ⵎⴰⵙⵙ ⴰⵎⴰⵡⵙⴰⵙ

ⵓⵔ ⴰⵡⵏ ⵉⵏⵜⵉⵍ ⵎⴰⵙ ⵜⵜⵢⴰⴷⴰⴼ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵙ ⵓⵏⴳⵔⴰⵡ ⵏ ⵓⵙⴳⵎⵉ ⵙⴳ ⵛⵓⵜⴰⵏⴱⵉⵔ 2003, ⴷⴷⴰⵡ ⵉⵙⵡⵉⵏⴳⵉⵎⵏ ⵉⵙⵔⵜⴰⵏⵏ ⵍⵍⵉ ⵜⵙⵔⵙ ⵜⵎⴰⵡⴰⵙⵜ ⵏ ⵓⵙⴳⵎⵉ ⴰⵏⴰⵎⵓⵔ ⵙ ⵓⵣⴷⴷⵓⵢ ⴰⴽⴷ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⵉⵎⵏⵣⴰⵢ ⵏⵏⵙ ⴳⴰⵏ :

1- ⵜⴳⴰ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵜⵓⵜⵍⴰⵢⵜ ⵜⴰⵏⴰⵎⵓⵔⵜ ⵉ ⵎⴰⵕⴰ ⵉⵎⵖⵔⴰⴱⵉⵏ, ⵉⵇⵇⴰⵏ ⴷ ⴰⴷ ⵜⵜ ⵍⵎⴷⵏ ⵎⴰⵕⴰ ⵉⵏⵍⵎⴰⴷⵏ ⵙⵡⴰ ⵡⵉⵍⵍⵉ ⵙⴰⵡⴰⵍⵏⵉⵏ ⵜⴰⵎⴰⵣⵉⵖⵜ ⵙⵡⴰ ⵡⵉⵍⵍⵉ ⵙⴰⵡⴰⵍⵏⵉⵏ ⵜⴰⵄⵕⴰⴱⵜ ⴳ ⵎⴰⵕⴰ ⵜⵉⵙⴳⵉⵡⵉⵏ ⵏ ⵍⵎⵖⵔⵉⴱ.

2- ⵉⵇⵇⴰⵏ ⴷ ⴰⴷ ⵢⴰⵎⵓ ⵓⵙⵙⵍⵎⴷ ⵏ ⵜⵎⴰⵣⵉⵖⵜ ⵎⴰⵕⴰ ⵉⵙⵡⵉⵔⵏ ⵏ ⵓⵙⵙⵍⵎⴷ ⵙⴳ ⵓⵙⵙⵍⵎⴷ ⴰⵎⵏⵣⵓ ⴰⵔ ⴱⴰⴽⴰⵍⵓⵕⵢⴰ, ⴳ ⵓⵣⵎⵣ ⵏⴳⵔ 2003 ⴷ 2011 ⵙ 3 ⵜⵙⵔⴰⴳⵉⵏ ⴳ ⵉⵎⴰⵍⴰⵙⵙ.

3-ⵉⵇⵇⴰⵏ ⴷ ⴰⴷ ⵜⵎⵙⴰⵙⴰ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵉⵎⵉⴽ ⵙ ⵉⵎⵉⴽ ⵅⴼ ⵜⵔⵙⴰⵍ ⵜⵉⵎⵙⵙⵓⵏⵉⵏ ⴰⴼⴰⴷ ⴰⴷ ⵜⵎⵎⴰⵜⵜⵉ ⵙⴳ ⵓⵎⵢⴰⵏⴰⵡ ⵏ ⵜⵏⵜⴰⵍⵉⵡⵉⵏ ⴰⵔ ⵜⵓⵜⵍⴰⵢⵜ ⵉⵎⵙⴰⵙⴰⵏ, ⵓⵏⵛⴽ ⴰⴷ ⴰ ⴼ ⴷ ⵉⵇⵇⴰⵏ ⴰⴷ ⵉⵎⵙⴰⵙⴰ ⵓⵙⴽⴽⵉⵍ ⵏ ⵜⵉⵔⵔⴰ ⵏⵏⵙ, ⵎⵓⵏⵏ ⵉⵎⵉⴽ ⵙ ⵉⵎⵉⴽ ⵉⵍⵓⴳⵏ ⵏ ⵓⵙⴼⵜⵉ ⵏⵏⵙ ⴷ ⵜⵊⵕⵕⵓⵎⵜ ⵏⵏⵙ ⴷ ⵓⵎⴰⵡⴰⵍ ⵏⵏⵙ.

4-ⵉⵇⵇⴰⵏ ⴷ ⴰⴷ ⵜⵓⵙⵍⵎⴷ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵖ ⵜⵙⴷⴰⵡⵉⵜ ⴷ ⵡⴰⵎⵎⴰⵙⵏ ⵏ ⵓⵙⵎⵓⵜⵜⴳ ⵏ ⵉⵙⵍⵎⴰⴷⵏ ⴰⴼⴰⴷ ⴰⴷ ⴰⴼⵉⵏ ⵉⵙⵍⵎⴰⴷⵏ ⴰⴷ ⴰⵙⵎⵓⵜⵜⴳ ⵍⵍⵉ ⵔⴰⴷ ⵜⵏ ⵉⵙⵙⵍⴽⵎ ⵉ ⵓⵙⵡⵉⵔ ⵉⴼⵓⵍⴽⵉⵏ ⴰⴼⴰⴷ ⴰⴷ ⵙⵙⵖⵔⵏ ⵜⵓⵜⵍⴰⵢⵜ ⴰⴷ.

ⵓⴽⴰⵏ ⵜⵜⵓⵙⴳⵎⴰⴹ ⵢⴰⴷ ⵢⴰⵜ ⵜⵎⵢⴰⵇⵇⴰⵏⵜ ⵏ ⵜⵎⴰⴷⵔⴰⵡⵜ ⵏⴳⵔ ⵜⵎⴰⵡⴰⵙⵜ ⵏ ⵓⵙⵙⴳⵎⵉ ⴰⵏⴰⵎⵓⵔ ⴷ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴳ ⵓⵙⴳⴳⵯⴰⵙ ⵏ 2003, ⵉⵜⵜⵓⵙⴽⴰⵔ ⴰⵡⴷ ⵢⴰⵏ ⵓⴳⵔⴰⵡ ⵉⵛⵛⴰⵔⵏ ⴰⴼⴰⴷ ⴰⴷ ⵉⴹⴼⵕ ⵜⴰⵖⴰⵡⵙⴰ ⴰⴷ, ⵓⴽⴰⵏ ⵜⴻⵜⵜⵓⵙⴽⴰⵔ ⴰⵡⴷ « ⵜⵖⴰⵔⴰⵙⵜ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵓⵙⵙⵍⵎⴷ » ⵍⵍⵉ ⵖ ⵍⵍⴰⵏ ⵉⵙⵡⵉⵏⴳⵉⵎⵏ ⵎⵇⵇⵓⵔⵏⵉⵏ ⵏ ⵓⵙⵙⵍⵎⴷ ⵏ ⵜⵎⴰⵣⵉⵖⵜ ⵍⵍⵉ ⵢⴰⴷ ⵏⴱⴷⵔ, ⴳ ⵜⵉⴼⴰⵡⵜ ⵏ ⵉⵙⵡⵉⵏⴳⵉⵎⵏ ⴰⴷ, ⵜⵜⵓⵙⴽⴰⵔⵏ ⵉⴷⵍⵉⵙⵏ ⵉⵏⵎⵍⴰⵏⵏ ⵏ ⵚⴹⵉⵚ ⵢⵉⵔⵏ ⵣⵡⴰⵔⵏⵉⵏ ⵏ ⵓⵙⵙⵍⵎⴷ ⴰⵎⵏⵣⵓ, ⵜⵜⵓⵙⴽⴰⵔⵏ ⵉⵍⵎⵎⴰ ⵉⴷⵍⵉⵙⵏ ⵏ ⵓⵙⵍⵎⴰⴷ ⴷ ⵜⵔⵙⴰⵍ ⵏ ⵓⵙⴳⵎⵉ ⵍⵍⵉ ⵉⵜⵜⴰⵡⵙⵏ ⵣⵓⵏ ⴷ ⵜⵉⵏⴼⵓⵙⵉⵏ ⴷ ⵜⴰⵍⵍⴰⵙⵉⵏ ⴷ ⵜⵣⵍⴰⵜⵉⵏ, ⴳ ⵜⵉⵣⵉ ⴰⴷ ⵏⵉⵜ, ⵎⵓⵏⵏ ⵉⵍⵓⴳⵏⵏ ⵏ ⵓⵙⴼⵜⵉ ⴷ ⵜⵊⵕⵕⵓⵎⵜ ⴷ ⵜⵙⵏⴰⵢⵜ ⵜⵜⵎⵙⴰⵙⴰⵏⵜ ⵜⵜⵓⵙⵎⴰⵢⵏⵓⵏⵜ ⵜⵉⵔⵔⴰ ⵙ ⵓⵙⴽⴽⵉⵍ ⴰⵎⴰⵣⵉⵖ ⵜⵉⴼⵉⵏⴰⵖ, ⵉⵎⵙⴰⵙⴰ ⵉⵍⵎⵎⴰ ⵓⵙⴽⴽⵉⵍ ⴰⴷ ⴰⵡⴷ ⴷ ⵜⵙⵏⵎⴰⵍⴰⵢⵜ ⴷ ⵜⵡⵓⵔⵉ ⵙ ⵓⵎⵙⵙⵓⴷⵙ ⵉⴼⴼⵖ ⴷ ⵓⴷⵍⵉⵙ ⵏ ⵓⵙⵙⵍⵎⴷ ⵏ ⵜⵎⴰⵣⵉⵖⵜ ⵉ ⵉⵎⵇⵇⵔⴰⵏⵏ ⵜⵜⵓⵙⴽⵉⵔⵏ ⵉⵍⵎⵎⴰ ⴽⵔⴰ ⵏ ⵉⵎⴰⵡⴰⵍⵏ, ⵜⵜⵓⵙⵏⵎⴰⵍⴰⵏ ⵉⵏⵎⵓⵇⵇⴰⵔⵏ ⵉⵎⵙⵙⴰⵏⵏ ⴰⴼⴰⴷ ⴰⴷ ⵏⵙⵙⴷⵔⵓ ⵉⵔⵣⵣⵓⵜⵏ ⵉⵙⵏⵉⵍⵙⵏ, ⵜⵜⵓⴼⵔⴰⵏⵏⵜ ⵜⵖⴰⵔⴰⵙⵉⵏ ⵏ ⵓⵙⴳⵎⵉ, ⵓⴽⴰⵏ ⵜⵜⵓⵙⵎⵓⵜⵜⴳ ⴰⵡⴷ ⵜⵓⴳⵜ ⵏ ⵉⵙⵍⵎⴰⴷⵏ ⵏ ⵜⵎⴰⵣⵉⵖⵜ ⴳ ⵜⵓⴳⵜ ⵏ ⵜⴽⴰⴷⵉⵎⵉⵢⵉⵏ ⵜⵉⵙⴳⴰⵢⴰⵏⵉⵏ, ⵙⵙⵏⵜⵉⵏ ⵉⵙⴰⴽⴰⵜⵏ ⵏ ⵜⵓⵜⵍⴰⵢⵜ ⴷ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴳ ⴽⵔⴰ ⵏ ⵜⵙⴷⴰⵡⵉⵢⵉⵏ ⴷ ⴽⵔⴰ ⵏ ⵉⴷ ⵍⵎⴰⵚⵟⵕ, ⵜⴻⵜⵜⵓⵙⴽⵉⵔ ⴰⵡⴷ ⵜⵖⴰⵔⴰⵙⵜ ⵏ ⵓⵙⵎⵓⵜⵜⴳ ⴳ ⵜⵎⴰⵣⵉⵖⵜ ⵉ ⵡⴰⵎⵎⴰⵙⵏ ⵏ ⵓⵙⵎⵓⵜⵜⴳ ⵏ ⵉⵙⵍⵎⴰⴷⵏ.

ⵎⴰⵛⵛ ⵜⵉⵖⴰⵡⵙⵉⵡⵉⵏ ⴰⴷ ⵓⵔ ⵍⴽⵎⵏⵜ ⴰⵙⵡⵉⵔ ⵏ ⵓⵎⵎⵉⵥⵏ ⵉⴷⵓⵙⵏ, ⵓⴽⴰⵏ ⴰⴳⴳⵯⵏⵜ ⴷ ⴽⵔⴰ ⵏ ⵜⴱⴱⴰⵢⴹⴰⵕⵏ ⴽⴽⵏⵜ ⵎⵏⵉⴷ ⵏ ⵡⴰⵡⵜⵜⴰⵙ ⴰⴼⴰⴷ ⴰⴷ ⵉⴽⴽ ⵓⵙⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵎⴰⵕⴰ ⵉⵙⵡⵉⵔⵏ ⴷ ⵎⴰⵕⴰ ⵜⵉⵙⴳⴳⵉⵡⵉⵏ. ⴰⵙⵎⴽⵍ ⵏ ⵜⴽⴰⴷⵉⵎⵉⵢⵉⵏ ⴷ ⵜⵎⴰⵔⵉⵜⵉⵏⵉ ⴷ ⵜⵎⵔⵙⴰⵍ ⵏ ⵓⵙⵙⵍⵎⴷ ⵉ ⵜⵎⴰⵣⵉⵖⵜ ⵓⵔ ⵉⵥⴹⴰⵕ ⴰⴷ ⵉⵣⵔⵉ ⴰⵢⵍⵍⵉ ⴷ ⵢⵉⵡⵉ ⵓⵏⵜⵎⴰⵏ ⵏ ⵓⵙⵙⴳⵎⵉ ⴷ ⵓⵙⵎⵓⵜⵜⴳ ⵍⵍⵉ ⵉⵙⵙⵔⴳⵎⵏ, ⵡⴰⵅⵅⴰ ⵜ ⴼⵍⵏⵜ ⵜⵖⴰⵡⵙⵉⵡⵉⵏ ⵍⵍⵉ ⴷ ⵉⴳⴳⵯⵔⴰⵏ ⴹⴰⵕⴰⵜ ⵉⵏⴰⵡ ⵏ ⵓⵊⴷⵉⵔ ⴷ ⵓⵙⴽⴽⵉⵔ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⵉⴼⵍ ⵜ ⴰⵡⴷ ⵡⴰⴷⴷⴰⴷ ⵏ ⵜⵎⴰⵣⵉⵖⵜ ⴰⵙⵙⴰ ⵍⵍⵉⴳ ⵜⴳⴰ ⵜⵓⵜⵍⴰⵢⵜ ⵜⴰⵎⴰⴷⴷⵓⴷⵜ ⴳ ⵜⵎⵏⴹⴰⵡⵜ ⵏ ⵜⵎⴰⵣⵉⵔⵜ ⵏⵏⵖ.

ⵏⵔⴰ ⴰⴷ ⴰⵡⵏ ⵏⵉⵏⵉ ⴰ ⵎⴰⵙⵙ ⴰⵎⴰⵡⵙⴰⵙ ⵎⴰⵙ ⴰⵔ ⵓⴽⴰⵏ ⵙⵓⵍ ⵜⴻⵜⵜⴰⵖⵓⵍ ⵜⵎⴰⵣⵉⵖⵜ ⵜⵉⵖⵔⴷⵉⵏ ⵖ ⵓⴱⴰⵔⴰⵣ ⵏ ⵓⵙⵙⵍⵎⴷ ⵉⵙⴳⴳⵯⴰⵙⵏ ⴰⵢⴰ, ⵎⴰⵢⴰ ⵉⵡⵉⵏ ⵜ ⵉⴷ ⵉⵙⵓⴳⴰⵎ ⵉⵏⴼⴳⴰⵏⵏ ⵍⵍⵉ ⴱⴰⵀⵔⴰ ⵉⴷⵔⵓⵙⵏ, ⵎⴰⵢⴰ ⴰ ⵙ ⴰⵔ ⵓⴽⴰⵏ ⵜⵙⵙⵏⵜⴰⵍ ⵜⵎⴰⵡⴰⵙⵜ ⵉⵙⴳⴳⵯⴰⵙⵏ ⴰⴷ ⵣⵔⵉⵏⵉⵏ, ⵎⴰⵛⵛ ⴰⵔ ⵏⵏ ⵏⵜⵜⴰⴼⴰ ⵉⵎⵣⵔⴰⵡⵏ ⵍⵍⵉ ⴷ ⵜⵜⴼⴼⵖⵏⵉⵏ ⴳ ⵉⵙⴰⴽⴰⵜⵏ ⵏ ⵜⵎⴰⵣⵉⵖⵜ ⴳ ⵜⵙⴷⴰⵡⵜ ⴰⵔ ⵓⴽⴰⵏ ⵜⵜⵉⴳⵓⵜⵏ, ⵏⵍⵇⵎ ⴰⵙⵏ ⵉⵎⵣⵔⴰⵡⵏ ⵏ ⵉⴷ ⵍⵎⴰⵚⵟⵕ ⵍⵍⵉ ⴷ ⵉⵜⵜⴼⵖⵏ ⵖⴰⵎⴰⵏ ⴱⵍⴰ ⵜⴰⵡⵓⵔⵉ, ⵏⵍⵇⵇⵎ ⴰⵙⵏ ⵓⵟⵟⵓⵏ ⵏ ⵉⵙⵍⵎⴰⴷⵏ ⵍⵍⵉ ⵉⵜⵜⵓⵙⵎⵓⵜⵜⴳⵏ ⵍⵍⵉ ⵉⴳⴰⵏ 14 ⵏ ⵉⴼⴹ, ⵎⴰⵛⵛ ⴰⵢⵀⴰⵢⵢⴰ, ⵓⵔ ⴰⵔ ⵙⵙⴰⵇⵔⴰⵏ ⵜⴰⵎⴰⵣⵉⵖⵜ ⴰⵛⴽⵓ ⴰⵔ ⵜⵏ ⵙⵎⴰⵜⵜⴰⵢⵏ ⵉⵎⴰⵔⵉⵜⵏ ⴷ ⵉⵏⵎⵀⴰⵍⵏ ⴰⵔ ⵜⵏ ⵜⵜⴰⵡⵉⵏ ⴰⴷ ⵙⵙⴰⵇⵇⵔⴰⵏ ⵜⵉⵖⴰⵡⵙⵉⵡⵉⵏ ⵢⴰⴹⵏⵉⵏ ⵍⵍⵉ ⵙ ⴰⵔ ⵜⵜⵉⵏⵉⵏ ⵅⵚⵚⴰⵏ ⵜⵏ ⴳⵉⵙⵏⵜ ⵉⵙⵍⵎⴰⴷⵏ, ⵣⵓⵏ ⴷ ⵉⵖ ⵓⵔ ⵜⴳⵉ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵜⴰⵖⴰⵡⵙⴰ ⵍⵍⵉ ⴷ ⵉⵇⵇⴰⵏ ⴰⴷ ⵜⵜⵓⵖⵔⵉ.

ⵓⵏⵛⴽ ⴰⴷ ⴰ ⴼ ⴽⵯⵏ ⵏⵙⵇⵙⴰ ⴰ ⵎⴰⵙⵙⴰ ⴰⵎⴰⵡⵙⴰⵙ ⵅⴼ ⵜⵖⴰⵡⵙⵉⵡⵉⵏ ⵍⵍⵉ ⵜⵙⴽⵔⵎ ⴰⴼⴰⴷ ⴰⴷ ⵜⴰⵎⵓ ⵜⵓⵜⵍⴰⵢⵜ ⵜⴰⵎⴰⴷⴷⵓⴷⵜ ⵜⴰⵎⴰⵣⵉⵖⵜ ⵎⴰⵕⴰ ⵉⵙⵡⵉⵔⵏ ⴷ ⵎⴰⵕⴰ ⵜⵉⵙⴳⵉⵡⵉⵏ ⴷ ⴰⴼⴰⴷ ⴰⴷ ⵉⵎⵓⵔⵙ ⵓⵙⵙⵍⵎⴷ ⵏⵏⵙ ⵜⵜⵓⴽⴽⵉⵙⵏⵜ ⵜⴱⴱⴰⵢⴹⴰⵕⵉⵏ ⵍⵍⵉ ⵉⵍⵍⴰⵏ ⴳ ⵓⴱⵔⵉⴷ ⵏⵏⵙ.