Tawiza

1 / Mayd igan Ahâyku? Netta yan anaw (genre) n usefru g Japon. Digs ghas krat n tiwan, ittusêkan se 5, 7 d 5 ne tiwanin (syllables) sudfêr (respectivement)¹. Hma ad nakez ayad, ur illi mayd yufen imedyaten. Hân idsen ne Ijaponiyen, imcinna ten rurix gher Tamazight. Ad nasey krâd, win Basho (1644-1694), nini idd nit netta ayd izwaren imzel Ahâyku.

Imir se imir,

Isignew yaddej asunfu,

I winna ittannayen ayur.

Anejdi,

Assagh, ayd iyi rix,

Ad iss netteyassen.

Hâcen amda awssar !

Agru, digs idêr,

Imisli ne waman.

Hân sin ihâykwan (neghiy ad nini awed Ihâykuten) n Issa

Izi, ad ur neqqa!

Imrey ifassen, idâren,

Lla c ittehawal.

Â ijdâd nna izerreyen,

Xu tenughem, adday tuyyelam,

Aytmaten n umyawas ayd tgam.

Dghi hân yan umedya ne Buson

Â aghlal,

Ma g texemmamt?

Yan isk yuger ad c wayyâd.

Ad nec awed yiwn uhâyku ne Ransetsu

Tar icirran, tamettut,

Tlêggagh, Â anect n mi,

Nettat de tiqjijin.

2/ Mayd da ittini uhâyku? Imedyaten nna nefka digsen isignew, ayur, anejdi, izi, amda, ijdâd, aghlal, tamettut, atg (ar tigira ; etc). Ahâyku da d ittawey ghif akkw aynna illan g duyt, amm isefra yadên. Maca netta igezzul; da ittedu nican gher ul n asekkin. Da ismun umedyaz aynna se yucey, g idsen iwaliwen idrusen. Ammi tennit aynna izerrin dat n midden, ur t annayen, Amedyaz lla t izeggêh; ibbey Ahâyku; ammi t izweh awed netta. Akkw midden da teghiman tama ne imedwan; da tisselin i igwra da dâren aman. Maca Basho ibbey Ahâyku. Ismun digs tudert. Illa netta; yucey. Illa ugru; idder. Basho, ica tudert awed i umda; inna ghifs idd iwessir. Ica t awed i waman, acku inna ‘imesli’ ne waman; am idd da sawalen waman.

3/ Ihâykwan n yan umazigh. G 2004 suffeghegh yan udlis amezzân, se tafransist, ighfiw nnes ‘Haikus d’un amazigh’². Rurix idsen zigsen gher tamazight, llig rix ad sawlex ghif Uhayku g azil ne S. Bajji (Radio Tamazight³). Hân idsen imedyaten

Tiledjigin uccekanin,

Alxix ayd tent yusin ;

Ighwman mezzîyen, afulki imeqquren.

Anazur azentâr,

Umlil adfel, accit,

Ikkan, ghif idurar ne Atlas.

Azmummey n unaraw,

UttUb n wurgh;

Tikki, ifka ak.

Iggez ugelzim,

Asaf g taduri nnes,

Igra taghuyyit n tamettant.

Idê war ayur,

Izunguren, ur da sfiqqisen;

Se ibesbisen, akud ar snissit.

Abehêba!

Islli war tuga;

Izrân, winna de issufughen aman.

Angay ar isdiddiy;

War uggugen, iga igenna,

Aman usin d aman.

Imeghiy aleghaghac,

Â duyt, da isnagh;

Awiss, mayd as idê?

Â quqec, Â anebzug;

Uzwigh asfaqqas, tasegni n ibin;

Isellaw, ghas ghifs afus.

Uman, hâ tifsa,

Tiyyadê, Â tiram;

Agama yusey irir s ihersawen.

Nig n ighanimen,

Tafaska, skern ifawen;

Ijdâd ghas terridun.

Adânin imuzzar,

Ijurrân, tadânit;

Hân irir, Â aman.

Hâ awras, hân afgan,

Imeddukkal inmalaten;

Tazzela, asin d akwebri.

Isignew ibdân,

Aragh, yufa t wassid;

Azmummey n ugama.

Aledjig, Â almu;

Is akkw isul t iga,

Wanna tusit g ufus?

4/ Izlan. Ur sinex mayd igan Ahayku ar 1988. Aseggwas nna, tasabermazant (Ambassad) n Japon teghrâ gher yan n ummezwar n uhayku g tamazirt nex. Amux digs; amzêx atig amezwaru. Seg dis, ucix idd tella yat tarawsa inger uhayku d izli amazigh; tili lumen inger as d tamawayt.

Seg izlan, ad d nasey imedyaten d.

Sghix aksum awessar,

Kud leddix ileddey,

Qenna ad iyi omun imerghan.

Isegha Radio s umerwas,

Yawi t gher taddart m ukeffus,

Tenna as oica senegh as, allig as terzâ lefran.

Izlan am wid, tusêkan s krât n tiwan; waxxa ghezzifen imiq. Maca hât awed ahâyku ur da ikennu, ku tikkelt, i taskiwet (structure) tamlugt (standard).

Hân idsen yadên

Â ta samhi, oedêri, Â tagudja,

Ur sinex i titi ne wuzl,

Lla ittergigi ufud inew.

Ad isek amzêx afus,

Ad iyi d awdên winna issenin tanaka,

Tafdêt, Â bu ifurusen.

Inna as wul i tasa, ad neddu ge idê,

Tenna as tasa, may rix idê,

Gweddex ad iyi inegh luhec.

Dghi, nix idd tamawayt ayd inmalan cigan Ahâyku.

Ad rux, iwa ru;

Gan ax tin ijdâd;

Iwa, qâr i Ioqub, ars (ar as) qarêx.

Gix tin ujdîd g imudal,

Tessighet iyi butaber, Â unna rix,

Allig ur seksiwex.

*****

Notes:

1-T. Perusat Stork, Le Zen, Editions Publisud, (1986).

2-M. Oudadess, Haikus d’un Amazigh, Ifzaren Impression, Tanger (2004).

3-S. Bajji, tiwan, Radio Tamazight.