Adllis amaynu n umaru Kannouf: “Sadu tira… tira”

Yura t: Abdelmottalib ZIZAOUI

Immarni d deg iyar n tsekla tamazight di Arrif ij n wedlis d amaynu, netta d ammud¹ wis krad n Karim KANNOUF: “sadu tira… tira”, awarn i “Jar wesfed d usennan” (2004) d “Reowin n tayri” 2009. Adlis a myawazen deg usegged n tira d tighri tughzint² H.Banhakeia El Hossaein Farhad d A.ZIZAOUI. netta d adlis wis kuzv i d tessufegh tabridt n tghuri timazighin n tesdawt n Wejda³.

Mamec i d yusa di temsizwart n wedlis a:

Adlis a isseghmi d, jar tefray nnes, ca n tqessisin d timaynutin⁴, mani ameghri ad daysent yaf isental⁵ msebdvan maca ttemsagarn di talgha.⁶ Azrawi igga asvurif deg iyar n tqessist tamazight: yarcem izlan nnes s wattvas n tmeghra⁷ i iggin afray icna. Kannuf ittsessu tamazight s tidi n tira huma ad teghmi ad terqeh deg iyar n tsekla tamadvlant⁸.

Tikti⁹ i ittcuqn ammud a d taghuyyit mgal¹⁰ ahwws n tesghart n Umazigh, zi Siwa ar Kanari. Nettat temsebdva xaf sin n wudmawn: Tira d tayri. Tira di tqessisin d asentel d amaynu di min ittwarun ar assa. Nettaf days axarres i isseddaran min iteddarn di tatlayt¹¹ am tmazight. Izlan a d awardi i wulawn yarghin s ucemmudv n tira…

Di “Sadu tira… tira“, issars d marra min izemmar ad yini d marra min war izemmar ad yini. Izlan a ssummten lehriq d tghufawin, tadvsa¹² d imettvawn, aoeffar d timmuzgha.¹³ Fruryn d alaghi i war ittmettin. Tira a ttinitent xaf tutlayt tamazight, xaf tallest yarezzun tifawt, xaf wfgan i iffudn tayri, xaf umezwag¹⁴ i iffudn Arrif, xaf umettva i iffudn tadvsa, xaf ufadi i iffudn aman, xaf weghray i iffudn anqar, xaf tussanin i iffudent leowin, xaf useghdi i iffudn awal, xaf wawal i iffudn tira, xaf tira i iffudn tira.

Kannuf ixs ad yari, tira nnes xsent ad ksent afray xaf tmazight, ad yari min ghars di twengimt nnes, huma ad nessen belli netta iqqen ghar tmazight, tamazight teqqen ghars. S manaya izzi anegh d tiqessisin a yardvent qao iwaln n tcuni imudn s lehriq d tayri, s marra tufrayin¹⁵ n umaru.

Deg umeggar, tiqessisin a tettarent zeg Imazighen ad tent gharn, ad tent zzvun deg wulawn nsenn, war tent ttejjin ca d tiyujilin teddarent di tattut…