snat aqendvar, nna ghadd issufghen mraw…

G sdvis n iseggûsen, ismun lexnaci n lxencat, d imettvaren n teghrar, d icewwarin d izeggawen ur ittuqeyasen. Imhedv xef tadawet, ar iswunfu. Iyer allen nes gher anna yemun wasif d igenna, ar isenimmir buyegnawen d iteran xef unna s ica n iqendvaren n ibawen…

Ttviy! Yattvuy as g ixef nes, ad as iseker: buyebawen! Afellah d usebbab ameqran. Maca ur ghur s lpungar g isiris anecti n ibawen, ula illa gher ca g medden nes. Mani g itestvuku anebdu nes? Mani? Ttviy! Agellid! Lpungarat n ugellis. Ioeyyen aneghlaf nes, isuter zis ad its ibedd gher ugellid bar ad as ic lpungar.

Ikcem uneghlaf gher ugellid. Iqqis as ay nna illan. Izayd inna s: «Argaz a, bouybawen, asebbab axatar. Ifukk ad t swaled ghur c. C as lpungarat ic, ssiwel as illi c». Medacaren, meraren awal alli n ufan is dda asen isvaha uyyar n unna ghas cin.

Afad attiy ddaw ufus, issiwel ugellid taferxit nes ihelan. Buybawen isker tameghra semmus d mraw n wussan d yidvan. Uteci d telapit ikw tanila.

Itamma lefreh, iddu d ugellid d uneghlaf nes zar Buybawen, ad its imun ad d asin ibawen. Ibawen n twirega, isulen ureta zzvin, ad afin add meghin. Tiwirga iyeran buybawen g lhebs bu tillas ciyyan n wussan.

Yan wass, itter uneghlaf zi ugellid, ad as irzvem i buybawen. Inna s: «Dda zic tteterex ur t' neqqad. Afekkan izedvaren ad ifek tudert i twargit, ur ifukk ad immet»

Issufegh t' id ugellid, inna s:

-«Tter may trid, tssentled udem ic ghif i».

-«Rix ghas iherwilen inew, deg d uckix ghurrun»

Sneoten as abedduz g pen yeran. Ar issara xef ioeban nes alli pen yufa. Inzegh d zzisen abaw.

Yaghul gher asif axatar, yader as.

Iberrem d useggûs. Imeghi d ubaw, ifesa, yasus. Zerin iseggusen… Yan wass ioayed Buybawen ad isigger xef wasif. Yufa n tighemrin nes mghinet s ibawen illan xef temagra.

Idda zar aneghlaf, afad ad its ibedd gher agelli, ad as ic lpungar g itestvuka ibawen.

-Ibawen! Inna s uneghlaf. Da tessarad dix xef ubbuy n uqecac.

-Mec ur tumined, irura s Buybawen, awera ad ttanayed s wallen ic.

Imun ites alli inezva igeran n ibawen. Oeynen agellid.

Asusen ibawen, ihmel wasif iheri ibawen ula asirem n buybawen s uneghlaf…

Ifafa d “Buybawen” ar iserri tidi.

(Ayt Ishaq, 30  2002)