Wadj ayi d tifras inu

Yura t: Said Belgharbi

X trict n toejjuja

Ghari tammurt

Ghari turja

D tireqqaghin tizedjitin inu

Am tayri

Yenduqma day sent uraji

Iteffegh d d tihjijjatin

Deg idammen inu

Tin tareddef tin

Izdegh umezruy

X tmewwa n ujemmadvin

Isriwriw d ighuyyan

Ifessi tizermin

Itedjem deg ussan

Isrugha tifawin

I tudart yettun, ad inigh:

Ad ayi tari

S taycitin

Ad ayi tesezdegh

Jar imar nnes

D aydud

War yareccin

I yitri yetwattun, ad cetcigh:

Ad iwarda

Tifras inu

I yires n tsemghin

Ad ayi idarent d izri

Deg irimam d tiqessisin

Ad yaf tansa inu

War ghar s bu texxamin

Ad t yaf d iseqsan

War ghar sen bu temwarin

Ad yessen imar

Dhigh d tiweddarin

Ad t yefsar d iwaren

D icetcan

X yimi n tinawin.