Weyyaw tanya isrudji beneoman tanya tehdeq tezwegh nni xef tafriwin nnes!! amen ihdeq uraji di tittvawin nni inu. Jj m ijdvadv ad jawen ad ghenjen anuri inu ad inin marra min war nnigh d min nnigh inu, waxxa netta war yenni i yarragub ad iraja war ishinneb i weghray n tfuct war idarreo i tefsut nni yezuyet ura d assegwass; necc d uxarress inu d tkemict n ulellec n beneoman ad nesserqeh tudart n wezway, ad nefsi areqasen n tayri, ad nirar tanufra jar rebput n tlullucin, sadu tmeghrusin n wertax izuyet uweddar i zuyten Takfarinas inuffaren di rirart nnes, izwaregh as nuffaregh uca war day i yufi ca, marra nenufar, i wi d anegh gha d yafen di rirart n tanufra?? Ass n trarit nnec d wass n trarit inu d ussan weddvaren zeg umezruy, maca trarit nnec tizvidv ghar i ad teqqim d rirart, ad teqqim d tiggest tarcem deg udem n uweddar axmi gh ad nenuffar tanufra, cek nuffar dipa… Nec ad nuffaregh da dipa… Takfarinas ad yurzu x tidet nnegh inuffaren deg mezruy abarcan d wenni yazegwagh icfan i raxart inu, maca twara ya timedvrin ura d nitenti sghemyent beneoman amecnaw wenni n wazghat inu illuli di tanufra, manwen zzay negh gha yizwaren ad iqqen x tittvawin ad iofes x tirjin tihmaymeyyin mahend ad as ksent remraqat d uraqi i d xaf s igharsen tadjest, wenni i d as izedghen tarectut n wexxam axmi d as tesnexrao Takfarinas. Hida bida tenqeb jida mammat turu Oisa tizi n wuccen qarqec beo, hardent id ggûrdent id ghar sidi Buyeoqub wi yhadan yekkes fus. Ahhah… ahhah… d nec ig fghen zi rirart nnegh n tanufra, ufigh ixf inu zeg weddar, uca weddaregh di tanufra nneghni tamarzagut amecnaw tameddit n unecruf war yeggin mayen xef!!

(Mayssa rachida EL Marraki, di 15 /03 /08)