Udem amxib(6)

ittaru t: Lhusayn ZERGI (Tinjdad)

Ttugh!

Ur am sawlegh ghef tmurt. Attvas aya y ttannayed, ad tili tghufi (nostalgie) nnes tger azettva nnes deg wul nnem. Amm wass a amm wass lli; tamurt lli ittettan tarwa nnes amm tuccent tsul tbedda deg usawen nnes. Amcic lli, ighed lli.

Oemmi Heddu isul da ykessa ulli deg wasuken (ruelles), ar ireggem (insulte) lehkwem amessas, ar isawal i ymezdagh n ddaw wakal.Tessend acu asen inna yan wass; inna yasen: "Mek ghurrun isul kra n uburez (courage). Rnu yat uguz deg wakal, afella ur illi ghas tallest... "Igellin a Heddu... Hmad kkuc; anfal abudrar (nomade), isul da yessa aghisim (alcool), ar ittekk igherman amm umedyaz. Awed yat tmurt g ittafa iman nnes, iqqim ghas ar itsara...

Infalen n tmurt inw, burzen, beghsen, ufen aggagen (intellectuels) nnes. Infalen zemren ad siwlen, qqimen d medden. Aggagen nnes ffren g tmelsa nnsen tizedganin, urda d tteddun gher tmurt ghas ig ran ad mmten...

Infalen ayed igan tisent n tmurt. Ur zmiregh ad am siwlegh ghef tmurt inw min ad siwlegh ghef infalen nnes, negh s wawal nnidven ghef imusnawen nnes. Igherman sulen beddan, salen imezdagh da ttelghen itersiwen nnsen amm igherdvayen, tsal tamara teqqen arwa g wallaghen, ar tesxitir icawen nnes g irebyan n medden...

Ur ssinegh is am sawlegh ghef Ubaheddu, ghef ikrafen n

Mayyu, ghef inighan inger Ayt Oetta d iserdasen (militaires) g Tdeght, ghef twada n Ayt Ughbalu n Kerdus negh ghef icekkamen imaynuten... Ur awed ssinegh is am sawlegh ghef isuturen n imezdagh tturun ghef igidar d tfelwin, ghef uzbu n inalmaden mgal n tidderghelt, ghef isefra  n Lghaci, n Heddu d Smail, ghef yiccki n id Muha, ghef imgharqecbuten (masques), ghef JSK, ghef icirran ikemmin tizegnin n wagirruten ar  ttarmen aghisim d waman n tudert...

Ur cfigh is am sawlegh ghef Mbark iran ad ig Yakuc, ghef Muha isignew yuckan (nuage errant) iran ad ig agellid, ghef Lefyu, Angi d Tara...

Ur cfigh ula ssnegh. Ar am sawalegh allig ur ssinegh mayed am nnigh ula mayed ur am nnigh. Ssurf iyi mek ttugh kan uneghmis ur am t nnigh. Pat tessend acu yellan...  Ar tayed...

(Isul itteddu...)