Tugha war kid sen djigh ca umi ggin awar jar asen ad rahen ad cemten “Aynaw” butanut n dcar, ad xaf s d qardven ijjen n duru d aseppanyu war isekwi walu.

Wcin ayi cwayt zi min d sghin n “arruku” yughin di sekkur d acemrar, nnec attvas war qridvegh ca, baba mkur ass n ssuq n tlata tugha ittic ayi ayenni n duru, maca rexxu ittu yayi, attvas war d iswizzedv zzay s ghar i, oini war ghar s ca! Zright i temqetmar s ughir akd tsudjest d min tkessi.

Tawuri n baba di tsirt n “Dpar n ssuq” tugha teqqen ghar txuncay n imendi nigh n farina, maca rexxu igharfen n tsirt skutan, shessan ghar ixsan nsen tugha yekkaren temghezzan akd ayawya nsen war tbeddin, razagh ingha ahray, yumes ura d axeyyeq i wudem n baba, tugha tasen tid ghar s thenjirin s rebput, d rehmur n imendi d iourrac, ikessi, isrusa akid sent, nec twarigh sfarninent ghar s axmi nni d asent itades ghar imezzughen, war ssi min tugha d asent yeqqar! Rexxu ahray walu, asfarnen walu, d yemma di taddart temzawar, tettar zzay s ad yarzu xef tawuri mani nneghnit.

“Aynaw butanut” issawar s idvewdvan, war yessin ad yini awaren, maca yiwedv ad yini i baba mmic icmet ayi, isvgha xaf i s duru war isekwi, d tidet nnigh as i baba, qqasegh cwayt zi min d sghin yenni, maca nec war swizegh ca deg ucmat nni, war qridvegh zeg ami tugha tharri tsirt. Harregh d x baba minzi day i issezwegh igemmizen, yarra xaf i tifeqqao n tsirt war iharyen, tedwer d akid i tizedv n “arruku” d tiqqest tesru.

Baba tugh it tyarzawt umi war yezvwi deg ufugh n zic, umi tugha iqrinen nnes d kessin ttesrih zi tmurt n Dzayar, ixarresv ura d netta ad yegg am aytmas marra, hed icarreq, hed igharreb, marra zvwan ghar ujemmadvin, iced aqrab nnes, itleo ura d netta, teloegh akid s ura d nec s iseqsan i teggegh zi twarat ghar tennegh nit i yemma x mermi twasit n baba zeg utlao nnes, war tessin ad xaf i d ttar, waxxa tenna yi babac yezvwa, war ssinegh umi qqaren zvekwu.

Tacaregh ixf inu, taryegh asawen n ighzar n weghbal ghar uxxam n tsirt, tafegh walu din baba, ura d asfarenen n thenjirin n wehray war din yedji, qqaregh as i yexf inu, baba nican yetlao, i rexxu mayemmi yuyar, yejja yi nebra aqradv.

Yemma deg uxxam tessudvus day i s pella ralu, “Babac a memmi war d itis ar ghar d tlellec tefsut x idurar n dcar nnegh... ar ghar d teghmi ddemnet nnegh d tifedjay n imendi... ar ghar d issiwer Aynaw ad yini wi t icemten zeg ihraymeyyen n dcar... ar ghar d...”.

Spigh akd yemma tesyam day i jar tighadjin nnes, tebbi azedjif zeg iseqsan inu d xaf s d itrusen am isudvar deqren i tkessit, d baba ad yadef zi tewwart n wur inu, yiwi yi d akid s zi Pulanda ijjen n “ukamiyyun” n riraret, tccuregh aorur nnes s tbarra n wudji nnegh, taymegh day s acar n remrah nnegh, tawyegh t zi teghmart a ghar tenneghni t, d baba ixezzar day i, war day i yenni ca war ssexnunnus ixf nnec deg ucar, mammec i day i teqqar yemma.

Razv yegga baba i wcar nnes am razv ggigh nec i netta d yusin zi ragwaj nni ghar tmurt nnes, nebra yadwar ghar uraq nni zi manis day i d yiwi tiwsi n “ukamiyyun” n ughayyu, ad day s ssnayegh temzvi inu ad tni ghar tewsar nnes.

(Tarraguna:2008)