X tma n tirra

Yura t: Mimun Amsbrid

1

awaren n yzri tettvfen jar asen s wysum n umdyaz

2

jj ad djazgh mara jjiwnen wawren!

3

yqqim dayk ghas awar!

4

wa d aysum inu: ccet a yawaren!

5

ajnna yura:

aswadv ur ydji min xf gha yars,

tittvawin tfafant – djuznt.

6

iwdvegh!

7

tarrvez tisit: ur djigh.

8

am ticri di tayyut…

9

yqdvu wsghun n wawar.

10

djuzen wawaren: wi tn gha ysseccen?

11

qdvwen isghwan zeg wmdyaz.

12

imttvawen n wmdyaz:

yqqim ayi wjnna, tfawt, anzvar

d wswadv yuran.

yffegh ayi wmnus: ur tggwdegh, ur tarjijigh.

yqqim ayi cway n wbrid – ad t uyurgh, ul yura,

tittvawin arzvmnt.

13

qquren izran di tittvawin n wawar:

d amttva – ur itizzr, ur itizgh.

14

am wen itraggwaren di tayyut.

15

nyzmen wawaren dg izran n umdyaz.

16

yfser umdyaz aysum nns: tghiren d awar!

17

itasm umdyaz x usynu, x tidrin,

x uzmmur awssar

itwattun dg ighzar!

18

itasm umdyaz!: tudart nnes d tusmin.

19

«…u ur djigh di Tibur* xmi days djigh» -

Hadrianus, ijen ujdjid n Irumiyyen

20

izri ur isgnfi: yarzzvem ayzzim.

21

iru di tadjst umdyaz.

22

iddargher umdyaz: ycca ul nns.

23

yura umdyaz aghir i wadvu!

24

ur da bu wjnna!

25

zrigh mamc tafirast turvu isnnanen umi ittysi wnzvar –

tqqim tdder maca tdwer ur tdji d nttat:

zi tfirast tdwer d tazggwart!

nddakkwar ur ndji d nccin hama ad nqqim ndder!

hama ad nqqim ndder nddakkwar ur ndji d neccin!

tuca tfirast akid ixf nns umi dja tddakkwar d tazggwart?

nc ucigh!

ucigh akid UYNNI itmudjugh degw aduf,

deg ixsan, deg idammenn, deg wysum, di trmect.

min ay gha yarr?

ggwdegh ad dwregh ur djigh d nc – d ijn nnidven.

Ijn ynnum, ijjummi, yufa ixf nns, yjjiwen, yarra mzri: ijn ur ydji d NC.

Ad qqimgh djigh, xmi gha dwrgh ur djigh d nec?!

i tfirast nngh-idwren-d-tazggwart? oad d tafirast!?

26

tamuziqit (azawan) d AYNNI: ur tdji d awar xf UYNNI – am izri.

Izran ddalen AYNNI nitni arzzun ad tmren.

Gg tasimfunit wis 5 n Bitpuven

uca tjjed ixf nnc ad ymmet (nigh ad iwdder nigh ad yfsi).

27

...