Tawiza

Awal «Amdyaz», idda d g uzur n umyag: «dyez». Ameggaru ya, yuwey d digh netta ghef tafarest n isefra n tmedyazt, negh dd amarg g s wudem amata. Innem mek nenna: Amedayaz iga t wenna yettinin Timedyazin. Maka aneghmis a issedras anamek i wmedyaz d tmedyazt. Ur ten issefri g taghara n tuzzumt, acku teggudy asen twuri. Illa wenna yettinin i wmedyaz Amarir; awal d iddan g “irir”. Iga t unna yettinin Irir amensay d udjan imezwura. Awal aqbur, ittufkan tasuta gher tayd, iddegh d yuwey assemghwer i tussna d tizi Tamazight.

Nusey d g umedya, irir aqbur ttinin g tmeghra Imazighen n Tfilalt, g yiley n leqbet i Tmazirt n Umur (maruk). Zund “Abaghur”, nna ygan irir n tutmin, illa seg tiwusiwin, ig’ awal n imezwura. Da yettini yirir n Ubaghur:

Nnigh ak, i nnigh ak a yabaghur
Mek ur ak teojib tughul id illi
Ad i wer tekkatt’ i wla tergemd I tt’
Illi new, illi new a tisgmi new
Talligh d i ssegmigh teddu tzery i
Illi new, illi new a tanagamt
Illi new illi new a tanazdamt
I loar nkwent illi new a timezdughin

Irir aqbur, g tssemghur temghart assegmi n illis, ar yakk’ i wbaghur da igat wergaz idrirawen n tizi nna yaken Imazighen imezwura g usksew nnsen s tmettudvt. Taguri tameggarutt n yirir a “I lâar nkwent illi new a timezdughin “, yuwey d ghef twizi illan inger tutmin.

Illa digh yirir itrir da t ttini talilt, g llant tutmin ilin irgazen, g yiley n tifawt; da yas ttinin: azzenzey. Awal d udjan imezwura, ar ittuzruy tasuta s tayd, min assutey n iwaliwen i wsefru. Acku yuwey d tussna d tizi ssenn’ yad iqburn. Da yettini yirir n Uzzenzey:

Iffu lhal ur iffu, sell’ i wdida n iysan (islan!)
Iffu lhal ur iffu teffeghm id a laxyal
I nker d a mayed ignan, uwigh k id a yamlal
A wa sbah k, amm ugellid a yisli
I rebbi tmeqquëed zarrwen a gar tanbatt
I rebbi tmeqquëed dat agh nagel tanbatt
I rebbi a yurhim, i rhem baba wla mma
I rhem winna kkaten in agenza digh nitni.

Tuley d tifawt i yeslan! Idda d g yirir is ur idd ghas ussan iziln ayd illan. Yuwey d wakud ad yasey wergaz anezgum n tudert, ad yisin mas tuwy tenbatt imezdagh. Illa ghifs ad ikk’ uddur i winna t ilan d imezwura ti d izreyen. Ad ur ittettu imariren digh nitni, acku da ttalsen i tizi d yuckan g iwaliwen n ixatarn lli zwarnin. Imekinna d idda g usefru: “I rhem winna kkaten in agenza digh nitni”. Winna yttalsen i tguriwin d yuwyen tusna, aswingem d uneghms adelsan Amazigh, ad asen nini: imarirn. Ur gin imedyazen isskaren timedyazin.

Mayd igan tamedyazt?

Tamedyazet iga tt ummutr n mnaw n tguriwin, d yuwyen tikwta imestfarn munent gint asefru. G unsay, tamedyazet tghwezzif. Addag tebbey ad tegzil, da yas nettini: tagezzumt. Acku negzzem tamedyazt. Nrura tt d tmezziy. Addag nulles digh i wssemzey, nasey d snat tgwuriwin g tmedyazt, negh dd g tgezzumt, yughul netta ig’: Izli. Snat tgwuriwin, da ttegganet izli d yuwen tiwent. Tgauri nettat, tga taferdiyt. Afad ad nessadd tadusi n usiggel ad neg’ unugh:

Mek d nusey g umedya tamedyazt n Mass Kki Hessu isawlen ghef tudert, ad agh tessefru aneghmis mi nulles. Asefru ddegh yuwey d ghef usemmud n urgaz s wudem amata. Seg mayd d irzem umdan allen nnes s tudert, igmu, ar tigira g immut, g as udern g tmedelt. Ik’as digh Kki Hessu ad d isiwl umettin ddaw iflila n tmenza. Ameslay n Umedyaz idda d ghef umdan seg mayd illa, allig ur isul!

Mimmek as iga i tnifit?

Izzewar izli, issdfer as igmas, zars yumzen g tiwent d uswingem. Yales asen digh wiyd d yaghen tanila n wawal, munn’ akw g usnighs. Yughul uderris iga tagezzumt negh dd tamedyazt tafessast. Irru Mass Kki Hessu g wawal, allig iga tamedyazt d yulyen s Izlan. Nezmer ad nebbey tamedyazt a, ad teg’ izlan i whidus n Bahbi, d win uhidus n Wact.Usan asen d akw. Maka ad ur nessufugh anya n izlan g usnighes. Acku ighey ad innem i wssefru ddegh ghef d nuwy, imkinna ighey ad isikk’ abrid ur iffighen. Gguten wanawn n izlan.

Inna Uneccad Kki Hessu:

*Han ayt nniyt da ttecharen

Meqqar da ttasyen izazaten

*Meqqar righ ad shudregh ighef

Hezzan d imurig ull inew

Mer da ttebeddalmt a lemhayn

Leghyar allig d icayd iqqim

Ur iwhin uyenna i yaghen

Ull inew iâmmer s ixemmimn

Idda lhemm ur iri buttaât

Yiri ttâaam inejdi g ittamen

Tizizwa tuwegh g iledjign

Tamamt tâayd s ighwulidn

A yayt lhilat igheddarn

Ur da tthekkamm’ s isennann’

Ssagmat lehzen a yull inew

Amuttel ad ihkem igheddarn

Da ttxemmamgh i yat tenbatt

Ddunit amm inejda g lmitl

A lixra tujtt i ku yuwen

Tuwy lmeskin, tawy ttajr

Âezrayn isul ad I yessikl

Ad i yekkes rruh i ygi g lghwumt

A lahbab agh isaggan ighef

Ad ur tallam ghef igayuten

Tuwyem d aman a aytma new

Issard i wenzvar lehnuyt

Igna lekfen iligh agensu nnes

Han nnâac ngherd afella nnes

Usyen i rebâa allig nn nuwd

Qqamen kem a tazallitt n lajr

Meqqar teghrim, wjed ad ten tabâ

Isul wakal ad I yessikl

Ilint lmalayka d nniyt

Ar i ssektayent ineghmisen

Asag d ibedd lmizan nnegh

Han anrar n lehsab iâemmer.

Tagezzumt:

Adar inew ay i d yuwyen ad ak inigh
ah a bu lfreh ambarek tadda tuwyem!
*****
Adar inew ay i d yuwyen ad am inigh
ah a tislitt ad kem iâezza Mulana!

Ik am rrda ikes am nnabi a ta.
*****
Rebbi, grigh awen ay Akuc axatar!
Senmat as lumur tanfem as lbiban
s lxir abda kkes i ubrid isiwan!
*****
Tekka ssaât nna g zuzedegh ad akw inigh

Amazigh ayd nga ula ghiyegh ad inigh
Umerghad ayd nga wla ghiyegh ad d nughul
s ghur ayt lhizeb, lghwecc ag akw ulyen.

Izli:

Izli ittuga, imkinna nenna, g snat tiwan igan tiguriwin. Timennitt a digh nettat tuley d s mnaw n iwaliwen zund ilsawen n imdanenn’ s wudem amatu. Tiwent tamezwarutt n yizli, tuwey d azgen n usnighs. Tiss snat tesney d asemmad. Da yas ttinin Imazighen n wasif n Ghriss i yezli: “Amssikl d gmas”.

Isawl “Izli” ghef mayd akw illan g tudert i wemdan. Yuwey d asnighs, yuwey d tusna, yuwey d inzan, yuwey d aneghmis, yuwey d taghwuyyitt…atg. Tulles tsuta i tayd izlan iqburn illan seg zik. Uwyen d anghems yughul ig’ amezruy i tsuta tamazuzt!

Inna uneccad Lbaz:

•Ilsa d ivef icicy tiddi toerra

Ggwedegh i ssapt ad tent ibbi wsemmid.

Inna uneccad Sakku:

•cuf ileqwdra ammi gengh ayy

allig fafagh tfaja luqt

•mayd ittamen ka g waggwa ddev

ur aksuln inelmaden digs

•Nekk aghbalu ybna g wull inew

Mek ak d pader fad i winnek

•Iwa sew aman n tuderwalen

Ggwedegh i yrifi ak id ughuln

•da t iserwat busseod ar as seghrutgh

ur av ighri iddegh imger ad namec ili new

•meqqaë righ ad spudergh ighef

tpudremt a leâtabi zars

•a buwghennan mek iga winnek

asey is ull nnek ad ixiter.

Taghuni ghuë Lbaz, inna:

•qqenegh-ak yat terbatt ayenna g di-tedda

zlint-agh icirran ddagh di-tufa

aoeccum n tiwent:

•tafuyt ig tuley tessaddem a yakal

han itran-ddagh izeddign ur llin

Iqqen digh Lbaz inna:

•qqengh-ak yat tmeïïuïï issefliden i ëeboa

addag temmett’ a yuwt tagey-agh kratt

Arezzum:

•Rebâa n rrwayd, ha ttumubil da tteddu

maka ghes ad tegbu yuwt lazm ad teqqim

Amdya n Izlan n Uzbu:

•A Budnib qqad ak gegh agerd

Negh ti n nga i yeghf inew

•Ddan akw medden kull’ s ljihad

Ghas iydan d wadda ur igin lâemmart

* A wa han tasa wer deg i llint

Mek ghur k illa nfed azen zars

•Unna ur ssawden ijerruhen

Urta yasen ikki lehdid attayn

•Illa lkakus-nnek ad ak-irrez

Aha yawa uwigh d nffed ad is uttegh

Ayenna tezrey tnaghitt n Baddu, myannan sin imezdagh Izlan. Yuwen yamu g tnaghitt, yuwen iffer g tgemmi nnes. Inna yas d g izli unna ihadern i tin Baddou:

* Chal ayd nga d laid ur tellid

Allig iffegh ttulm tizi tfafad.

Irar as d netta digh inna:

* Dghi g isfa yigenna hat namu

Idd ad ak d ddugh g wagu ur nnigh.

Izli n tgerzawt:

* Swan ifasiyn aghwu urta yendi

Hdun Imazighen s wallen tissenda

Izlan n Tmusni:

Inna uneccad Uâsta Muha Uâli:

•Iqqima nn wawal g tizi n âari

Unna s ighran ayd da d ittâayan

•Iqqima nn wayyur tga ggid ghif i

Irigh abrid ur ssuddigh âari

•Inna yi wseklu ggez degèi mek trid

Han asif da yi yeqqaz i yzuran

•Nebda d uqbu waddegh nugga imezzey

Isul iâreqq’ usennid inew imih

•Ur idd izriran, ur idd ilegh adu

Rebbi ayd iggarn tibar ghef ka

•A ta ghalegh a ddunit idd ad tfukkud

Neddu s uzrab agern i d digh wussan

Taguri:

Ghur Imazighen n Tfilalt da ttuyini Tguri ghef wubuy n ighef i tgezzumt. Da yggar Umarir negh dd amedyaz tagezzumt zwar, inin as: ”ghers as! ”. Igat ad yazeel s tguri i wnamek d iddan g tgezzumt (negh dd g tmedyazet ibbyen!). Nessen is gguten inyaten i tguriwin, zun d win:

-Tgauri n Tfilalt

-Tamawayt

-Tamnatt

-Atg..

Timnadin:

•I max a lwerd ad tehwut a kwen issufgh ulili ghef lâin d waman n usaka

•Iwa maxef aha lluz allig tefsey iledjigen netta yazal ihma ghifun

•I max addag takkat zwar ar tallat iceqqa leâbar dinna g ittufka laman

•I max a bulbabur ad agh ur tasyem iceqqa lebhur ad zreyn ntun aman

Taguri:

* A wa nada tifawt yuley d wass a bnadem!

Amawal:

Tazrawt: étude

Amyag: le verbe

Tafarest: production

Anamek: le sens

Amensay: traditionnel

Akud: le temps

Idrirawen: références

Tiwusiwin: siècles

Itrir : merveilleux

Talilt: chorale

Ansay: tradition

Timennit: phrase

Asemmud: âge

Min: sans

Unugh: dessin

(Zaid ouchna)